DANYEL 8 - Boy Lonana

Dlara Danyel waɗ a mbarara, gamlana u ŋgekŋa

¹ Baltazar basaɗam ki hu mulla hindi, tlena tak tasi irin an Danyel ŋgoo dagan tlesuu tak tasi irin jewna.

² An gol irin ha duk tlena wan ɗaŋŋi tli irinu ni an ki hu ɦoŋzi ma Suzna hu mbassa Elamba. An gol irin duk tlena nian ki kaki vun lum ma Ulaina.

³ An tli irin kolo gol lina na ni gamlana ka coli fun lumma col. Mekka kam mba'. Mekemba mba' ndaɗta fiyeki cocoo, taa fiyek su ndaraɗta dew, mayra fiyek su ndaraɗtara wul ni ŋgoo dagani.

⁴ An wi gamlana waɗ ko ma fiɗigina, waɗ ko ma mbayawna, waɗ ko ma dalina, mbuu ka col fokom dewɗi lay, sa ka buɗ ki ko saɓakambi. Nam li ni u min mamba, wul lay.

⁵ An kaki saa kay dla ndaɗta na ni, ŋgekŋa col ay ko ma fiɗigina, liŋ ay kay yam ndaŋgara halaŋ halaŋ bay ŋgen ndaŋgara. Ŋgek namma mekka dayra ki duk ɦoŋ irimu.

⁶ Nam mbay tew eg gamla ma mekka kam mba' ma an wam coli fun lummana, nam liŋ ha kam u saɓakam halaŋ.

⁷ An wam nam tew ha eg gamlana na tok, nam guruɗ ki egem gaw. Nam daɓ gamlana kusum mekem u dlaɗta mbara kiyo, gamlana saɓakam ka a col fokom oloɗi. Nam gam kaŋga duk ndaŋgara tayam u semu, sa ka a buɗ gamlana ki kombi lay.

⁸ Ŋgek namma wuli ŋgolla cocoo, may hu li ma nam li dlara u saɓakam cocona, mekemba ŋgolla kus kiyo, balamaɗ wanni mekka daŋga fiɗi wul olo ko ndal semeɗ ma keŋ lina fiɗi huulonana.

⁹ Goo mek taa na ew day ay ki eg mek taa dukusi dew wul ki ŋgol cocoo. Kolo duk na, daliya u maɗiina hu mbas mayra jivi cocora.

¹⁰ Ndaɗ wul ta ta tew kolo eg suu sunda huulona. Ndaɗ cuk suu sunda suu ɦiw ay ki kaŋgaa, ciciwra ndaɗ tayaɗ ki kaŋga u seɗ may.

¹¹ Ndaɗ wul ta ta tew eg mul ma vi suu sunda huulonana, tlam ɓivun ma asi lamma tew tewna kiyo, toom u ziimba kaŋga giira kiyo.

¹² Yow suu sunda ki lay, ɓivun mamma ki u dlaaɗta cora. Mekka zuɗ gasira ay ki kaŋgaa, tlesuu ndaɗ lasina halaŋ li koɗ jiviya.

¹³ An hum del sa sunda ɓaka. Sa sunda di sa ma ɓakŋa ana, «Ni saɓa ga dlara vi ɓivun ma tew tewna u cora ɓeŋ tlena kira, zi ma ki ɓeŋina u suu sunda suu tayi kaŋga u semmana hin daɓ ki ni ge?»

¹⁴ Nam dan ana, «Ta ta buuna maɗiira u fiɗigira buɓ buɓ mba duk kis kis hindi ɗaŋŋi ziim ma ɓivunna hin hoŋ ki balamam u voɗomu.»

Dlara Danyel waɗ a mbarara buɗuɗ uɗ kiyo

¹⁵ Doli ɗaŋŋi an, Danyel, ka gol irin duk tlesuu an ka wasina, ka hal a humusi usi ki may ni, vana mba col fokon ko sana na.

¹⁶ Ɗaŋŋi an hum del sana ɓak ay duk Ulai yi ay kolo di ana, «Gabriel tak u tle asina ki maŋ sa namma.»

¹⁷ Nam ɦuɗ tam ay eg li ma an ka coli huna na tok, hu li ma nam tuɗ ay egen na an mbuɗ ki ndaana puk kaŋga u vun dikinu. Nam dan ana, «Hum haa goŋ sanana, tlena tak ki ni kay li ma daɓ daganna.»

¹⁸ Hu li ma nam ɓakan na ni an puk kaŋga u vun dikin ki cii liŋrira. Nam ŋgenenu hin colon kolo hu li ma an li ay huna.

¹⁹ Nam hin di olo ana, «An hin takaŋ dla mayra hin mbay u yarara, kay ana buu ma daɓpa ay ki ŋgaya.

²⁰ Gamla ma u mekka kam mba' ma aŋ wamma, ni muli suuMedena u Persena.

²¹ Ŋgekŋa ni mulla Gressa. Mekka ŋgolla day duk ɦoŋ irimba ni mul ma jewna.

²² Asi kusuɗ ki kus ni, mek mayra wul balamaɗ fiɗira, ni muli suu fiɗi suu hin wul hu njaf nammana, ka li u saɓak maɗnaɗi.

²³ Hu mul masira ni, hu li ma suu Persena gasi u dlaasira cora ki kolo wani, mul ma dlam cona hin kak kasiya.

²⁴ Saɓak mamma hin wul ha fokŋi wuli na ɗow ɗow, may ka ni u saɓakam kay tambi. Nam hin ɓeŋ tlena ki ŋgol cocoo. Dlaamba halaŋ hin li jivi u voɗoɗu. Nam hin ci suu saɓakŋa kiyo, ni ana suu sunda.

²⁵ U yal mamma nam hin ganyam suuna, ndaɗ hin wul hurum u heɓpa cocoo, hin ɓeŋ suuna ki bolow coco lay, nam hin col yara kolo eg mul ma vi mulina na may nam hin toom ki bay ko sa tin egemu.

²⁶ Dlara kay fiɗigira u maɗiirara ni, ko ndaɗ ay ki diira na, ni gasira. Aŋ may ni ŋgay boy namma huruŋu, kay ana boy namma ɓakŋi kay dlara ha fok dayra.»

²⁷ Na ɗaŋŋi an Danyel mbuɗ ki maŋiya, an mbuɗ tuguɗiira buuna bolowo. Olo an col kolo gijaŋ sunda vi mulnara. An mbuɗ ki ndaana ko tlesuu an wasina, sa dew lay ka wi u tle asinaɗi.