DI BOLLA 5 - Boy Lonana

¹ Hin vunuŋ ma jak vuk vukŋa kiyo, kal vunuŋ a suu taŋ fok Lona zakgi, kay Lona ha ni kolo huulona, aŋ ki ni kaŋga kay ndaŋgara may. Kay ndaɗta aŋ ka zul boy ma yowra cocoɗi.

² Sunda kalaɗ cocora, mbaaraŋ doy dlara zeɗ zeɗta kaŋ may. Boy ma zulum cocona hin bay kal ma cona dukgi.

³ Lini aŋ vi vunuŋ kay dla taa fok Lona wa ni juɓ ta ta bay laɗ kiɗi. Kay sa ma ka wi dlaɗina sa ka wam hahawambi, vi vun ma aŋ vamma ni lam kiyo.

⁴ Jivira ni aŋ kak bay vi vunuŋ kay vaa, su mayra aŋ vi vunuŋ kay dlara hin ka li dla ndaɗtaɗira.

⁵ Hin vunuŋ a vaŋ u ɓakŋaɗi. Ka aŋ di maŋ sa vun sunda vi Lona ana, «Boy maŋ namma ka jiviɗi» naɗi. Kay Lona hurum hin ɓeŋ kay boy ma aŋ dam namma, ɓalakaŋ sunda aŋ laɗ u bik koŋga kiyo.

⁶ Boy ma zulum cocona ni ko ndal saara aŋ saa kay tlena bolow zeɗ zeɗta na may, ka jiviɗi, mariyaɗ ni aŋ li ni ndaa Lona.

Saɓak ma kalam ki saɓakina

⁷ Lini aŋ ka wi suu ŋgolo suu kay mbas maŋgana ka las suu wi hawra, li ni ɓakŋa ka kaam u voɗombi lay, ni aŋ kak jim kay boy nammaɗi, kay sa ŋgol ma susina ay kaa, ma ay kasi kolo halaŋŋa ka olo.

⁸ Ko mul ma kak kay mbassana li ni sa ma min baraɗna ɦayna.

Begera ni ɦawaa

⁹ Sa ma min gursura cocona gursu ndaɗta ka ndakambi lay. Sa ma hal ɦiza cocona ka fi va u ndaɗtaɗi lay. Halaŋ cani ŋga tara ɦawaa.

¹⁰ Begera zul koŋ coco wa ni su basaɗna zuli kaɗ ni coco may. Va ma aŋ malaŋ begera hin fam koŋ huna ni mege? Aŋ hin gol ni u iriŋ ɦawaa.

¹¹ Sa ma li sunda buu senna jiviya, li ni nam ti va ŋgol lay, ti ka ŋgolɗi lay ni, boy kaɗi. Na may hoɓ ma vi sa ma ɦizina ka hinim a buu senɗi.

¹² An wi dla cora daŋga ka hu duliyara dew olo. Begera do ki ko malaɗna doy holla kammi a dla cora.

¹³ Bege ndaɗta bas ki ni fun dla cora. Lini nam vuɗ ni go njuf lay, go namma hin ka ki ni va ka kombi.

¹⁴ Nam hin ka ki ni ko nam kal ay ki huu sumba na siliya, nam hin holoŋŋi ko nam mbayra na may. Va ma nam fam kay sun mamba kaɗi, ka tli va kombi lay.

¹⁵ Ndaɗta ni boy ma cona olo, a nam gi tam ɦawa na ka tli va kombi lay. Na ni nam hin loɓ tam ki a li sunda ni hin fi me kom hu nige? Halaŋ ca ni jak ki ni duk semeɗna.

¹⁶ Nam daɓ buu mamma kay ndaŋgara ni duk ndufunda. Nam ka yoo tam tew tew, tuguɗira lay, kakŋi u yara lay.

¹⁷ Va ma an fam irin jivina ni ko ndal wanda na, jivira ni sana ti may, ci may, juk loɓ sun mamba nam laɗta funum nde kay ndaŋgara tani. Hu buu ma bolow ma Lona ɦamma kay ndaŋgara tanina kay ni ii ɓorow mam ma nam famma gaw.

¹⁸ Lini Lona ɦal ɦiza maŋ sana, nam ɦam saɓak ma ti u bege mam ndaɗtana may. Nam fi keŋ mamma kay loɓom ma nam loɓma may, ni nam furiya. Li wa na ni ɦalla vi Lonara.

¹⁹ Sa namma maa dla mayra ana buu mamma ka ŋgol hu duliyaraɗina kiyo, kay Lona oyom hurum ki u furira.