DI BOLLA 6 - Boy Lonana

¹ Dla cora an ka waɗ hu duliyara cemi wandara ka olo. Dla ndaɗta ka coco kay suu warna.

² Sa ma Lona ɦam begera cocona, sem tii ki coco lay. Va ma bay nam fam kaɗi. Tlesuu nam minisina halaŋ nam fasiya. Na may Lona hinim ka a ti tle asinaɗi. Sa ma daŋŋa ti tle asina ki ni namu. Halaŋ ca ni ŋga tara ɦawaa, loɓ taŋ ki ni ɦawaa.

³ Sa ma daŋŋa vuɗ gorra na kis, basa kay ndaŋgara coco lay. May furi mamba hu duliyara kaɗi. Zulla pam huruɗ jivi kaɗi lay. An dagiya, goo ma ndi ki huu sum ndiina suumu.

⁴ Kay nam vuɗ ki kay ndaŋgara ni ɦawaa. Nam hoŋi duk ndufunda. Duk ndufun ndaɗta sem bulum ki wa ka yi oloɗi.

⁵ Nam wi faɗta ka u irimbi, ka waɗɗi lay. Nam fi koɗ tara ha coco lay.

⁶ Lini sa ma daŋŋa li basara na buɓ buɓ mba' u lassa lay ni. Asi mba bel tuɗ ni hu li ma dew nammaɗi su?

⁷ Sunda sana laɗta halaŋŋi kay vunumu. Na lay ni hayam ka hoɓbi.

⁸ Sa ma mbeleŋ ɦayna su sa ma laɓana ni u mege? Va ma jivi ma sa ma hawra wi yal ma fi vunum ma tira kay tamma ni mege?

⁹ Mariyaɗ ni furi u vaaŋ ma ka koŋ ewna su mayra huruŋ haɗ kay tlesuu vi suunanara. Halaŋ ca ni ɦawaa, hin jak ki ni duk semeɗna.

Gaɗta vi sa ma wi dlara

¹⁰ Va ma ka cemi wannana ni va ma suuna wam ay ki fok jew day dayna. Ay wi ki ana sana ka ndak a ciway u ndaram ma suummaɗi.

¹¹ Lini ay ciwayra cocoo ni boy mayna halaŋ mbuɗ ki ni ɦawaa. Na ni va ma hin fam huna ni mege?

¹² Sa ma wi dlara ndak sana ki jivi hu iiri mamba nde hu duliyara wandara ni gege? Iiri ndaɗta jak ki ni semeɗna ɦawa na. Ɗowba sa ma ndak a di sana kay dlara hin li ka ŋgorom dagan miɗ mammara ni gege?