DI BOLLA 12 - Boy Lonana

¹ Humuŋ gaŋ kay sa ma laŋŋa. Hu li ma aŋ ay u zoŋ taŋŋa, hu buu ma dlara co faŋ ka tuɗina. Hu li ma basara cora mbay kay aŋ mbuɗ di ana, «May dla ka kan oloɗi.»

² Jew buu ma kiɗik faɗta u tilna u gi ciciwra bay duk tuna, mbo lona ka si oloɗi mayna.

³ Hu buu ma sa ma juɓ u zina mbuɗ dlak ndaana, suu saɓak cocona yasi hom ay gaa, suu luɗna seŋ tasiya kay ka bolow oloɗi, ca ka gol iriɗ ay ki hu ii zira oloɗi layra na.

⁴ Humuŋ ka hum sool hu ɦoŋzina oloɗi lay. Aŋ ka hum ɦinira luɗna luɗ oloɗi lay, ka hum sool gi oloɗi lay. Del layagi suu pii kolona hin dliɗiŋ ki ni asiya.

⁵ Suuna mbuɗ li ndaana ko li ma mbuy kolona, li ndaana a tuɗ hu voɗ ndaɗtara lay. Gu amandana ɓo may ni, baa jeena cuk ay ki coco may. Gu ŋgekŋa li oloɗi lay. Sana tuɗ ni hu ziim ma din dinna. Suuna tiirim ha ki hu voɗta na zeɗ zeɗ halaŋ.

⁶ Zew doonora buɗ kiyo, zi lorra to ki may. Gegel ma go yona to ki fun goloŋga may. Motta sel yona seɗ kus ki may.

⁷ Ndaŋgara hoŋ duk ndaraɗ ndaŋgara ndaɗ col ay hura, ŋgussa hoŋ eg Lona ma ɦaɗ ayna may.

⁸ Tlegena halaŋŋi ɦawaa, megelay ni ɦawaa. Sa ma Di Bolla di na.

Boy ma daɓ daganna

⁹ Sa Di Bolla ni sa ma wi dlara cocona. Kay ndaɗta nam tuɗ fok u haɗ dlara maŋ suuna. Nam tuk dlara, haɗaɗu, di dlara u ndal boyna zeɗ zeɗ cocoo.

¹⁰ Sa Di Bolla so tam coco a di boy ma jivina. Boy namma sokom halaŋ ka ɓiiri ga tani. Halaŋŋi boy ma gasina.

¹¹ Boy ma vi sa ma wi dlara ni ko ndal gu ma vunum feɗi ma dik u mbutlina na. Suu ɓii dla ndaɗtana ni ko ndal pondi ma ɓali eg tlenana na. Lona malay ma goloyna ɦal dla ndaɗta ay ni namu.

¹² Goonna, gol taŋ jiviya, cuk va kayam cocoɗi. Ndum magaara a ɓiiriɗta ka ki ŋgaayɗi. May ni ɦalla ɦal taŋ a haɗ magaara cocora loɓoŋ ki cocoo.

¹³ Gola ni vunun ma ndi gana. Va ma sa warna a lamma ni nam hum u Lona, li u gaɗ mamba may.

¹⁴ Sunda ay laɗta halaŋŋi Lona hin joɓ ki kaɗ dew dew bel. Ta ŋgayra halaŋ, lini ndaɗ jivi lay, co lay.