DI BOLLA 9 - Boy Lonana

Suuna halaŋŋi fun tasi dew

¹ Na daŋ may an saa dlara hurun cocoo. Gola ni dlara an faɗta, suu ɗegeena u suu wi dlara u sun masira halaŋ col ay ni hu duk ko Lona. Minda u honira halaŋ sa warna ka wi dlara hin li ha fokkaɗi.

² Dlara mba' kay suuna ni fun tasi dew, kay suu jivina u suu cona lay. Kay sa ma jivi ma teteɗna u ma co ma njenjena lay. Kay sa ma li ɓivunna u ma ka li ɓivunɗina lay, kay sa ma jivina u ma sukukŋa lay, kay sa ma suu tam vi vunum kay dlara u sa ma li ndaana ka vi vunum kay dlaɗina lay.

³ Dlara li suu warnara ha ni fun taɗ halaŋ. Warak ma kay dla ndaɗtana ni ɓalakka. Suu warna li dla cora ɦay. Asi minni dlara uɗ kaɗira. A daɓ kira ni miɗna gaw may.

⁴ Sa ma ka iiri hu duliyara tuna ni sa ma ka u saara jivira tuna. Di ma iirina ni jivi su dlo ma miɗina.

⁵ Kay suu iirina wi ki ana hu buu dew ni asi hin miɗ kiyo. May suu ki miɗina ka wi va dewɗi. Masi asira ni warak ka oloɗi, kay humba maa ki kasi wa.

⁶ Min masira, yowmus masina, u honira hurusiya halaŋŋi viɗ ki wa. Vaasi maa hin ka kolo kay ndaŋgara oloɗi.

⁷ Tuɗa, ti fuuŋŋa u furira, ci sum veŋ maŋŋa u ayra kay Lona ŋgaaŋ sun maŋga aŋ laɗta wa.

⁸ Ko baraw maŋŋa li ki ni haɓ tew tew, mbulna li saɗi kay yaŋ tew tew may.

⁹ Furi u cara aŋ miniɗta hu buu ma Lona ɦaŋŋa kay ndaŋgara ew wanna. Ni warak ma aŋ fam kay loɓoŋ ma hu duliyara wanna gaw.

¹⁰ Tlesuu aŋ ndak a lasi u ɓik koŋŋa ni aŋ lasi gaw gaw. Kay ha duk suu miɗina ni yalna sunda u wira wi dlara halaŋ ka oloɗi.

Mbeleŋŋa ka u voɗom belɗi

¹¹ An wi dlara daŋga ka hu duliyara olo ni. Suu tasi feɗna ka fi dlara fokka tew tew ni asiɗi. Suu ɦiŋ cocona ka ti yara tew tewɗi lay. Sa ma wi dlara buu mamma hu duliyara tew tew ni u loɓma. Sa ma mbeleŋ cocona ka ɦizɗi lay, suu wi dlara sa ka ŋgaasiɗi lay. Gegelay ni dlaamba daɓ ki daganda kammi zeɗ zeɗ.

¹² Sana ka wi buurumbi. Ni ko kulufna vi hu bayna ko suu ciwnara na, hu li ma nam kal hu baynana. Ko laygina vi hu baynara na, goryoŋ Adamma dlara yoora kafasi ni ko ndaɗta na may. Hu li ma ndaɗ mba kasina asi ka wiɗi.

¹³ An wi dlara daŋga kay ndaŋgara dew olo ni kay yalna. Nammi va ma dlam ŋgol cocoo.

¹⁴ Ҥoŋzi maa ka na dew ni suu hu zi nammana ka ŋgolɗi. Mul ma daŋŋa mba ŋguy zi namma, tin tlesuu a to zi namma kina may.

¹⁵ Sa ma hawra hu zi namma dew ni yal cocoo. Nam suɗ ɦoŋzi namma ki u yal mamma. Dagan ni sa ma humum gam kay sa haw namma kaɗi.

¹⁶ An hin ɓak tan ana yalna ni su saɓakŋa. Na may yal ma vi sa ma hawra sa ka ŋgaambi, sa ka humum boy mammaɗi lay.

¹⁷ Boy ma vi sa ma wi dlara dam u lalambana jivi su walla mulla saaɗ kolo hook hook duk suu giniŋŋara.

¹⁸ Yal ma wi dlara ɦayna jivi su kawi ma duuna. Na may sa ma ciwayra dew ni ɓeŋ tlena ki cocoo.