DI BOLLA 11 - Boy Lonana

Dlara sa ma wi dlara a laɗta

¹ Ҥal bege maŋga ha ki maŋ suu ŋgoo mbonana. Dagan buuna ŋgol nde ni aŋ hin faɗ olo.

² Ɓorow bege maŋga duk u suu kiɗisiya kala, kalavandi kala, kay aŋ ka wi dla cora hin a mbay fokkaɗi.

³ Hu li ma Lona tin wa ni nam si mbona. Lini ŋgus ŋgolna bow kaŋga ni mbayaw ɗowba daliya ni li ma nam bow huna nam hin gi ni huwa.

⁴ Sa ma gi saŋ lona ki ana lina bay ndak tuwana ka hin a feɗ waɗi may.

⁵ Aŋ ka wi li ma semeɗna col ay hunaɗi. Ko ndal aŋ ka wi yal ma gogoona wul ay kurufu huu sumbaɗira na may. Ni na may aŋ ka ndak a wi sunda Lona laɗtaɗi.

⁶ Maɗiira ni aŋ zaa wana hu sene maŋŋa. Fiɗigira ni aŋ ɗuɗ koŋ huruŋ ɦawaɗi. Kay aŋ ka wi ki ana ma hin li ki jivina ni maanageraɗi, ɗowba asi ndak a li ki jivi jak lay.

⁷ Kiɗikka faalira jivi cocoo. Faɗta day ay ki na ni gol jivi cocoo.

⁸ Sana ndak a furi kay basara nam laɗ hu duliyara wanda. May ni humum mba gam ana buu ma yoora ni bolow cocoo. Dla ndaɗta halaŋŋi ŋga tara ɦawaa.

Gaɗta maŋ gorzoŋina

⁹ Aŋ goozoŋŋa furi kay zoŋ maŋga. Huruŋ furi coco hu li ma aŋ bay mbuɗ maa tuna. Aŋ li ni dlara huruŋ miniɗ ta iriŋ jivira. Na may aŋ mba wi ki ana tle asina halaŋŋi Lona hin kaaŋ ɓakŋa kaŋu.

¹⁰ Hin dlara yoo tara a kal huruŋgi, ɦuɗ lassa ha ki egeŋ na day. Kay zoŋga u tlimiɗ yamba warra ka buu ta taɗi, ni ŋga tara ɦawaa.