DI BOLLA 1 - Boy Lonana

Tlena halaŋŋi ɦawaa

¹ Boyna vi Sa Ma Di Bolla, goŋ Davidna, mul ma Yerusalemma.

² Ҥawaa, tlena halaŋŋi ɦawaa, Sa ma Di Bolla di na.

³ Va ma sana hin fam kom u sunda, nam loɓ tam kay ndaŋgara coco wanna ni mege?

⁴ Njaf suu daŋ jak kiyo, ma daŋ varaka, ndaŋgara ka ni u taɗta ndaɗta gak gak.

⁵ Faɗta day aya, hin ndi kaŋgaa. Ndaɗ ɓaɗ taɗ zak zak a hoŋ hu li ma ndaɗ day ay huna.

⁶ Semeɗna tuɗ irim daliya, hin hoŋ mbayawi, semeɗna bi wa, bi wa, hin tuɗa. Semeɗna hin hoŋ ay hu li ma nam col ay huna olo.

⁷ Mbo lumma halaŋ ɓaɗ ni hu mbo lum ŋgolna. Nam lum ŋgolna ka oyɗi lay. Li ma mbo lumma ɓaɗ ay huna hin hoŋ ki kay sem olo olo.

⁸ Tlena halaŋ las masira ni zeɗ zeɗ. Iira ka loɓ ko gollaɗi, humba ka loɓ ko humbaɗi lay.

⁹ Va ma li ay ki fok jew dayna ni va hin nda li vinna tok. Va ma ka li ay ki fok jewna ni ma hin nda li ha fokŋa tok. Kaŋga ga ii faɗta tani va ma wili kaɗi.

¹⁰ Va ma suuna ka ɓak kam ana, «Va namma wanni mba ni wiliya na». Doli ni va ma li ay ki fok hu basara jak kirana tok.

¹¹ Dlara li ay ki ii somoyoygi suu jewna dayra sa ka waɗɗi. Na may dlara ay laɗ cemi wanda gor ŋgologi may suu hin varak ka daganna. Sa ka hin waɗɗi may.

Salomon di ki kay iiri mamba

¹² An, Sa ma Di Bolla, an kak ay a mulna kay suu Israelna hu Yerusalem.

¹³ An u yal manna hal ana an min a wi dlara ga hu duliyara u huulonara ki na bel bel. An wi ki kan ana Lona ɦal kay goryoŋ Adamma ni li ma loɓma ɦawaa.

¹⁴ An wi sunda li ga ii faɗta wanda halaŋga ni ɦawaa, jak ki ni u semeɗna.

¹⁵ Va gunina sa ka ndak a ɗoɓom ki oloɗi. Va ma ba kina sa ka ndumum oloɗi lay.

¹⁶ An ɓak tan hurun ana, «Gola an haɗ yal dlara ŋgol cocoo, suu ki kay muli suu kak ay fokon jew kay suu Israelna hu Yerusalem halaŋ halaŋ». An tuk yal ma daŋŋa ki zeɗ zeɗ cocoo.

¹⁷ An saa hurun ana an a do u yalna u wira ki may, do u laɓara u puluɗta ki may. Lay ni an hin wi ki ana halaŋ cani jak ki ni u semeɗna ɦawaa.

¹⁸ Kay ana aŋ wi yal dlara ki wa ŋgol cocoo ni, lassa u dlara yoora mba kaŋŋi ŋgol coco may. Sa ma zul u wiimba ŋgol cocona, zul kammi wihawra ŋgol coco may.