DLAŊ LEVIRA 10 - Boy Lonana

Nadab u Abihu miɗ kiwa

¹ Nadab u Abihu goryoŋ Aaronna yow ganun masina kosiya, yow kura daŋga ay kosi hu may, vo mbul ma his jivina kayam may. Asi tuɗ ɓivun ma ka u voɗombi namma fok Yawe, li ka ko gaɗta di kira naɗi.

² Kura col ay fok Yawe mba ŋgalasi kiyo. Asi jak miɗ ki hu li namma fok Yawe gaw.

³ Moiz di Aaron ana, «Yawe di ay ki jew jivi ana, An min ana suu a mbay egenna li u teteɗ manda. Asi ŋgaan ki ni fok suuna halaŋ.» Kay ndaɗta Aaron seŋ tam na yerek yerek.

⁴ Moiz yi gi Mikael u Elissafan, goryoŋ Uziyel ma bu mba' Aaronna dasi ana, «Mbaagi aya, yowogi maɗ gorsegina ha ki hu Li ma Teteɗna, tuɗusi ha ki doŋ kaana.»

⁵ Asi huɗ tasi aya, mba ɗuɗusi hu baraw masi ma tasina, tuɗusi ha ki doŋ kaana ko Moiz dira na.

⁶ Moiz hin di Aaron u goryom suu daŋŋa, Eleazar u Itamar, ana, «Agi ka wel yagi kiɗi, haa barawi magisina kiɗi lay, kay ka a agi miɗ kiɗi, mbaa yara kay suu halaŋŋaɗi lay. Kay suu Israelna halaŋŋi gorsegina, asi hin tii ni asiya, kay va ma Yawe ɓalakam ki u kurana.

⁷ Agi tagira may ni hin vun Mbutluɓ ma Tokka kiɗi, kay agi miɗ kiɗira may. Kay agi ni suu mbul ma fuura vi Yawe ki vooy kagina.» Asi li ni ko ndal Moiz dasira na may. Ŋgoo dagan asi ndak tuɗ voo.

Gaɗta kay summa

⁸ Bu Suuna di Aaron ana,

⁹ «Agi u goryoŋ cagi sumbi, ci sum ma yaɗi lay. Ni hu li ma agi tuɗ hu Mbutluɓ ma Tokka ni agi ka miɗɗi. Gaɗ ndaɗta ni ka gaɗta hin kiɗi, gak gak basara u basara.

¹⁰ Ni kay a ɓorow duk va ma teteɗna ki u tlesuu ka teteɗɗina, tlesuu ka njenjeɗina u njenjena.

¹¹ Haɗ suu Israelna ki halaŋ kay dla mayra Yawe daɗ ka maŋ Moizza.»

Gaɗta kay tliw ma ɓivunna

¹² Moiz hin di Aaron u Eleazar u Itamar, goryom suu hin kom mbana ana, «Tlagi puura u njaf wanara hin ma lam ɓivunna maŋ Yawe, tagina bay kuffa duku, agi tammi coli eg givin ma togolla na tok, kay ni ti ma ki saɓaki teteɗna.

¹³ Agi ti tle asina ay ni hu li ma teteɗna hol kay ni ɓorow maŋŋa u ma vi goryoŋŋa hu ɓivun ma ŋgalam ki ŋgalina, ni ko Yawe u vun tamba danda na.

¹⁴ Na may kay tliw dikŋa u gay ma njufna ɓivun ma geŋeɗtara agi u goryogi suu njufiina u gor tamagina komom halaŋŋi hu li ma teteɗna. Kay ni ɓorow magi ma ɦagina ki duk tliw ma li ɓivunana kay ɓivun ma heɓpa vi suu Israelna.

¹⁵ Aragelay hu li ma suu Israelna li ɓivun ma heɓpa ni, hu li ma asi a ŋgal mbulna ni tli dikŋa u gay ma njufna ay hu may, a takasi fok Yawe u geŋeɗta geŋeɗ tara, dok ndaɗta hin ki ni maŋ u goryoŋ tew tew, ko Yawe dira na.»

¹⁶ Moiz joɓ dla ŋgek ma asi vam ay a li ɓivun ma bulum cora kina, nam hummi ana asi komom kaɗi, ŋgalam ki ni ŋgaliya. Moiz hurum ɓeŋ ki eg Eleazar u Itamar goryoŋ Aaron suu hin kom mbana. Nam joɓosi ana,

¹⁷ «Agi kom ɦu ma ɓivunna hu Li ma Teteɗnaɗi ni kay mege? Kay ana nammi tliw ma teteɗna. Yawe ɦagi tliw namma ni a bulum cora vi suuna kira, kay a agi li dlara ɓivunna kayam fok Yawe a mbus cora vi suunara kira.

¹⁸ Kay ana busu ɦu namma tuɗum ha ka kalafi hu Li ma Teteɗnaɗi, kay ndaɗta agi ndak kom tliw namma hu Li ma Teteɗna ko an dagira na may.»

¹⁹ Aaron di Moiz ana, «Aŋ hum haa, hu li ma suu Israelna mbaa ɓivunna ay fok Yawe ni kay a bulumusi coosira kira u ɓivun ma ŋgalam kina hu lay, aŋ wi dla cora mba fanda lay. Ni an ndak a kom ŋgek ma bulum cora kina ki hu buu ma dewna su? Dla ndaɗta ni ii Yawe jivi su?»

²⁰ Moiz wi ki ana hoŋ di ndaɗta ni u voɗoɗu.