DANYEL 4 - Boy Lonana

¹ An Nabukodonosor ay kaki hu ziin na en, furi hu ziin lay.

² Doyra danu hin mbuɗun ndaana, doyra dan hu liin ma buuna, dlara an waɗta ɓeŋen saaranu.

³ An ɦal voɗta ana mbaan suu wi dlara hu Babilonna ay fokon halaŋ, a asi buɗun u doy ndaɗta kiyo.

⁴ Na ɗaŋŋi muli suu li ɓivunna, suu kaɓakŋa, suu Kaldeenna u suu wi u dlara kal ha vi mulna, an ɓakasi doyra danda asi ndak ka a buɗunda uɗ kiɗi.

⁵ Ŋgoo dagan Danyel, sem ma geleɗta ana Beltasarna ko loonna na, kal ay vo vi mulna, nam ma saara vi loogi suu teteɗna kamma. An ɓakam doyra danda.

⁶ «Beltasar, mul ma vi suu wi dlarana aŋ ma an wi ana saara vi loogi suu teteɗna ka kaŋu, dlara mbuɗ mbuɗ ka a su kaŋgi layna, dan u doyra danda ay kiyo, buɗunda uɗ ay ki lay.

⁷ Doyra dan ay kaŋga hu liin ma buuna wanni, an gol irinu ni ŋgus ŋgolna coliya, kay yam ndaŋgara duk ɦoŋga gagayra, kolo fiyek cocoo.

⁸ Ŋgusu namma mbuɗ ŋgolo, saɓak coco lay, fiyekem tuɗ ta ta kolo huulona, sana ndak a wam ha ki ta ta keŋ ndaŋgara daɓ ayra.

⁹ Humum jiviya, vuɗum bolow coco may. Tlesuu tira ay kom maŋ suuna halaŋ. Mbuuri suu bagina koɗ tasi halaŋŋi kaŋga u ŋgusumu, layagi suu duk lonana kak kolo hu gorgor komu, tlesuu iirina halaŋ fi tiisina ni egemu.

¹⁰ An gol irinu, u wira an wi tlena hu liin ma buunara, golla ni sa ma saɓakŋa hoŋ ay kaŋgaa, sa ma jivina.

¹¹ Nam yi kolo u delem eŋga hin di ana, bowogi ŋgusna kaŋgaa, kaagina gogor kom kiyo. Kaaragina humum kiyo, njayagina vuɗum kiyo, ko mbuurina mbee ki u ŋgusumu, ko layagina pii ki hu gogor komu.

¹² Sariyamba kaŋgara hinigira duk ndaŋgara, u zew kawina u walakka kaɗ duk guguni suu bagina. Nam hin mbus ki u mbaɗagira huulonara, nam hin ɓorow usu ma kay ndaŋgarana duk tasi u mbuurina.

¹³ Hin mbuɗum hurum kiyo, ka hurum li ko huu sana na oloɗi, hin ɦam huu mbuuna hurumu. Ɗaŋŋi cokira hin jak ki kam yaɗ na kiɗisiya.

¹⁴ Dla ndaɗta li ni u gaɗta vi suu saɓakŋa, boy namma u gaɗta vi suu teteɗna a suu ka iirina wi ana Lo ma Kolo Dayna ni malaŋ mulla vi suunara, nam ɦaɗ maŋ gegelay ma namminimma col sa ma gi yam kaŋgana ki kolo duk suuna.

¹⁵ Doyra an waɗta ni na, an mulna Nabukodonosor. Aŋ Beltasar may ɗaŋŋi buɗumira uɗ ay kiyo, kay ana suu wi dlara varan halaŋŋi sa ka ndak a buɗuɗ uɗ kiɗi, aŋ may ni ndaka, kay ana saara vi loogi suu teteɗna ka kaŋu.»

Danyel buɗ u doyra vi mulnara kiyo

¹⁶ Na ɗaŋŋi, Danyel, ma sem ma geleɗta ana Beltasarna, mbuɗ ki ndaana hu li maari, saaram njay ki lay. Mulna ɓak boyna di ana, «Beltasar ka a doyra buɗta aŋ buɗuɗ uɗ kira viɗiŋ yaŋ kiɗi.» Beltasar hoŋom dira ana, «Malanna, ko doy ndaɗta li ni maŋ suu babali maŋsina, buɗta buɗuɗ uɗ kira li ni maŋ suu gonok maŋsina may.

¹⁷ Ŋgusu ma aŋ wamma, ma mbuɗ ŋgolo saɓak layna, ma fiyekem tuɗ ta ta kolo huulonana, ndak a wam ay keŋ ndaŋgara ma daɓma day lay na,

¹⁸ ma humum jivi cocoo, vuɗum bolow coco layna, ma tlesuu tira ay kom maŋ suuna halaŋŋa, ma mbuuri suu duk buburana mba koɗ tasi umma, ma layagi suu pii kolona min ziisi kolo humum ma,

¹⁹ ni aŋ, mulna. Kay ana aŋ mbuɗ ki ŋgolla, saɓak lay, ŋgol maŋga wul ta ta tew kolo huulona, mul maŋga ta ta tew keŋ ndaŋgara ma daɓ ayna.

