DLAŊ LEVIRA 1 - Boy Lonana

GA ƊTA U HA ƊTA KAY LIRA LI ƁIVUNNA Ɓivun ma ŋgalam ki ŋgalina

¹ Yawe yi Moiz kalafi hu Mbutluɓ ma Tokka dam ana,

² «Tuɗ di suu Israelna ana, Hu li ma sa ma dukugi min a li ɓivunna maŋ Lona, Yawe ni, agi ndak li u yoori suu ŋgolona lay, u suu gorina lay.

³ «Lini a li ɓivun ma ŋgalam ki ŋgali namma ni u mbutlu ni, aŋ ɦalni yoo ma bay ŋgulla egemma. Tuɗum ha kalafi fun Mbutluɓ ma Tokka kay a Yawe vam jivira.

⁴ Sa namma tin kom kay yam mbutl ma ɓivun namma kay a ɓivunna vi jivi a bulumum coomba kira.

⁵ Nam ŋgaɗ mbutl namma fok Yawe, muli suu li ɓivunna, suu goryoŋ Aaronna, tuɗ u busuna, yamam ŋguyum ki kay givin ma togolla na cutl, li ma ka mini fun li ma kal ha kalafi hu Mbutluɓ ma Tokkana.

⁶ Ŋgoo dagan zi mbutlna kiyo, ɓorow ii mbalara ki zeɗ zeɗ may.

⁷ Muli suu li ɓivunna, goryoŋ Aaronna, ŋgal kura hu givin ma togolla, cuk guna kay kura coco may.

⁸ Ŋgoo dagan asi yow mbalara u yamba u mbul ma hurumma halaŋ cukusi kay kura.

⁹ Nam mbus yorotna u kewetta ay ki u yona. Ҥasi maŋ mul ma li ɓivunna ŋgalasi ki halaŋ kay givin ma togolla. Kay ana ni ɓivun ma ŋgalam ki ŋgalina, ni his ma jivi ma tuɗ eg Yawena.

¹⁰ «Lini a mbaa ɓivun ma ŋgalam ki ŋgali namma ni u yoo ma gooro, timii ɗowba ɦura, ɦal ni ma njufna ma bay ŋgulla egemma.

¹¹ Nam ŋgaɗ ɦu namma ni keŋ ma mbayawna vi givin ma togolla fok Yawe, mul ma li ɓivunna duk goryoŋ Aaronna yamam busuɗum ŋgufum ki kay givin ma togolla na cutl.

¹² Nam ɓorow ii tliwna ki zeɗ zeɗ, mul ma li ɓivunna yow tliwna u yamba halaŋ cukusi kay kura u mbulna lay.

¹³ Sa ma mba dan ɓivunnana mbus yorotna u kewetta ki halaŋ, ɦasi maŋ mul ma li ɓivunna nam ŋgalasi ki lay. Kay ana ni ɓivun ma ŋgalam kina, ni ndoos ma his jivi maŋ Yawena.

¹⁴ «Lini a mbaa ɓivun ma ŋgala kina fok Yawe ni u laya ni, nam vi ay ni gugukka ɗowba guk gaɓiina.

¹⁵ Mul ma li ɓivunna tuɗuɗ ha hu givin ma togolla. Nam kaaɗ yaɗ kiyo, hin ŋgalaɗ kay givin ma togolla. Nam cuɗ busuna kolo kay givin ma togolla.

¹⁶ Nam paɗ fefekka ki u tlesuu huruɗna halaŋ cukusi ki keŋ u maɗiina vi givin ma togolla hu li ma asi tok but mbul ma ŋgalam kina, cukum ki huna na.

¹⁷ Wak lay namma ki duk kay garaŋam na, ka ɓorowom irim ki dukgi kama. Mul ma li ɓivunna hin ŋgalam kay kura hu givin ma togolla. Ni ɓivun ma ŋgalam kina, his ma jivina fok Yawe.»