DLAŊ LEVIRA 14 - Boy Lonana

Ɓivun ma mbuɗ sa ma tuguɗi busuna lamma ki teteɗna

¹ Yawe di Moiz ana,

² «Gola ni dlara laɗ kay sa ma tuguɗi busuna lamma hu li ma a mbuɗum ki teteɗna.

³ Mul ma li ɓivunna kal ha ki doŋ kaana, asi mbaa sa ma tuguɗi busuna fokomu. Lini tuguɗi busuna hin sa namma ki wa ni,

⁴ mul ma li ɓivunna di ana asi ɦal layagi suu iirina ay mba', layagi suu teteɗna, ɦal gu sedrena ay may, ɦal baraw ma tlawna ay may u cono ma mbus zozoɗta kina may.

⁵ Mul ma li ɓivunna ɦal voɗta a ŋgaɗ lay ma jewna kolo fun doy ma yona ka ɓaɗ hurumma.

⁶ Nam vi lay ma iiri namma may, gu sedrena may, baraw ma tlawna may u cono ma mbus zozoɗta may, nam curuɓusi duk busu lay ma ŋgaɗam jewna duk mbo ma ka ɓaɗ hu doyna u lay ma kom iirina halaŋ.

⁷ Nam yam mbo namma eg sa ma tuguɗi busuna lamma sem kiɗisiya. Nam di ki kay sa namma ana nam mbuɗ ki ni teteɗ. Lay ma hin kom iirina nam hinim nam pii tin irim ŋgoro.

⁸ Sa ma min mbuɗ ki teteɗna, mbus barawi mamsina kiyo, wel tlimiɗta egemba ki halaŋ, mbus tam ki may ni nam mbuɗ ki ni teteɗ. Ŋgoo dagan nam kal vo hu zina, li buuna ki kiɗisiya bay kal hu ziim tu wa.

⁹ Hu buu ma kiɗisiyana ni nam wel tlimiɗim ki halaŋ halaŋ, udumumu, tlimiɗ irimu, wel tlimiɗta ki halaŋ. Nam mbus barawi mamsina kiyo, mbus tam ki may ni nam mbuɗ ki ni teteɗ.

¹⁰ «Hu buu ma kalavandina ni nam yow gor timigii suu njufiina mba' suu bay ŋgulla egesina u goo timiira basaɗaɗ ki dewra dew may ni ta ŋgul ka egeɗɗira, ɦal fuɗta u kelewna dleeŋe a li puura njaf wana ni ta yarasi u mbulnara, ɦal mbulna u nus litirna may.

¹¹ Mul ma li ɓivun nammana tak sa ma a li tam ki teteɗna u tlegeyem suu nam mba u asina fok Yawe fun Mbutluɓ ma Tokka.

¹² Mul ma li ɓivunna vi timii ma jewna tuɗum a li ɓivun ma min duk ɦoŋga u mbul ma nus litirna may. Nam ɦasi fok Bu Suuna u geŋeɗa geŋeɗ tam fok Yawera.

¹³ Nam ŋgaɗ timiina ni hu li ma asi ŋgaɗ ɓivun ma bulum cora kina u ɓivun ma ŋgalam ki ŋgalina huna ni hu li ma teteɗna. Kay ndaɗta ɓivun ma min duk ɦoŋga u ɓivun ma bulum cora kina ni ɓivun ma teteɗna, tle asina ni maŋ mul ma li ɓivunna. Asi ni tlesuu teteɗna.

¹⁴ Mul ma li ɓivunna vo busu ɦu ma ŋgaɗam a li ɓivun ma min duk ɦoŋgana. Nam tin busuna hum sa ma mba a li ɓivun nammana hu humumba njuffa, tinimma kay do komba njuffa may, kay do semba njuffa may.

¹⁵ Mul ma li ɓivunna vo mbul ma hu nus litirnana hu duk kom ma gulna.

¹⁶ Mul ma li ɓivunna kal cifiɗ komba njuffa ay duk mbul ma vooy hu komma guluna, Nam yam mbulna fok Yawe sem kiɗisiya.

¹⁷ U mbul ma hin hu duk komma, mul ma li ɓivunna tin mbulna hum sa ma mba a li ɓivunna namma ta njuffa may, tinim kay do komba njuffa may, kay do semba njuffa may, li mbulna ha ni kolo kay busu ɓivun ma min duk ɦoŋŋa ma nam tinim ha jewna.

