DANYEL 9 - Boy Lonana

Cenda vi Danyel, Bu Suuna, ɦan gira

¹ Hu basara dewra vi Dariyus, goona vi Asuerus, hu njafna vi Medena, ma tinim mulna kay mulla vi suu Kaldeenna,

² hu basaɗamba dewra a mulna, an Danyel hal ndum basara hu magaara ko boyna vi Yawe di sa jok vun lona Jeremiera a faɗ u ɓeŋga vi Yerusalemba basara dok kiɗisiyara na.

³ An pereɗ irin ay eg Bu Suuna Lona, tii tan fokomu, cenemu, li laara, cuk buɗna kanu, cuk baraw bolla egenu.

⁴ An cen Yawe, Loonna, hin di coonda fokom ana, Aa! Bu Suuna, aŋ Lo ma ŋgolna, ma suuna liŋiŋ ndaaraŋŋa, mavi banara u suuna u ɗegeerana kay suu ka miniŋ may, li ugaɗ maŋga mayna.

⁵ Ami li suluku, ami li cora, ami mbuɗ ki suu cona, suu duu u Lona, ami noyoŋ gaɗ maŋga ki lay.

⁶ Ami hum vun suu sun maŋsina suu jokoŋ vunuŋ kina kaɗi, suu ɓak boyna u seŋ maŋ muli mamisinana, maŋ goryoŋ muli mamisinana, maŋ somoyomiya, maŋ suu kay yam mbassana halaŋ.

⁷ Ɗegeera ni maŋ aŋ Bu Suunara, zolona ka kami hu buu namma, kay suu hu Yudana, suu hu Yerusalemma, kay suu Israelna halaŋ, suu tokŋa u suu ha ki dayna lay, kay yam mbassa halaŋ hu li ma aŋ dikisi ha ki kay cora asi laɗ egeŋga.

⁸ Yawe zolona ka kamiya, ka kay muli mamisina, kay goryoŋ muli mamisinana, kay somoyomi lay kay ana ami li sulukŋa egeŋu.

⁹ Aŋ Bu Suuna, Loomina, oora u bulum cora ni maŋsina, kay ana ami li yara egeŋu,

¹⁰ ami hum del Yawe, Loomina, ka a tuɗ u gaɗ mambaɗi, ta nam ɦamira ay ko suu duk ɦoŋga suu jokom vunumma.

¹¹ Israel halaŋ calaɗ kay gaɗta, mbuɗ irisi kiyo humuŋ deleŋ kaɗi. Na ɗaŋŋi, dla cora ɓiiri hu magaara gaɗta vi Moiz, sa sunda vi Lonana, ndi kamiya, kay ana ami li cora egeŋu.

¹² Lona li ki ni dlara nam ɓakaɗ ki kamira, kay suu ti mulla kamina, hoŋomi dla cora ŋgolla ay kamiya, dla ndaɗta ka bay li hu li ma daŋ kay yam mbassa ko ndaɗ li hu Yerusalemba na tuwa.

¹³ Ko ki ɓiirira hu magaara gaɗta vi Moizza na, dla co ndaɗta halaŋ mba kamiya, may ami heɓ huu Yawe, Loomina, ka u hinda hin coomira kiraɗi, a li ka kira na en hu ɗegee mambaɗi.

¹⁴ Yawe vi dla co ndaɗta komu, hin mbaaraɗ ay kamiya, kay Yawe, Loomina, nam ɗegee hu dlaamba nam laɗta bel, may ami humum delem kaɗi.

¹⁵ Cecem wanda Bu Suuna, Loomina, aŋ ma sel suu maŋsina ay ki hu mbassa Egiptera u koŋ ma saɓakŋa, ma seŋ fi ŋgara um ko aŋ karam gak ka wanda nana, ami ay jew ni suu sulukŋa, suu cona.

¹⁶ Bu Suuna, u sun maŋga ɗegeera, ko yaaŋga u huruŋ ma zalina li kay Yerusalem ziiŋŋa, ɦini maŋga teteɗtaɗi ni kay suluk mamina u cora vi somoyomira, Yerusalem u suu maŋsina mbuɗ ni va ma ŋgulla maŋ suu ŋguy kamina halaŋ.

¹⁷ Cecem wanda ɗaŋŋi, aŋ, Loomina, hum cenda vi saaŋ ma sunda u yoo taamba haa. Gol liiŋ ma teteɗ ma asi ɓeŋem ki kay seŋ aŋ, Bu Suunana.

¹⁸ Aŋ, Loonna, tin humuŋ humun haa. Mal iriŋ ki golomi ɓeŋ mamira u ɦoŋzi ma seŋ ka yi hurum tewtewna, ka ni kay sun mamira ɗegeera ami tiniŋ yoo mamira fokoŋŋi naɗi, ni kay oo maŋga ŋgolla.

¹⁹ Bu Suuna, hum haa, Bu Suuna, ɦami gira, Bu Suuna, min taŋu li dlaaŋga, juɓbi, ni kaŋ aŋ taŋga Loonna, kay ana seŋ ka yi hu ɦoŋziiŋŋa kay suu maŋŋa.

Gabriel u cokira dok kiɗisiyara

²⁰ An ɓak tu may, cena hom coonda ki may, cora vi suu Israelna may, tin yoo manda fok Yawe, Lo manna, kay sem ɦinira teteɗta vi Loonnara.

²¹ An ɓak tu hu cenda may ni Gabriel sa ma an wam ay jew hu dlara tak taɗ irinda ay piira na zak zakŋi ɦuɗ tam ay egen hu lerra ma li ɓivun ma fiɗigina.

²² Nam haɗan dan ana, «Danyel cecem wanda an kal ay ki ni mba ɦaŋ yalna.

²³ Hu gijaŋ yoo taaŋga wanni boy maa ndi ki duk dew, an mbay ni a daŋ boy namma, kay aŋŋi sa ma Lona ŋgaɓam ay ki jewna. Hum u boyna jiviya, ko yal ma wi u dlara li kaŋu.

²⁴ Asi ŋga cokira na dok kiɗisiya kay suu maŋsina u ɦoŋziiŋ ma teteɗna a heɓ cora kira, a daɓ sulukŋa kira, a gi ii dla cora, a mba ɗegeera fafaɗta ayra, a gi u dlara tak taɗ ii suunara u dlara suu vovoɗta ɓakaɗta kiyo, a vo mbulna kay sa ma teteɗ ma vi suu teteɗnana.

²⁵ «Wi dla ndaɗta ki jivi saa kaɗ ɗaŋ, ay hu li ma boyna di ay ki kay a hoŋ Yerusalem mindara ta ta tew kay mul maɗnara ni, cokira hin li na kiɗisiya, cokira dok kiɗisiya, dok kiɗisiya. Hu cokira dok karkiya yam mbara lina u zulla ŋgolla hin tos ki ni hu yoo tara.

²⁶ Ŋgoo dagan cokira dok karkiya yam mbara, sa ma fuurina hin cam kiyo, may ka ni kay tambaɗi. Kay ɦoŋzina u li ma teteɗ ma ɓivunna, suu vi mul ma ka mbayna hin ɓeŋem kiyo, daɓ mamba hin mbay ni ko babaana na, ta ta daɓpa vi duuna ni hin di boyna kay ɓeŋ mamba.

²⁷ Nam hin vi banara u suuna bolowo u eŋga ii cokira dew, duk coki ndaɗta, nam hin doo suuna a li ɓivunna, sa ma ɓeŋ lina hin mbaya, dla ndaɗta hin li na gakgak hu buu ma daɓpa vi sa ma ɓeŋ lina.»