DANYEL 5 - Boy Lonana

Ti ma mulna Baltazar lamma

¹ Mulna Baltazar ɦal ti ma ŋgolna maŋ suu sun mamsina asi buɓ, fok suu buɓ asina nam ci sum veŋŋa.

² Hu li ma asi ci sum veŋŋa na ni, Baltazar ɦal voɗta yow doyogi lorra u doonora suu bum, Nabukodonosor, yowosi ay ki hu Ziŋ Lonara ma Yerusalemma aya, mulna u suu ŋgolo mamsina u banayam boyogina u boyogom u boyogi mam suu sunda hin ci ni sum ma hurusina.

³ Na ɗaŋŋi, asi yow doyogi lorra suu asi yowosi ay hu Ziŋ Lonarana, ni ana ay hu zira vi Lonara hu Yerusalem, mulna u suu mam suu ŋgolona, u banayam boyogina u boyogi mam suu sunda ci sum ma hurusina.

⁴ Asi ci sum veŋŋa, asi hin geleɗ loogi lorra u doonora uwalakka, kawina, guna u gogoyra.

⁵ Hu li namma gaw ni ko suuna busuk ay kiyo, asi ɓii fok givin ma kura pay gulumun ma mulla, nam mulna wasi vun kosi ma ɓii tlena namma.

⁶ Na ɗaŋŋi nam mulna mbuɗ ki na zeɗ gaw, saaram viɗ ki lay, sok u furum weles ki lay, vok givim guluɗ ki lay.

⁷ Mulna yi kolo u delem eŋga a yi suu kaɓakŋa ay duku, suu Kaldeenna u suu wi dlara. Mulna ɓak boyna, di suu wi dlara hu Babilonna ana, «Sa ma ndum ɓii ndaɗta ki may, buɗuɗ uɗ ki may na hin fi baraw ma gusum loɓma, hin cukum ɦeɗew doonora delem may, nam hin li ni sa ma ŋgol ma fok suu sunda vi mulnana.»

⁸ Na ɗaŋŋi suu wi dlara mbay halaŋ halaŋ may asi tew ka a ndum ɓii ndaɗtaɗi, buɗuɗ uɗ ka ki maŋ mulnaɗi lay.

⁹ Na ɗaŋŋi mulna Baltazar saara su ki kam cocoo, nam mbuɗ ki na zeɗ, suu ŋgolo mam suu sunda lay viɗ ki na dawlaɗ.

Danyel buɗ u ɓiira mbuɗ mbuɗ ndaɗta kiyo

¹⁰ Mul cara ɓak boyna fok mulna u suu mam suu ŋgolona, kal hu zira luuna. Mul cara ɓak boyna di ana, «Aŋ mulna, kak iiri a fafaɗta. Ko saaraŋ njay ki oloɗi, ko mbalataŋ mbuɗ ki zeɗ oloɗi lay.

¹¹ Sana ka duk suu aŋ ti mulla kasina dew, sa namma ŋgussa vi loogi suu teteɗna ka kamu. Ay hu buu ma buŋ ka tuna, fi u dlara tew tew ay ni funumu, wira lay, yalna ko ndal yal ma vi looginana na, buŋ mulna Nabukodonosor tinim a mulna fok suu wi dlara, suu kaɓakŋa, suu Kaldeenna u suu di u dlara kina. Buŋ mulna li ni na,

¹² kay ana asi fi ko Danyel namma, ma mulna tinim sem ma geleɗta ana Beltasarna, ŋgussa mbuɗ mbuɗta, wira, yalna, a buɗ u doyra kiyo, tak u doyra gi ii boyna lay. Cecem wanda ɗaŋŋi yagi Danyel namma aya, nam buɗugira uɗ kiyo.»

¹³ Na ɗaŋŋi asi yi Danyel ay fok mulna, mulna ɓak boyna di ana, «Gasi ni aŋ Danyel ma ay duk suu yowosi ay hu Yuda, suu bun mulna yowosi ay hu Yudana su?

¹⁴ An hum asi ɓak kaŋ ana ŋgussa vi loogi suu jivina kaŋu, asi fi u dlara ay ki ni funuŋu, wira, yal ma mbuɗ mbuɗta.