¹⁸ U mbul ma hin hu duk komma nam lam ki kay yam sa ma mba li ɓivunnana. Mul ma li ɓivunna geŋeɗ tam lam ɓivun ma bulum cora kina kam fok Yawe.

¹⁹ Mul ma li ɓivunna tuɗ fok u ɓivun ma bulum cora kina. Nam li ɓivunna kay sa ma mbay a li tam ki teteɗna. Ŋgoo dagan nam ŋgaɗ ɓivun ma ŋgalam ki ŋgalina.

²⁰ Mul ma li ɓivunna tli va ma ŋgaɗam namma u puura njaf wana, tuɗusi hu givin ma togolla. Nam geŋeɗ tam li dlara ɓivun ma bulum cora kina kasiya. Na ni sa namma mbuɗ ki ni teteɗ.»

Sa hawra mbuɗ ki teteɗ

²¹ «Lini sa ma min a li ɓivunna hawi, tle asina ka a fi kom belɗi ni, nam vi goo timiina ni dew a li ɓivun ma min duk ɦoŋga u geŋeɗa geŋeɗ tam a mbaaramba kay a asi lam ɓivun ma bulum cora kina, yow fuɗta ay kelewna dew may, kay puura njaf wana, yarasaɗ ay ki u mbulna, ɦal mbulna ay nus litirna dew may.

²² Yow gugukka ay mba may. Ni u saɓakam ma nam fi ayna. Gukka dew wanda ni a li ɓivun ma bulum cora kina, ta hiŋga ni a li ɓivun ma ŋgalam kina may.

²³ Hu buu ma kalavandina ni nam mbaarasi ay a li ɓivun ma mbus tam kina maŋ mul ma li ɓivunna fun Mbutluɓ ma Tokka fok Yawe.

²⁴ Mul ma li ɓivunna vi timii ma min duk ɦoŋga u mbul ma nus litirna. Mul ma li ɓivunna tuɗusi fok Yawe u geŋeɗta geŋeɗ tamba.

²⁵ Nam ŋgaɗ timii ma min duk ɦoŋga. Nam vo busu timii namma. Nam tin busuna hum sa ma mba a li ɓivunna ta njuffa, tinimma kay do komba njuffa may, kay do semba njuffa may.

²⁶ Mul ma li ɓivunna vo mbulna hu duk kom ma gulna.

²⁷ Nam kal cifiɗ komba njuffa duk mbulna. Nam tuɗ yam mbulna fok Yawe sem kiɗisiya, ni mbul ma ka hu duk kom namma.

²⁸ Mul ma li ɓivunna tin mbul ma ka hu duk kom ma guluna hum sa ma mba a li ɓivunna ta njuffa, tinimma kay do komba njuffa may, kay do semba njuffa may. Ha ni kay li ma nam tin busu ɦu ma li ɓivun ma min duk ɦoŋgana olo.

²⁹ U mbul ma hin komma mul ma li ɓivunna lam ki kay sa ma mba a li ɓivunnana u geŋeɗta geŋeɗ tam fok Yawe a li ɓivun ma bulum cora kina.

³⁰ Duk gugukka mbara vi taa dew, ndaɗta ni nam ndak vi ay u saɓakamu.

³¹ Duk layagi suu mba' asina ni nam vi dew a li ɓivun ma bulum cora kina, ta mbara ni a li ɓivun ma ŋgalam ki ŋgalina u puura njaf wana may. Mul ma li ɓivunna hin li ɓivunna kay sa ma mbay namma fok Yawe ko gaɗta dira na.»

³² Gola ni haɗta kay sa ma tuguɗi busuna lamma, ma ka ndaki a fi tlesuu li ɓivunna ki halaŋ ko gaɗta dira naɗina.

Gaɗta kay huu zira gufurira

³³ Yawe di gi Moiz u Aaron ana,

³⁴ «Hu li ma agi tew hu mbassa Kanaan ta an ɦagira ki magira wa ni, lini an tin zozoɗta ki pay zira vi sa wa ndaɗ gufuu ki wa ni,

³⁵ Malaŋ zi ndaɗta tuɗ di ha ki maŋ mul ma li ɓivunna, Ziinda cemi ni gol ko zozoɗta ki tini egeɗ na.

³⁶ Mul ma li ɓivunna ɦal voɗta ha ana zii tlesuu kalafi hu zi ndaɗtana ki jew nam a tuɗ gol zozoɗ ndaɗtara, ni tle asina halaŋ ka gol njenje duk koɗi, ni ndak a hin lina ki a mul ma li ɓivunna tuɗ gol huu zira ki jivira may.

