DI BOLLA 10 - Boy Lonana

Giniŋga ba sana kiyo

¹ Lolo ma miɗ duk mbulna hu guurana bu mbulna kiyo. Giniŋga ew daŋga ɓalak yalna ki ŋgolo.

² Saara vi sa ma wi dlara tuɗ ni hu keŋ ma jivina. May saara vi sa ma giniŋŋa hoŋ ki ni gulura na ɗow.

³ Lini hu voɗta a tuɗta lay ni sa ma giniŋŋa tuɗ ki ni cora na ɗow. Suuna halaŋ wi ki ni na gaw ana sana wanni ka wi dlaɗi.

⁴ Lini mul maŋŋa hurum ɓeŋ egeŋ lay ni aŋ noy sun maŋga ki gawɗi. Kay yal ma aŋ ka bu kolo u dlara na zakgina ni heɓ huu ma yara ki cocoo.

⁵ An wi dlara ci wayra hu duliyara dew olo ni, suu ŋgolona dlara ndak a viɗisi lay.

⁶ Sa ma ka wi dlaɗina hin fi ni sunda ha ki kolo fok na dayra ma wi dlara hin zaŋ fini sunda ga u tokka may.

⁷ An wi mborɓiina ki fuli kolo kay kulumina, goryoŋ mulinana tuɗ ga u sesi ko ndal mborɓiina na may.

⁸ Sa ma vek zullana hin ndi hu zul ndaɗta tok, sa ma hoo ta gulumunna guyra hin eɗemu.

⁹ Sa ma to gogoyra, goy ndaɗta dagam tok. Sa ma wak guna hal kammi sunda loɓma ta fi dagka hura.

¹⁰ Lini sii njetna ka ki guuri jiviɗi ni aŋ ka u nammi u saɓakaŋu. Aŋ a gijaŋ sunda ni saa ki kam jew jiviya.

¹¹ Lini guyra eɗ sana ki jew bay lam kumuna wa ni, sa ma li kumuna ka ndak a li va oloɗi.

Zul njaɗta saɓaki cocoɗi

¹² Boy ma sa ma wi dlara damma ii suuna jiviya. Na may vun suu ka wi dlaɗina lik boy namma ki may.

¹³ Gijaŋ boy mamma ni u puluɗta, daɓ boy mamma ki ni u njaɗta laɓara ɦawaa.

¹⁴ Sa ma ka wi vaɗina zul njaɗta fiyek cocoo. Sana ka wi dlara a mbay fokkaɗi. Sa ma hin takam dlara hin li ka ŋgorom daganda kina ni gege?

¹⁵ Sa ma ka wi dlaɗina loɓ tam a li sunda cocoo, ka fi va ŋgolɗi lay. Nam ka wi voɗta a tuɗ ay ki koy hu ɦoŋzi ŋgolnaɗi lay.

¹⁶ Mbas mayra mul ma kaɗna goozoŋŋara wi haw cocoo, goryoŋ mulnana lakira ni kay sum ma cira doy na ca.

¹⁷ Furira ka kay mbassa mul ma kaɗna irim ki neeyra. Goryoŋ mulnana ti tiisina ni u voɗomu. Asi ni ka kay tina u cina hawaɗi.

¹⁸ Sa ma zolomba yam ziimba cuɗ tew tew. Nam a malaɗta ni yona cuɗ um kalafiya.

¹⁹ Ti ma jivi ma tinim fokoy na ɦikŋa furi huuna. Sum ma camma mbuɗ sana ay coco may. Tle asina jak ca ni fasi ni u gursura.

²⁰ Ŋgul mulna kaŋga gugum u huruŋgi. Yi oora kay sa ma ɦizina kalafi hu liiŋ ma buunaɗi. Kay layagi suu pii kolona tuɗum boy namma ha kiyo. Tlesuu garaŋga usina tuɗ dam dlara aŋ daɗta ha ki halaŋ.