DANYEL 3 - Boy Lonana

Ҥal voɗta a goɓ kaŋga fok foto mbuu lorra

¹ Mulna Nabukodonosor min foto mbuu lorra fiyekeɗ meterra dok hindi may, bubuuɗ meterra hindi may. Nam coloɗ ki hu li ma yam ana Dura, hu ɦoŋzi ma Babilonna.

² Na ɗaŋŋi mulna sun suu sun mamba a asi tok suu mulina suu fok suunana, suu kaɓakŋa, suu ɦal gaɗta, suu gol tlena, suu gol gursuna, suu sunda kosi hu ɦoŋzinana ay halaŋ a asi mbay li furira kay foto mbuu ma mulna Nabukodonosor minimma.

³ Na ɗaŋŋi asi suu mulina, suu fok suunana, suu kaɓakŋa, suu ɦal gaɗta, suu gol tlena, suu gol gursuna, suu sunda kosi hu ɦoŋzinana tok tasi ay fok mbuu ma mulna minim namma may.

⁴ Sa ma ŋgol tokka yi kolo u delem eŋga ana, «Ɓakagi hani agi hum su, agi suuna halaŋ, njaf suuna u dee vun magina.

⁵ Hu li ma agi humugi del tokolomma, del diffa, del diŋŋa, diŋ ma ŋgolna, dadarina, u cakiyawra, u del tlesuubura ha wa na zeɗ zeɗ ni, agi cukugi vok givigi kaŋga ŋgaagi mbuu lorra mulna miniɗta.

⁶ Sa ma cuk vok givim ka kaŋgaɗi, goɓ ka kaŋgaɗina, hin gam ki cecemmi duk kura ŋgali ŋgik ŋgikka gaw.»

⁷ Hu li namma gaw ni suuna hum del tokolomma, del diffa, del diŋŋa, diŋ ma ŋgolna, dadarina, u cakiyawra, u del tlesuubu suu zeɗ zeɗna may ni suuna halaŋ u njafasi u dee vunusi belbel cuk vok givisi kaŋga goɓ mbuu lorra mulna miniɗta.

Banayaŋ Danyelna li ndaana ni ko Lona hol

⁸ Hu li namma gaw ni, suu Kaldeenna ɦuɗ tasi ay ɦuɗ ni sek suu Juifna gaw may.

⁹ Asi ɓak boyna hin di mulna Nabukodonosor ana, «Mulna, ko aŋ li kaki a fafaɗta.

¹⁰ Aŋ taŋga mulna ɦal voɗta ana li ni gegelay hum del tokolomma, del diffa, del diŋŋa, diŋ ma ŋgolna, dadarina, u cakiyawra, u tlesuu bu suu zeɗ zeɗna wa ni, nam cuk vok givim kaŋga goɓ mbuu lorra,

¹¹ Sa ma cuk vok givim ka kaŋgaɗi, goɓ mbuu lorra kaɗina hin gam ki hu zul ŋgolla kura ŋgik ŋgikka.

¹² Suu Juif suu aŋ tinisi fok suuna ɦoŋzi ma Babilonna, Sadrak, Mesak, Abed Nego, suu asina ŋgaaŋ kaɗi, mulna. Asi ka sunuŋ loogi maŋsinaɗi lay, ka goɓoŋ mbuu lor maŋga aŋ miniɗtaɗi lay.»

¹³ Nabukodonosor u hurum ma yara ɗaŋŋi ɦal voɗta ana asi mbaam gi Sadrak, Mesak u Abed Nego aya. Suu asina asi yowosi ay fok mulna.

¹⁴ Nabukodonosor ɓak boyna hin dasi ana, «Ni gasi su, Sadrak, Mesak u Abed Nego, ana agi ka sunugi loogi mansinaɗi ka goɓogi kaŋga fok mbuu doonora an miniɗtaɗi ni ge?

¹⁵ Na ni cecem wanda agi tagi mini su? Hu li ma cecem wanna li ni agi humugi del tokolomma, del diffa, del diŋŋa, diŋ ma ŋgolna, dadarina u cakiyawra, u tlesuu bu suu zeɗ zeɗna wa ni agi a cuk vok givigi kaŋga a goɓ mbuu doonora an miniɗta su? Lini agi ka a goɓoɗɗi ni, hu li namma gaw ni hin cukugi ki hu zulla kura ŋgik ŋgikka. Lo ma hin buɗugi ki konna ni maanage?»

¹⁶ Sadrak, Mesak u Abed Nego ɓak boyna di mulna ana, «Mulna Nabukodonosor, ami ka min a hoŋoŋ dira kay boy namma na dadambi.

¹⁷ Lini Loomi ma ami sunumma ndak a buɗumi kiyo ni, nam buɗumi ki hu zulla kura ŋgik ŋgikka koŋu, mulna.

