DANYEL 7 - Boy Lonana

Dlara Danyel waɗ jewra, mbuuri suu fiɗina

¹ Hu basara jewra vi Baltazar, mul ma Babilonna, Danyel doyra damu, nam wi tlena hu liim ma buuna hu Senna. Na ɗaŋŋi nam ɓii doy ndaɗta kaŋgaa, ay hu gijaŋ maɗna.

² Danyel ɓak boyna di ana, An gol irin hu doyra dan njeŋgera. Gola ni semeɗ ma keŋ lina fiɗi ma huulonana soo ay hu mbo lum ma ŋgolna.

³ Mbuuri suu mbuɗ mbuɗta ki na zeɗ zeɗ fiɗi col ay kolo duk mbo lum ma ŋgol namma.

⁴ Mbuu ma jewna ko dlona na, garaŋam ko ɓarawna na. An gol irin hu li ma asi ka paɗam garaŋam kina, asi tlam ki kolo kay ndaŋgara, colom kay sem mba' ko sana na, ɦam huu sana hurumu.

⁵ Mbuu ma hiŋŋa a mbara olo, ko bosokoonna na, colom kay keŋ maa dew, keŋ li ma hindi wanna vii funum kay siimu, asi ɓakam anaba, «Col koloo, kom tliwna ŋgolo.»

⁶ Ŋgoo dagan wanni an gol irinu, mbuu ma hiŋŋa olo, ko sindilna na, garaŋ layagina kay duk cerem fiɗi, mbuu namma yam fiɗi, asi hin ɦam saɓakŋa komu.

⁷ An gol irin ŋgoo dagan olo hu tlesuu an wasi hu doyra njeŋgena, mbuu ma fiɗina, dlam ti ta cocoo, li ndaana coco lay, saɓak coco lay, sii ma funumma ni kawina, ti tlena, harasi kiyo, tayasi usira hinda ki kaŋga u semu, nam ki zeɗ u mbuuri suu kal ki fokomma, mekka kam doogo.

⁸ An golom mekem ki jivi na ta ta, gola ni duk ɦoŋ mekem wanni mekka goora coliya, mekka jewra hindi paɗ ki fokoɗu. Kay mek ndaɗta ɗaŋŋi iira ka huwa, ko ii sana na, vunuɗ ɓak boy ma mbuɗ mbuɗta may.

Sa ma maana u goŋ sanana

⁹ An gol irin hu li ma dlamba mulla ki tinina, sa ma maana kak kaɗu. Baraw mamma haɓpa ko baraw haɓpa na, tumussa kay yamba ko baraw ma haɓma na, dlam mamba ki u sin kura, gayaɗ ni kura ŋgik ŋgikka.

¹⁰ Mbo kura ɓaɗ sel ay ki fokomu. Suuna buɓ buɓ bulumi li sunda fokomu, suuna buɓ buɓ doogo coli fokomu. Sa kaɓakŋa kak kaŋga mal hu magaara kiyo.

¹¹ An gol irin haa, ko vun ma boy ma mbuɗ mbuɗ ma mekka ɓakamma, an gol irin ha hu li nama ni asi ci mbuuna kiyo, am ki kaŋga pukiya, hinim ki a kura ŋgalamba.

¹² Mbuuri suu hin hiŋŋa may ɗaŋŋi saɓak masina seŋ kiyo, ɦuɗusi buurusi fok ta ta hu buu ma ŋgaamma.

¹³ An gol irin ha hu tlesuu an wasi hu doyra njeŋgena, gola ni ay duk ɗugulla kolo huulonara sana ka mbay ko goŋ sanana na. Nam mba tew ki eg sa ma maana, asi hin ɦuɗumma ay egemu.

¹⁴ Asi hin ɦam saɓakŋa, bibiŋilla u mulla. Suuna halaŋ, njaf suuna u dee vunusi halaŋ sunumu. Saɓak mamma ni saɓak ma a fafaɗta hin ka daɓ kiɗina, mul mamba ni mul mayra hin ka bulum kiɗira.

Dlara Danyel waɗ jewra buɗuɗ uɗ kiyo

¹⁵ Ŋgusun an Danyel mbuɗ yoo taɗ coco hurun kurufuu. Saara kay tlesuu an wasina tan tan lay.

¹⁶ An ɦuɗ tan eg sa maa duk suu colina dew, an joɓom ana, va ma nam wam gasi hu dla ndaɗtana ni mege? Nam dan boy namma, buɗun u tle asina kiyo.

¹⁷ «Kay mbuuri suu mbuɗ mbuɗ suu ndumusi fiɗi asina, mulina fiɗi hin wul kolo kay ndaŋgara.

¹⁸ May suu sunda vi Lo ma Kolo Dayna hin vasi mul masira, asi hin kak ti mulla a fafaɗta ka daɓpi.»

¹⁹ Na ɗaŋŋi an min a wi ki gasi ana mbuu ma fiɗina ni mege, nam ki zeɗ u suu hiŋŋa lay, saɓak cocoo, siim mi kawina, liviɗ kom mi walakka, tiya, pala wa, hin tay u tlesuu hinna kaŋga u semu.

²⁰ Kay dla mek mayra kay yam doogora, olo kay ta hiŋŋa ta wuli kolo, suu hindi hiŋŋa puk kaŋga fokoɗta, mek ndaɗta ira kaɗu, vunuɗ ɓak boy ma mbuɗ mbuɗta, ndaɗ sii ŋgol suu ndarayaɗna.

²¹ An gol irinu, mek ndaɗta duu u suu teteɗna tlasi kaɗ na faŋal

²² ta ta sa ma maana mbay tuwa, ɓakŋa li jivira kay suu teteɗna vi Lo ma Kolo Dayna, lina ka mbaa suu sunda hin ti mulla.

²³ Nam dan ana, «Kay mbuu ma fiɗina ni mulla fiɗira hin mba kay ndaŋgara, ndaɗ hin li ki zeɗ u mulla hiŋŋa halaŋ halaŋ, hin ɓeŋ ndaŋgara kiyo, hin tayaɗ ki kaŋga u seɗu, hin palawaɗ kiyo.

²⁴ Kay mek mayra doogora, hu mul ndaɗta ni mulina hin wul kolo na doogo, ma daŋŋa hin wul ay ŋgorosi dagan olo. Mul namma hin li ki zeɗ u suu jewna, nam hin ci mulina ki hindi.

²⁵ Nam hin ɓak boyna kay Lo ma Kolo Dayna, hin las suu teteɗna vi Lo ma Kolo Dayna, nam hin saa a mbuɗ buu tilna u gaɗta kiyo, hin hinim suu sunda kom ii coki dew, coki mba, ɓorow cokira duk lay.

²⁶ Sa kaɓakŋa hin kak kaŋgaa, saɓak mamma hin heɓ kiyo, bulumum kiyo, viɗim ki a fafaɗta.

²⁷ Kay mulla, saɓakŋa u ŋgolla vi muli suu kaŋga u huulona halaŋŋa ɦasi ki maŋ suu teteɗna vi Lo ma Kolo Dayna, mul mamba ni mulla didinda. Saɓakŋa halaŋ hin sunum may hin hum um may.»

²⁸ Boyna daɓ mi tani. An Danyel may ni saaran mbuɗ yoo cocoo, tliw tan mbuɗ ki boliya, an vi boy namma hurun na gak gak.