³⁷ Nam gol pay goŋga lini payaɗ gol duk tlaw tlaw ɗowba paa ha duk ga zuzulla, gol ki wara waraa ni,

³⁸ mul ma li ɓivunna kal ay ki hu zi ndaɗta hiniɗ dugi ta ta buuna kiɗisiya.

³⁹ Hu buu ma kiɗisiyana mul ma li ɓivunna hoŋ ay mba gol zi ndaɗta olo, lini li ma duk ndali namma mbuɗ ki pay goŋga wa ŋgolo ni,

⁴⁰ mul ma li ɓivunna ɦal voɗta ana paɗ ɦinira ki duk coori ndaɗta ki tuɗ cukuɗ ha ki doŋ kaana hu li ma cuk tlesuu njenjena.

⁴¹ Nam ɦasi voɗta a horok huu zira ki halaŋ tuɗ cukusi ha ki hu li ma njenjena doŋ kaana.

⁴² Yow gogoyra daŋga varakaɗ balam ɦini mayra paɗaɗ ay kira hin ɦoɓ luɓu ma daŋŋa a hoo huu zira horokoɗ ay kira may.

⁴³ «Lini zozoɗ ndaɗta hoŋ li dagan hu li ma asi paɗ ɦinira kina u horok huu zira kira olo ni,

⁴⁴ mul ma li ɓivunna hoŋ tuɗ gol huu zi ndaɗta olo, lini zozoɗ ndaɗta hoŋ ndal ki hu zira wa ŋgol olo ni zi ndaɗta laɗ ni busuna, ni ndaɗ mbuɗ ki ni njenjee.

⁴⁵ Asi hawaɗ zi ndaɗta kiyo, zii ɦinira min goŋga u ndaɗta, guna u ndaŋgara hoo hu zira u ndaɗta halaŋ ha ki doŋ kaana hu li ma njenjena.

⁴⁶ Sa ma kal hu zi ndaɗta hu li ma asi ka goloɗ tuna, ki ni njenjera ta ta fiɗigiya.

⁴⁷ Sa ma buu hu zi ndaɗtana mbus barawi mamsina kiyo. Sa ma ti vana ay kalafi hu zi ndaɗtana mbus barawi mamsina ki may.

⁴⁸ Na may hu li ma mul ma li ɓivunna kal hu zira dagan hu li ma asi paɗ ɦinira ki lay horokoɗ huruɗu, hooroɗ ki layna lini nam fi zozoɗ ndaɗta ɦuɗ ka fok oloɗi ni, nam di ki kay zi ndaɗta ana ndaɗ ki ni teteɗ. Kay ana tuguɗi maɗta hiniɗ ki wa.

⁴⁹ A mbuɗ zi ndaɗta ki teteɗta ni nam yow layagina mba', yow gu ma yam ana sedrena, yow baraw ma tlawna u cono ma mbus zozoɗta may.

⁵⁰ Nam ŋgaɗ lay ma jewna kolo fun doy ma yo ma ɓaɗna ka vooy huna.

⁵¹ Nam hin yow gu sedrena, cono ma mbus zozoɗta, baraw ma tlawna u lay ma hin iirina, Nam curuɓusi duk busu lay ma ŋgaɗamma u mbo ma ɓaɗna ma ka hu doynana, nam yam busu namma sem kiɗisiya eg zi ndaɗta.

⁵² Ni nam hin mbus zira ki ko cooɗ ndaɗta ni na, u busu layna u yo ma ɓaɗna u lay ma hin iirina, gu ma yam ana sedrena, cono ma mbus zozoɗta u baraw ma tlawna.

⁵³ Nam hin lay ma hin iirina pii ha ki doŋ kaana, hoŋ irim ŋgoo bagi duk gura na. Nam li ɓivun ma bulum cora kina kay zi ndaɗta ni ndaɗ mbuɗ ki ni teteɗ.»

⁵⁴ «Gola ni haɗta kay tuguɗi busuna u tlesuu coo kinara,

⁵⁵ busu ma eg barawnana ɗowba busu ma pay goŋgana halaŋ,

⁵⁶ busu ma ndal eg sana, kolla u biiriwna halaŋ,

⁵⁷ tuguɗi ndaɗta halaŋ tak ki ana sana mbuɗ ki njenje ɗowba ki teteɗ. Gola ni haɗta kay tuguɗi busunara.»