¹⁸ Lini nam li dla ndaɗta kaɗi lay, aŋ wi ki jiviya, mulna, ami ka a sun loogi maŋsinaɗi, hin ka a goɓ kaŋga fok mbuu lorra aŋ miniɗtaɗi lay.»

¹⁹ Na ɗaŋŋi Nabukodonosor hurum ɓeŋ cocoo, vogom yow eg gi Sadrak, Mesak u Abed Nego. Nam ɓak boyna hin ɦal voɗta ana asi gi ku zulla ki sura jewra ta ta yamba kiɗisiya ko asi jew day gaɗ kura huruɗta na.

²⁰ Olo, nam hin ɦal voɗta maŋ asgaa mam su saɓakŋa ana asi njun Sadrak, Mesak u Abed Nego a cukusi hu zulla kura ŋgik ŋgikka.

²¹ Asi njun suu asina u baraw ma usina, u baraw ma payasina, u jum masira u koɓoɗta, asi hin cukusi hu zulla duk kura ŋgik ŋgikka gaw.

²² Hu li namma ko boy ma vi mulnana ki eŋ coco lay, zulla kura ki gii ku coco lay ni, suu may suu cuk gi Sadrak, Mesak u Abed Nego duk kurana sin kura casi kiyo.

²³ Kasi asi suu hindi asina, Sadrak, Mesak u Abed Nego ni asi ndi ha hu zulla kura ki ɗagiya.

Banayaŋ Danyelna suɗ ki duk kura

²⁴ Mulna Nabukodonosor humusi asi gi soolla, nam viɗ ki na dawlaɗ col kolo na zak gaw. Nam ɓak boyna hin di suu mam suu ɦal gaɗta ana, «Aygi cukuygi gin suuna duk kura ni hindiɗi su?» Asi hoŋ dira maŋ mulna ana, «Ni na daŋ may, mulna.»

²⁵ Mulna hoŋ dira ana, «Gologi an ka wi suuna fiɗi ki buɗiya, ka tuɗ duk kura ndaɗ ka kaasi tasi mbilɗi lay, sa ma u asi a fiɗirana tam ko ndal ta goŋ looginana na.»

²⁶ Na ɗaŋŋi Nabukodonosor ɦuɗ tam ha fun zulla kura ŋgik ŋgikka. Nam ɓak boyna hin di ana, «Sadrak, Mesak u Abed Nego suu sunda vi Lo ma Kolo Dayna, selegi ay kiyo, kakagi iiriya.» Na ɗaŋŋi Sadrak, Mesak u Abed Nego sel ay ki duk kura.

²⁷ Suu mulina, suu fok suunana, suu ɦal gaɗta vi mulnana tok tasiya. Asi wi suu asina. Kura lasi va ka egesi na ndeɗi lay. Tlimiɗ yasi kura waraɗ kaɗi lay, koɓoɗ masira ni eg liiɗ lay, ndoos kura ka his egesiɗi lay.

²⁸ Nabukodonosor ɓak boyna di ana, «Ko sem Lo ma vi Sadrakŋa, Mesak u Abed Negona, suuna ŋgaamu, ma sun sasunda huulona mamma ay suɗ suu mam suu sunda ki kay ana asi ɦal tasi ki mam mayna. Hu li ma asi su vun mulna, asi ɦal tasi ki a lassa, goɓ lo ma daŋgi may, Loosina dew.

²⁹ An may ni an ɦal voɗta ana gegelay hu njaf suuna halaŋ, njaf suuna u vun masina, ma di boy ma cona maŋ Lo ma vi Sadrak, Mesak u Abed Nego di na, vam palawam kiyo, ziim hin mbuɗ ki didiŋga kay ana lo ma daŋ ma buɗ suu mamsina ki ko wanda na kaɗi.»

³⁰ Na ɗaŋŋi mulna ɦal sunda ŋgolora maŋ Sadrak, Mesak u Abed Nego hu ɦoŋzi ma Babilonna.

Doyra di mulna a mbara kay ŋgusu ma ŋgolna

³¹ Mulna Nabukodonosor u njaf suuna u vun masina halaŋ suu ka kay ndaŋgarana, ko heɓpa li u agi ŋgolo.

³² Dlara mbuɗ mbuɗ mayra Lo ma Kolo Dayna laɗ u anda an goloɗ ana ndaɗ jivi kay an takaɗ kiyo.

³³ Dlara mbuɗ mbuɗ ndaɗta ŋgolo, dlara mbuɗ mbuɗ ndaɗta saɓak lay. Mul maɗta ni mulla a fafaɗta. Bibiŋil maɗta tuɗ ha fokŋi tuɗi kay njaf suuna na ɗow ɗow.