²⁰ Mulna wi sa saɓakŋa olo, sa ma teteɗna ay kolo huulona sii ay kaŋga di ana, Bowogi ŋgusna kaŋgaa, palawagina kiyo, may hinigina sariyam kaŋga duk ndaŋgara, u zew kawina u walakka kaɗ duk guguni suu bagina, nam hin mbus ki u mbaɗagira huulonara, nam hin fi ɓorow mamma u mbuuri suu bagina ta ta cokira hin jak ki kam yaɗ kiɗisiya.

²¹ Uɗ a mbuɗ kira ni na, mulna. Ni gaɗta vi Lo ma Kolo Dayna mba tew ki kaŋga kay malanna mulna ni ndaɗu.

²² Asi hin dikiŋ ki duk suuna, aŋ hin kakŋi ko taŋ u mbuuri suu bagina asi hin ɦaŋ haɗna ni ko mbutlina na, hin mbusuŋ ki ni u mbaɗagira huulonara, cokira hin jak ki kaŋ yaɗ kiɗisiya, ta ta aŋ hin wi ki ana Lo ma Kolo Dayna ni malaŋ mulla vi suunara, nam ɦaɗ maŋ gegelay ma nam minimma.

²³ Olo, asi hin di ana hinim sariyam kaŋga duk ndaŋgara, mul maŋga hin tuɗ fok hu buu ma aŋ wi ana Huulona ni malaŋ tlenana.

²⁴ Kay ndaɗta mulna, gaɗ manda neeŋ wa, bulum cooŋga ki u ɗegeera, suluk maŋŋa ki u oora aŋ laɗ kay suu hahawrana. Kala aŋ hin kak u heɓpa fok hu nde.»

Dlara doyra daɗta ka liya

²⁵ Dla ndaɗta li ki eg mulna Nabukodonosor.

²⁶ Hu til ma doogo yam mbana, nam poy kolo hu zina vi mul ma Babilonna.

²⁷ Nam ɓak boyna di ana, «Ha tani wanni ka Babilon ta ŋgollaɗi su, ta an miniɗ u saɓakanda, u bibiŋilla vi mul mandaraɗi su?»

²⁸ Mulna ka ɓak boyna tu may ni, della col ay kolo huulona di ana, «Ka daŋ haa mulna, Nabukodonosor. Tlaŋ mulla ki koŋ wa.

²⁹ Asi hin dikiŋ ki duk suuna, aŋ hin kakŋi ko taŋ u mbuuri suu bagina, asi hin ɦaŋ haɗna ko mbutlina na, cokira hin jak ki kaŋ yaɗ kiɗisiya hu li ma aŋ hin wi ana Lo ma Kolo Dayna ni malaŋ mulla vi suunara, nam hin ɦaɗ ni maŋ gegelay ma nam minimma.»

³⁰ Hu li namma gaw ni dla ndaɗta li ki eg Nabukodonosor. Asi dikim ki duk suuna. Nam ti haɗna ko mbutlina na, tam mbus ki u mbaɗagira huulonara ta ta, tlimiɗ yam si ko tlimiɗ ɓarawna na, liviɗ kom siira ko liviɗ layagina na.

³¹ «Hu buuna tew tew ni an Nabukodonosor tli irin kolo huulona, saara mbay kanu. An ŋga sa ma Kolo Dayna, an yam semu, gi deɓ maŋ ma iiri a fafaɗtana, kay ana bibiŋil mamba ni bibiŋilla didinda, mul mamba tuɗ fok kay njaf suuna na gak gak.

³² Suu kay ndaŋgarana halaŋ ka mdak ii vaɗi, nam li ni u min mamba, kay asgaa suu kolo huulonana u suu kay ndaŋgarana, sa ma ndak a cam u kom kaɗi, ndak a dam ana, aŋ li nimegena kaɗi lay.

³³ «Cecem gaw ni, saara mbay kanu, u bibiŋilla vi mul mandara, ŋgol manda u jivi manda mbay egenu. Suu gaɗanna u suu ŋgolo mansina ka halanu. An hoŋ kolo hu mul manda wa, an fi ŋgolla kal ki sura jewra na nde.

³⁴ Cecem wanda, an Nabukodonosor, an ŋgaamu, yam semu, goɓ mi Mul ma Kolo Huulonana, kay ana sun mamba halaŋŋi gasira, dlaamba halaŋŋi ɗegeera, nam hin hoŋ suu ŋga tasi ŋgayina ki kaŋgaa.»