DI BOLLA 4 - Boy Lonana

Lassa u bay ɗegeera

¹ Olo ni an ka wi suuna lassa. Suu ndarayasina lasasi ga duk ndaŋgara tanina. Gola suu ka las asina tii cocoo, sa ma ɗilisi irisi kaɗi lay. Saɓakŋa ki ni u suu ka lasasina na ɗow. Sa ma ɗilisi irisi kaɗi.

² An may ni saa ni ana suu miɗ ki day dayna furi ni su suu ka iiri cemi wanna.

³ Sa ma bay vuɗ ki tuna furi susi mba' bel, kay nam wi sunda cora ga kay ndaŋgara wandara kaɗi.

⁴ An wi suuna loɓ tasi coco kay sun masira gegelay hal ni ana nam fi su ndaramma, halaŋ ca ni ŋga tara ɦawaa, hin jak ki ni u semeɗna.

⁵ Sa ma giniŋŋa ɗuɗ kom hurumu, min li sunɗi, mayra hin cam ki may.

⁶ Jivira ni sa ma li sunda nde hin koɗ tam nde mayna, su sa ma li sunda na gak gak koɗ ta kaɗina, namma jak ki ni u semeɗna ɦawaa.

⁷ An wi sunda ŋga tara ko ndaɗta nara kay ndaŋgara hu dew olo.

⁸ Sana vay dam na dew daŋ, wayam kaɗi lay, goorom kaɗi lay, nam li sunda wanni koɗ ta kaɗi, bege ka ndakambi lay, ka joɓ tam ana tle asina an lasi na ni maŋ gegeraɗi lay. Halaŋ ca ni ŋga tara, hin jak ki ni u semeɗna.

⁹ Suu mbana ni saɓak su sa ma dewna kay fiisina ni ŋgol su sunda vi sa ma dewna.

¹⁰ Suu mbana maa puk kaŋga wa ni ndaramma hin colom koloo, hahawra ni kay sa ma vay dam dewna, lini nam puk gawa ni ndaram ma colom kolo kaɗi.

¹¹ Ni na lay, suu buuri eg tasi mbana tasi cikiya, sa ma buuri vaydam dewna tam ka cikgi.

¹² Suu mbana ndak a col eŋ fun yara su sa ma vaydam dewna. Zew keremba dogira ka jal na zakgi.

¹³ Goozoŋ ma va ka kombi ma yalna ni jivi su mul ma ki maa lay ka hum gaɗta vi saɗina.

¹⁴ Ko goozoŋ namma kal ay ki hu daŋgayna kak a mulna, lini nam ay jew ni sa ma saa vunum kolo ɦawa hu mul mambana lay.

¹⁵ An wi duk suu iiri suu ga u faɗta wanna na ni, gogoona varak a mulna wa na ni, asi cuk tasi kay cerem cocoo.

¹⁶ Nam kak mulla kay suu bolow cocona, vam na lay ni suu vuɗ ka ŋgorom daganna ka furi kay dlambaɗi. Halaŋ ca ni ŋga tara ɦawaa, hin jak ki ni u semeɗna.

Zul boyna saɓaki coco fok Lonaɗi

¹⁷ Hu li ma aŋ tuɗ hu ziŋ Lonara ni gol seŋ ma tuɗta jiviya. Ҥuɗ taŋ ha ni a hum dlara na ɗow, ka ni a li ɓivun ma ŋgalam kina ma um kaɗinaɗi kay asi ka wi cora asi laɗtaɗi.