¹⁵ Cecem wanda asi mbaan suu yalna, suu kaɓakŋa ay fokonu a asi ndum ɓii ndaɗta hin buɗunda uɗ ki may. Asi hin ndak buɗunda uɗ ka kiɗi.

¹⁶ An may ɗaŋŋi hum asi ɓak kaŋ ana aŋ ndak a buɗ u dlara ki lay, gi ii boyna lay. Cecem wanda ni li ni aŋ ndak a ndum ɓii ndaɗta ki may, buɗuɗ uɗ ki may ni, hin ɦaŋ baraw ma gusum loɓma, hin cukuŋ ɦeɗew doonora deleŋu, aŋ hin li a mul ma vi suu sunda vi mulnana.»

¹⁷ Na ɗaŋŋi Danyel ɓak boyna fok mulna dam ana, «Ҥal maŋga ɦawara li maŋ aŋu, tlesuu aŋ a ɦasi ki ɦawana ɦasi maŋ suu daŋi. May an hin ndum ɓii ndaɗta ki maŋ mulna, hin buɗumba uɗ ki lay.

¹⁸ Aŋ mulna, Lo ma Kolo Dayna ɦal mulla, ŋgolla, bibiŋilla u saɓakŋa maŋ Nabukodonosor buŋu.

¹⁹ Ni u ŋgolla nam ɦambara, njaf suuna halaŋ, njafna u dee vunna halaŋ dlak u ndaana fokomu. Nam ci gegelay u min mamba, hin gegelay iiri u min mamba, nam tli yam gegelay kolo u min mamba, hoŋ yam gegelay kaŋga u min mamba.

²⁰ May hu li ma hurum zal coco lay, saaram ŋgel kiyo, mbuɗ ki co lay ni, nam ndi ki kaŋga hu mul mamba, asi hin tlam saɓak mamma kiyo.

²¹ Asi dikim ki duk suuna, hurum mbuɗ ko huu mbuurina na, nam kakŋi duk mbuuri suu bagina, nam ti ni haɗna ko mbutlina na, mbaɗagira kolo huulonara mbusum tam kiyo, ta ta nam wi ana Lo ma Kolo Dayna ni malaŋ mulla vi suunara, nam tli yam gegelay kolo ni u min mamba.

²² Doli ɗaŋŋi aŋ goromma, Baltazar, aŋ wi dla ndaɗta halaŋ lay ni heɓ huruŋ ka kaŋgaɗi,

²³ aŋ col yara kolo eg Bu Suuna ma kolo huulonana, tlesuu hu ziimbana yowosi ki ni iriŋu, aŋ taŋga u suu ŋgolo maŋsina lay, banayaŋ boyogina u boyogi suu suunda, agi cagi sum veŋŋa hu lay. Aŋ ɦal ŋgara ni maŋ loogi doonora u lorra u walakka u kawina, guna u gogoyra suu ka wiɗi lay, ka humbi lay, ka wi dlaɗɗi layna, nam Lona ma iiri maŋga ka hu duk komma, ma dlaaŋga halaŋŋi mambana aŋ ŋgaam kaɗi.

²⁴ Na ɗaŋŋi nam sun vun kona ay ni namu, hin ɓii boy namma ni na may.

²⁵ Gola ɓii ndaɗta ni ko wanda na, Mene, Mene, Tekel u Parsin.

²⁶ A buɗuɗ uɗ kira di ni ana, Mene ni ana ndumiya, Lona ndum buu mul mamba hin daɓaɗ ki wa.

²⁷ Tekel ni ana nekka tliya, nekeŋ ay ki tli hu va ma tli nekka, ndaɗ ka ndakiɗi.

²⁸ Perse ni ana ɓorowiya, mul maŋga ki ɓorowiya hin ɦaɗ ki maŋ suu Medena u suu Persena.»

²⁹ Na ɗaŋŋi Baltazar ɦal voɗta ana cuk baraw ma gusum loɓma eg Danyel, cukum ɦeɗew lorra delem may, hin ɓak ki kam ana nam hin li ni a sa ma ŋgolna fok suu sunda vi mulnana.

³⁰ Hu njeŋge ndaɗta gaw ni Baltazar mul ma Kaldeenna asi cam kiyo.