DANYEL 2 - Boy Lonana

Doyra di Nabukodonosor jewra

¹ Nabukodonosor hu basaɗam ta mbara a mulna ni doyra damu. Ŋgusum paɗ ki kam na fak, senna ka vam oloɗi.

² Mulna ɦal voɗta ana yam ay suu wi dlara, suu suu suuna, suu li kumuna u suu Kaldeenna may, a asi mbay dam u doy mamba kiyo. Asi hin mba fok mulna.

³ Mulna hin dasi ana, «Doyra danu, ŋgusun paɗ ki kan na fak, an min hum u doy ndaɗta.»

⁴ Suu Kaldeenna di mulna u vun Arameenna ana, «Mulna, aŋ ka ki ni a fafaɗta. Dami doyra daŋŋa aya, ami hin daŋga uɗ kiyo.»

⁵ Mulna hoŋ dira ɓak suu Kaldeenna ana, «An ka ɓak dlaanda haa. Lini agi dan ki u doy manda ka kiɗi, mbuɗun kira uɗ ka ki jiviɗi ni, asi hin njerɓegi kiyo, ziigi hin mbuɗ ki ni didiŋga.

⁶ Li ni agi dan u doy manda ki wa, mbuɗunda uɗ ki jivi wa may ni, an hin ɦagi ɦira ɦawara u ŋgara coco may.»

⁷ Asi hoŋ dira a yasira mbara ana, «Ko mulna di doy mamba maŋ suu sun mamsina, ami hin mbuɗumba uɗ ki may.»

⁸ Mulna hoŋ dira hin ɓak ana, «A gasira an wi ana agi li na ka kogi ŋgolo kay agi wi ana an ɓak boy manna ki wa.

⁹ Li ni agi dan u doyra ka kiɗi ni, dlara ko ndaɗta nara ka juɓugiya, agi vagi vun tagi a dagi dlara ka boyna fokon lay ta ta a lina mbuɗ tam ki tuwa. Agi dan u doyra ay kiyo, an hin wi ana agi hin a mbuɗunda uɗ kiyo ni na tuwa.»

¹⁰ Suu Kaldeenna hoŋ dira ɓak fok mulna ana, «Hu duliyara halaŋ sa ma ndak a di u dlara vi mulna kina kaɗi. Kay ana mul ma ŋgol lay, saɓak lay ka a joɓ u dlara ko ndaɗta nara ko suu wi dlara u suu Kaldeennaɗina ni gege?

¹¹ Dlara mulna joɓoɗta su kaygiya, dukuygi halaŋ lay sa ma di dla ndaɗta fok mulna bay ndaana kaɗi. Hin li ni loogi suu ziisi ka dukuygi kay ndaŋgaraɗina kala.»

¹² Na ɗaŋŋi mulna mbuɗ yara cocoo, ɦal voɗta ana, ci suu wi dlara hu Babilonna ki halaŋ.

¹³ Boyna ɓak ki wa, hin a ci suu wi dlara ki ni ciiya, asi hal Danyel u banayamma a casi kira may.

Lona tak u doyra vi mulnara ki maŋ Danyel

¹⁴ Na ɗaŋŋi, Danyel ɓak boyna maŋ Aryok ma ŋgol asgaa suu vi mulnana u yalna, u ndaana kay nam kal ki a tuɗ ci suu wi yal suu Babilonna kiyo.

¹⁵ Nam gijaŋ ɓakŋa di asgaa ma vi mulnana ana, «Dlara mulna daɗ ndaɗta ki saɓak eŋga cocora na ni kay mege?» Na ɗaŋŋi Aryok ɓak boy namma ki maŋ Danyel gaw.

¹⁶ Danyel kal ha vi mulna kal ni hin joɓom ana nam ɦam voɗta nde nam min a buɗum u doyra ha kiyo.

¹⁷ Danyel hoŋ vo varam hoŋŋi ɓak boy namma ki maŋ Hananyia, maŋ Misael u Azariya banayamma,

¹⁸ dasi ana, asi joɓ heɓpa ko Lo ma kolo huulonana kay a nam takasi u dlara mbuɗ mbuɗ ndaɗta kiyo, ka a Danyel fi matna u banayamma u suu wi dlara suu hu Babilonnaɗi.

¹⁹ Na ɗaŋŋi Danyel hin fi u dlara mbuɗ mbuɗ ndaɗta ki u doyra hu senna njeŋgee. Na ɗaŋŋi Danyel hin gi deɓpa maŋ Lo ma kolo huulonana.

²⁰ Danyel gijaŋ ɓakŋa hin di ana, «Ko suuna ŋga ni sem Lona, ko ay hu fokka na a fafaɗta, kay ana yalna u saɓakŋa ni varamu.

²¹ Nammi sa ma mbuɗ ii lina u dlara halaŋŋa, nam cuk mulina ki kaŋga lay, nam yow mulina kolo lay, nam ɦal yalna maŋ suu wi dlara, nam ɦal wira maŋ suu saa u dlara.

²² Nammi sa ma tak u dlara mbuɗ mbuɗ mayra ki ŋgayra kina, nam wi tlesuu ka duk ndufundana lay, kiɗikka ka u nam may.

