DI BOLLA 7 - Boy Lonana

¹ Sem ma yi jivina su ki kay mbul ma his jivi ma gus loɓma. Buu ma miɗna ni jivi su buu ma vuɗta.

² Tuɗta tuɗ hu li ma tii maɗna jivi suu mayra aŋ tuɗ kal hu zira tina huruɗ zeɗ zeɗta. Miɗna ni kay suu warna halaŋ, jivira ni sana haɗ tam ki u namu.

³ Mariyaɗ ni yoora jivi su sanda, kay hu li ma aŋ ka hu yoorana ni huruŋ kurufu furiya.

⁴ Huu suu wi dlara tew tew ni u yoora. Huu suu giniŋŋa tew tew ni u furira may.

⁵ Humba hum u gaɗta vi sa ma wi dlara jivi su humba aŋ hum soolla vi sa ma giniŋŋa.

⁶ Ko ndal gu ma siina ŋgal hu givinna u doyra na, sanda vi sa ma giniŋŋa ni ko ndaɗta na may. Halaŋ ca ni ŋga tara, hin jak ki ni duk semeɗna ɦawaa.

⁷ Ҥeɓpa mbuɗ sa ma wi dlara ki laɓara, ŋgomba ŋgom sana mbuɗ huu sana.

⁸ Daɓpa daɓ dlara kira jivi su mayra gijaŋ dlara. Vira vi taŋ u dlara jivi su ŋga tara.

⁹ Ka hin huruŋ a ɓeŋ zak zakgi, huu ma ɓeŋ zak zakŋa ni vi suu giniŋŋa.

¹⁰ Joɓoygi taygi ana li ma vi suu jewna ay jivi su ma wan daŋŋa ni nanage naɗi? Joɓ ndaɗta ni ka sa ma wi dla joɓoɗɗi.

¹¹ Wira wi dlara ndaɗ jivi cocoo, ni ko vaaŋ ma aŋ fam ki a jona na. Wira yalna njun suu ka iiri kay ndaŋgara tuna.

¹² Ko ndal gursuna jiv dlara ki kay suuna, yalna ɗoɓ dlara kay sana a nam kak iiri hu duliyara tu ni ko ndaɗta na may.

¹³ Gologi sunda vi Lonara gige. Sa ma ndak a ɗoɓ va ma Lona gunum kina ki ni gege?

¹⁴ Lini dlara halaŋ ka tuɗ jiviya ni furuyuygiya, lini dlara halaŋ ka tuɗ coo ni, saaraygi may. Lona sun jivira u cora ay halaŋ, sana ka ndak a waɗ uɗɗi, ka wi va ma hin li ka ŋgorommaɗi lay.

¹⁵ Iiri manda ni ɦawaa, an wi ki ana sa ma ɗegeena hin miɗ ki u ɗegee mamba. Sa ma li dla cora hin buu coco hu duliyara u coomba may.

¹⁶ Aŋ kal ɗegeera ki saɓaki kaŋ cocoɗi. Li taŋ a sa ma wi dla cocoɗi lay. Aŋ min a ɓalak taŋ ki ni kay mege?

¹⁷ Ka aŋ li ki co saɓakiɗi, mbuɗ taŋ ki sa ma giniŋŋaɗi. Aŋ min a ci taŋ ki jew buu maŋŋa su?

¹⁸ Mariyaɗ ni aŋ li u gaɗ ndaɗta jak bel, kay sa ma li ndaa Lonana lasi ki ni bel.

¹⁹ Wira wi dlara mbuɗ sana saɓak coco su muli suu doogo hu ɦoŋzi ma dewnana lay.

²⁰ Kay sa ma ki na ɗegee kay ndaŋgara tani kaɗi, ma ndak a li jivira bay li dla co hu ni kaɗi.

²¹ Ka aŋ caa yaŋ kay boy ma suuna damma halaŋgi, kay ka aŋ hum ŋgulla saaŋ ma sunda ŋguluŋgaɗi.

²² Kay huruŋ ndak daŋ lay, aŋ ŋgul suuna ay coco ni ko ndaɗta na lay.

Hal yalna u wira

²³ An juk dlara halaŋ an ɓak tan ana an min a li tan ki ni a sa ma wi dlara cocona. Na may ni an hin tew kaɗi.

²⁴ Dlara mbayra halaŋŋi su ki kay saa manda, dla ndaɗta ki zuzul cocoo. Sa ma ndak a waɗ uɗ kina ni gege?

²⁵ An so hurun coco a wi u dlara kiyo, a laɗta lay, halaɗ uɗ ki coco may. A wi ki ana huu ma cona ni puluɗta. Ndaɗta ni ko sa ma yam ki ɓalakina na.

²⁶ An wi ni ana cara ganyamba dlaaɗta ni co su miɗna. Huruɗ ni ko ndal bay ma vi tlena na, koɗ ni ko ndal zew ma njun sana na. Sa ma li ndaa Lonna fuɗ tam ki koɗu. Ndaɗ ki ni vii hu dla cora.

²⁷ Gola ni va ma an wam a dam kina. An gol u dla ndaɗta ki dew dew halaŋ a wi saara jivira.

²⁸ An ka ni hu halla gak ka bay vaɗ uɗ ki tuwa. An fi ana duk suu njufiina buɓmi aŋ ndak fi sa ma ndakina duk dew. May duk boyogi suu bolow cocona an fi cara ndaki a sa ndak a laɗ ndaraɗ kaɗi.

²⁹ Gola ni dlara an faɗta. Lona li sa warna ni ɗegee ka ŋga tambi, may sana hin hal dlara loɓma kay tammi namu.