DI BOLLA 8 - Boy Lonana

Sa ma wi dlara hum u mulna

¹ Sa ma wi dlara hum u boy namma ni namu. «Wira vi sanara aŋ waɗ ki weleɗ vogomu, yamba eŋga ka oloɗi.»

² Hum u mulna ni kay suura aŋ suu taŋ ki fok Lonara.

³ Ҥuɗ taŋ ki day fok mulnaɗi, so yaŋ ki a li dla coraɗi lay kay nam li ni dlara hurum miniɗta.

⁴ Kay boy ma mulna damma ni dlam ŋgolo. Sa ma hin di funum ana, «Aŋ li na ni mege na ni gege?»

⁵ Sa ma hum u gaɗtana ka fi dlara coɗi. May sa ma wi dlara wi ki hurum ana hu buu ma dew ni Lona hin kaɓakŋa.

⁶ Na daŋ may tlena halaŋŋi buurusi ma kaɓakŋa ki ŋgaaya. Na may hahawra ŋgolla ka kay sana.

⁷ Nam ka wi dlara hin mbaraɗi, sa ma hin dam ana ndaɗ a mba ni hu buu ma wannana ni gege?

⁸ Sa ma u saɓak ma vi iiri mamba kay tam kaɗi. Sa ndak a ɦuɗ buu mam ma miɗna fok kaɗi lay. Hu li ma duuna kana, yal ma sana a ŋgay ki kaɗi. Huu ma cona ka ndak a suɗ sa ma co nammaɗi lay.

Suu cona u suu jivina

⁹ An gol dlara suuna ka laɗ hu duliyara wanda na halaŋ. Suu kaki mulla kay ndarayasinana ni na ew daŋ. Asi ka las ndarayasina usi may.

¹⁰ An wi suu li dla cora asi pasi hu zul masira. Asi tuɗ tiirisi hu li ma teteɗna. Humusi maa ki kay dla cora asi laɗta. Halaŋ ca ni ŋga tara ɦawaa.

¹¹ Kay ana dla cora sa ka ɓakaɗ ki na zakgi. Huu goryoŋ Adamma oyra ni u dla cora.

¹² Sa ma li dla cora li cora yammi kis lay, nam ka ɦuɗum buurum fok gak gak. An lay wi ana «jivira ka kay suu li ndaa Lonna kay ana asi lam ndaramu.

¹³ May jivi taa ka kay suu li dla coraɗi. Asi jak ki ni ko ŋgusna na, buurusi ka ta taɗi. Kay ana ndaa Lona ka kasiɗi.»

¹⁴ Dlara ka li kay ndaŋgara tani u ŋga tara ka olo. Suu ɗegeena asi tokosi dlara vi suu conara ni kasi na ɗow. Suu cona asi hin ɦasi dlara vi suu ɗegeenara ki ni kasi na ɗow may. An di ki lay ana halaŋ ca ni ŋga tara ɦawaa.

¹⁵ An may ni ka furira coco kay va ma vi sa warna ma kay ndaŋgara tanina ni ti may, ci may, hin furi may. Ni va ma nam ka fam u sun mamba nam laɗta kay a juɓ buu mam ma Lona ŋgaamma kay ndaŋgarana.

¹⁶ Hu li ma an tin hurun ki a wi dlarana, wi sunda suuna ka laɗ kay ndaŋgara wanda may. Faali lay, njeŋge lay, sana ka buu sen u irimbi.

¹⁷ An wi sunda Lona laɗta ni sa warna ka ndak a wi dlara Lona laɗ kay ndaŋgara wandaɗi. Sana loɓ tam coco a hal u dlara may ni, ka faɗɗi. Lini suu wi dlara di ana asi wiya lay ni ɦawaa. Asi ka ndak a wi u dlara Lona laɗtaɗi.