DI BOLLA 2 - Boy Lonana

¹ An hin ɓak tan hurun ana, «Goloygi jiv iiri maygira ga tani wandara.» Gola ni ŋga tara ɦawaa.

² An di ana «Sanda ni laɓara ɦawaa, furira lay ni va ka egeɗɗi.»

³ An ɦal tan ana an gol jivi ci summa ki tuwa. An min a li ko suu puluɗina na, a wi dlara suu warna ka laɗ jivi kay ndaŋgara tani wandara. May ni an min gol tan jivi tew tew ka hin a tliwin su kanɗi.

⁴ An li sunda ŋgolora cocoo, pi sene gugutluna, min zigini suu ŋgolona ɦay lay.

⁵ An vi senena, pi ŋgusugina, an pi njaf ŋgusugi suu tira na zeɗ zeɗ lay.

⁶ An gi zulla vo mbona a yorokom u ŋgusugi man suu gori asina lay.

⁷ An gus mborɓogi njufiina u boyogina. An cuk yoorina vo cocoo. Suu gorina u suu ŋgolona lay. Tlegeyen su ki kay muli suu kak fokon jew hu Yerusalemma halaŋ halaŋ.

⁸ An fi gursura u gi lorra cocoo. Begera vi mulinara ura vi mbassa daŋga zeɗ zeɗta. Suu wi soolla ɦayna njufiina u boyogina vo varan cocoo. Furira vi suu warnara halaŋ ki varanu, boyogi suu jivi cocona ki toki ni varanu.

⁹ An mbuɗ ni sa ŋgolna, mbuɗ ɦizi su muli suu lak ay fokon hu Yerusalemma bel bel. Yal manna tuɗ ha ni fok na ɗow ɗow.

¹⁰ Tlesuu suuna joɓon kasina halaŋ an li co ka maŋ saɗi. Buuna halaŋŋi an ka u furira tew tew kay hurun furi kay sun manda cocoo. Mbuɗ ni a warak ma an fam kay loɓonna.

¹¹ An hoŋ irin gol sunda an laɗ u bik kon ndaɗta u loɓ ma an loɓ tan kay a li sun ndaɗtana na ni, tle asina halaŋŋi ɦawaa, jak ki ni u semeɗna ɦawaa. Tlesuu lasi ga kay ndaŋgara ii faɗta wanna ni va ka huɗi.

¹² An saa kay yalna u puluɗta u dafaɗta, na ni mul ma hin a varak ka balam mulnana hin li ni sun mege? Kay ni tlesuu asi lasi ka ki fokom jewna.

¹³ Gola ni dlara an waɗta, yalna su laɓara, ko ndal kiɗikka su kay ndufundara na may.

¹⁴ Sa ma yalna irim wi dlara ha fokomba ki halaŋ, may sa ma laɓana tuɗ ni duk ndufunda. Na may an wi ki ana dlara hin fasira fasi ni fun tasi dew ma su ndaram kaɗi.

¹⁵ An hin ɓak tan hurun kurufu ana, dlara li sa ma giniŋŋa hin lan an ni na lay. An hin li a sa ma wi dlara ni kay mege? An hin ɓak tan ana halaŋ ca ni ŋga tara ɦawaa.

¹⁶ Kay sa ma wi dlara u ma giniŋŋa va ma hin ka balamasi kaɗi. Hu buu ma ha fokŋa suuna hin maarasi dlasi ki ni halaŋ. Na ni mege? Sa ma wi dlara miɗ ni ko sa ma giniŋŋa na lay.

¹⁷ Kay ndaɗta kak ma kak iirina ka irin jiviɗi, kay tle may suu suu warna lasi kay ndaŋgara wanna ka irin jiviɗi. Asi halaŋŋi ɦawaa, hin jak ki ni u semeɗna.

¹⁸ Sunda an laɗ kay ndaŋgara wanda halaŋ ka irin jiviɗi. An hin hiniɗ ka ki ni maŋ sa ma hin varak ka balamanna.

¹⁹ Lini nam sa ma wi dla kala ma giniŋ kala ni, sa ka wiɗi. Nam hin mbuɗ ni malaŋ sunda an laɗ wandara halaŋ. Sunda an laɗ u yal man ma ga kay ndaŋgara u faɗta tanina. Halaŋ ca ni ŋga tara ɦawaa.

²⁰ Kay ndaɗta sun manda an laɗ kay ndaŋgara wandara sooron tan ki ni soori na ɗow.

²¹ Gola sana li sun mamba u yalna, mbeleŋŋa u wira. Nam laɗ ki ni maŋ sa ma loɓ tam ka kaɗɗina. Halaŋ ca ni ŋga tara, loɓ taŋ ki ŋgolla na ni ɦawaa.

²² Na ɗaŋŋi va ma sana fam kom hu sunda nam laɗ loɓ tam coco kay ndaŋgara ga tani wanda ni mege?

²³ Buu mamma kay ndaŋgara bel ni u lassa. Sunda nam laɗta loɓmi tam ɦawaa. Njeŋge lay ni tam ka koɗɗi lay. Halaŋ ca ni ŋga tara ɦawaa.

²⁴ Va ma daŋ ma jivi kay sana hu duliyara ni kaɗi. Ni kay a ti may, ci may, wi jiv sun mamba nam laɗta. An wi ana, halaŋ ca ni col ay ni hu duk ko Lona dew.

²⁵ Kay sa ma ndak a ti may, furi may bay Lona ni kaɗi.

²⁶ Na ɗaŋ may Lona va ma sana minimma ni nam ɦamma, yalna, wira u furira. Na may sa ma li dla cora nam tinim a tok yam tlena, nam hin ɦasi ki maŋ sa ma nam minimma. Ndaɗta halaŋ ca ni ŋga tara, hin jak ki ni u semeɗna.