DANYEL 6 - Boy Lonana

¹ Dariyus ma Medena tli mulla ni basaɗam dok karkiya yam mba.

Suu babali suu vi Danyelna gunum dawna kaŋga fokomu

² Dariyus gol ana a jivira ni nam tin suu kaɓak suu kis duk dok mbana ki kay suuna ki ɦoŋzina halaŋ halaŋ.

³ Kay suu kaɓak asina nam tin suu ŋgolona kasi hindi, Danyel ni duk suu asina, a asi gasi ii boyna kosiya, ka a mulna dla tam vun dikim oloɗi.

⁴ Doli ɗaŋŋi Danyel namma ni ma ŋgolna vi suu sunda u suu kaɓakŋa kay ana ŋgussa mbuɗ mbuɗta kamu, mulna di ana tinim a ma ŋgolna kasi halaŋ.

⁵ Na ɗaŋŋi suu sunda u suu kaɓakŋa min a li yara u Danyel kay mulla, may ka fi voɗ yaraɗi lay, ka fam co egembi lay, kay ana nam ɗegeere, maa dlara, u cora asi fi taa ka egem na ndeɗi lay.

⁶ Na ɗaŋŋi suu asi di ana, «Aygi hin ka a fi dla eg Danyel nammaɗi, kala li ni aygi ka faygi heɓpa u gaɗta vi Loommaraɗi.»

⁷ Na ɗaŋŋi suu sunda u suu kaɓakŋa tuɗ vi mulna zak gaw ni dam ana, «Mulna Dariyus, kak iiri a fafaɗta.

⁸ Suu sunda vi mulna halaŋ, suu fok suunana u suu kaɓakŋa, suu ɦal gaɗta, suu mulina ɓak duk tasi ana asi ɓii gaɗta vi mulnara a hin doo suuna ura ana, gegelay hu buu ma dok hindina wanni li ni nam cen lo ma daŋ ɗowba sa ma daŋŋi, hiniŋ aŋ kiyo ni, mulna, hin gam ki hu zul dlona.

⁹ Cecem wan daŋga mulna, ami min ana aŋ ɓii gaɗta tin koŋ huwa, ka a sa mbuɗuɗ keŋeɗɗi lay, u gaɗta vi suu Medena u suu Persena, ta sa ka yaɗ u vunumbira.»

¹⁰ Hu li namma mulna Dariyus tin kom kay gaɗta doo suuna u ndaɗta.

Asi gi Danyel hu zul dlona

¹¹ Hu li ma Danyel wi ana mulna tin kom kay gaɗta wa ni, nam kal hu ziimba. Zi ndaɗta iriɗ ŋgaɗira na foloŋ foloŋ a gol lina ki bunsura, hin malaɗ iriɗ ha ni hu li ma Yerusalem ka huna, ndaɗ ni hu zi mayra ŋgolla kay ndaraɗta kolora. Hu buuna tew tew ni nam cuk vok givim kaŋga yam hindi hindi, nam cena, geleɗ Loomma ko nam li jewra na.

¹² Na ɗaŋŋi suu asina mbay toŋgo zak gaw ni fi Danyel ka tii tam fok Loomma ni,

¹³ asi ɦuɗ tasi ha eg mulna dam kay gaɗ mamba ana, «Aŋ tin koŋ ka kay gaɗta ana hu buuna dok hindi wanni gegelay cen lo ma daŋ wa ɗowba sa ma daŋ wani aŋ mulna hin gam ki hu zul dlona?» Mulna ɓak boyna di ana, «Boy namma ni gasi, u gaɗta vi suu Medena u suu Persena ta sa ka yaɗ u vunumbira.»

¹⁴ Na ɗaŋŋi asi ɓak boyna di fok mulna ana, «Danyel ma duk suu yowosi ay hu Yudana, ŋgaaŋ kaɗi mulna, gaɗta aŋ ɓiiriɗ tin koŋ kaɗta lay, hu buuna tew tew ni nam li cen mamba yam hindi hindi.»

¹⁵ Na ɗaŋŋi hu li ma mulna hum boy namma hurum ɓeŋ ki cocoo, nam tin saaram kay Danyel a buɗum kiyo, ta ta fiɗigiya nam hal voɗta a suɗum kiyo.

¹⁶ Suu asina ɗaŋŋi mbay eg mulna zak dam ana, «Hum haa mulna, ni gaɗta vi suu Medena u Persena ana li ni mulna ɓii gaɗta wa ni, sa hin ka mbuɗuɗ ki oloɗi.»

¹⁷ Na ɗaŋŋi mulna ɦal voɗta ana asi mbaam Danyel aya, asi hin gam hu zul dlona. Mulna ɓak boyna di Danyel ana, «Looŋ ma aŋ sunum tew tew u ɦiŋgana hin buɗuŋ kiyo.»

¹⁸ Asi tli gogoyra ay gaɗ fun zulla, mulna tin kom kaɗ u suu mam suu ŋgolona ana ka a dlara daŋ jok kay Danyelɗi.

¹⁹ Na ɗaŋŋi mulna tuɗ hu ziimu, nam jak njeŋgera u saara hin banayam boyogina tuɗ ha ka egembi lay, senna vam kaɗi lay.

Danyel kal ay ki bay va ŋgenem hu zul dlona

²⁰ Na ɗaŋŋi mulna col kolo yoŋgo na colol ŋgarpiira tuɗ ha fun zul dlona na zak gaw.

²¹ Nam ɦuɗ ha fun zulla may ni, yi Danyel kolo u delemba hahawra. Mulna ɓak boyna, di Danyel ana, «Aŋ Danyel, sa sunda huulona vi Lo ma iirina, Looŋ ma aŋ sunum tew tew u ɦiŋgana suɗuŋ ki ko dlona wa su?»

²² Na ɗaŋŋi Danyel ɓak mulna ana, «Aŋ mulna, kak iiri a fafaɗta.

²³ Loonna sun saam ma sunda aya, nam duk vun dlona kiyo, dlona lan va ma co ka egenɗi, kay ana an ay ki jivi fokomu, egeŋ aŋ mulna lay ni an laŋ va ma co kaɗi.»

²⁴ Na ɗaŋŋi mulna furi cocoo. Nam di ana tli Danyel ay ki kolo hu zulla. Asi hin fi mbil ka egembi lay, kay ana nam vi u Loomma.

²⁵ Mulna ɦal voɗta ana yowom suu li yara u Danyelna aya. Asi cukusi hu zul dlona, goryosi lay, boyogosi lay. Asi bay tew kaŋga hu zulla may ni, dlona yowosi palawasi ki ni na gaw.

²⁶ Na ɗaŋŋi mulna Dariyus ɓii maŋ suuna halaŋ, njaf suuna u dee vunusi kay yam ndaŋgara halaŋ, «ko heɓpa li u agi ŋgolo.

²⁷ An ɦal voɗta u dlara an laɗ hu mul mandara halaŋŋi suuna li ndaana u Lo ma vi Danyelna, kay nammi Lo ma iirina, nam ka ni a fafaɗta. Mul mamba hin li ni na gak gak daɓpa vi duliyara.

²⁸ Nam buɗ suuna ki lay, suɗusi ki lay, nam li dlara mbuɗ mbuɗta kolo huulona lay kaŋga kay ndaŋgara lay, kay nam buɗ Danyel ay ki ko dlona.»

²⁹ Danyel may ɗaŋŋi mbuɗ jivi coco hu mulla vi Dariyus u Syrus ma Persena.