²³ Maŋ aŋ Lo ma vi somoyomina, gi deɓ manda u furira u ŋgaanda lay, kay ana aŋ ɦal yalna u saɓakŋa. Cecem wanda aŋ takan va ma ami joɓoŋ kamma kiyo, kayana aŋ takami u dlara vi mulnara kiyo.»

²⁴ Kay ndaɗta Danyel tuɗ vi Aryok ma mulna ɦam voɗta ana nam ci suu wi u dlara hu Babilon kiyona, dam ana, «Ci suu wi u dlara hu Babilonna kiɗi, tuɗ tinin eg mulna an hin buɗum u dla ndaɗta kiyo.»

²⁵ Na ɗaŋŋi Aryok tuɗ tin Danyel eg mulna toŋgo na zak gaw hin dam ana, «An fi sana dew ay duk suu yowosi ay hu Yudana hin a buɗ u dlara ki maŋ mulna.»

Foto mbuu ma sem maŋina

²⁶ Mulna ɓak boyna hin di Danyel ma sem ma geleɗta ana Beltasarna ana, «Na ni aŋ ndak a takan u doyra danda hin buɗunda uɗ ki may su?»

²⁷ Danyel ɓak fok mulna hin di ana, «Dlara mbuɗ mbuɗta mulna joɓoɗ uɗ wanda, suu yalna lay, suu kaɓakŋa lay, muli suu li ɓivunna lay, suu wi dlara fokka lay ndak ka a buɗuɗ uɗ ki maŋ mulnaɗi.

²⁸ May Lo ma kolo huulonana ka dew, ma tak u dlara mbuɗ mbuɗta kina, hin tak maŋ mulna Nabukodonosor dlara hin mbay hu fokkara. Doyra daŋga u tlesuu ŋgusuŋ wasi hu liiŋ ma buunana wanni.

²⁹ Maŋ aŋ mulna, saaraŋ tin ha ki kay dlara hin mbay fokka hu liiŋ ma buuna, nam sa ma tak dlara hin takaŋga ni na may.

³⁰ An may ni, ka ni kay tan u yal man ma su ndarayan suu iirina dla ndaɗta tak taɗ ki irinni naɗi may, ni kay ana tak u dla ndaɗta ki maŋ mulna a aŋ wi saa mayra huruŋga may.

³¹ Aŋ mulna may ɗaŋŋi, aŋ golla, foto mbuu ma ŋgolna, foto mbuu namma ŋgol cocoo, wele mamba su ki na nde. Mbuu namma coli fokoŋu, tam li suuna ndaana ɦay.

³² Mbuu namma yam minira ni u lorra gus loɓma, ŋgafam u kom minira ni u doonora, hayam u ɓalam minira ni u walakka.

³³ Gayam minira ni u kawina, sem maa ɦiw u kawina may, ma ɦiw u luɓuna may.

³⁴ Aŋ golla, hu li ma gogoyra ko sa ay ka egeɗɗi lay col ay kolo kay ɦinira mba waɗ gay mbuu namma ma kawina u ma luɓuna hin luɗusi kiyo.

³⁵ Na ɗaŋŋi kawina, luɓuna, walakka, doonora u lorra luɗ ki ni halaŋ, asi hin mbuɗ ni ko ndal barra sii u semeɗna hu til faɗta na. Semeɗna tuɗ u asiya, sa hin ka fasi balamasi oloɗi. Ndaɗ ɦini mayra waɗ mbuuna ndaɗta mbuɗ ki ni ɦini mayra ŋgolla, hin oy yam ndaŋgara ki halaŋ.

³⁶ Doy ndaɗta ni na, aygi hin mbuɗuɗ uɗ ki maŋ mulna ni na.

³⁷ Aŋu, aŋ mulna, mulna vi mulina, aŋ sa ma Lo ma kolo huulona ɦaŋ mulla koŋŋa, ɦaŋ eŋga, ɦaŋ saɓakŋa u bibiŋillana,

³⁸ Aŋ sa ma nam ɦaŋ suuna ka hu duk koŋŋa, mbuuri suu bagina u laygi suu duk lonana, hu li ma asi ka huna halaŋ nam tiniŋ a mulna kasi halaŋ halaŋ.

³⁹ Ŋgoroŋ dagan wanni mul ma daŋŋa hin mbaa, ka ndak u aŋgi, mul ma daŋŋa hin mba olo, mul walakka ma a hindirana hin ti mulla kay yam ndaŋgara halaŋ.

⁴⁰ Mul ma fiɗina hin mbay olo, saɓakŋa ko kawina na, kay ndaɗta kawina luɗ tlena, to tlena ki halaŋ halaŋ, ko ndal kawi ma luɗ tlena na, nam hin luɗ tlena hin luɗ suu asina kiyo.

⁴¹ Aŋ wi gay mbuna u sem ma ɦiw u luɓuna, ma ɦiw u kawina, hin li ni mulla iriɗ ki ɓorowira, saɓak kawina hin li huwa ko ndal aŋ wi kawi ma tlumi ko tam u luɓuna naɗi su.

⁴² Ugi kom u sem suu mini u kawina may, u luɓuna may na, mul ndaɗta keŋeɗ maa ɦiw hin li saɓakŋa, keŋeɗ ma ɦiw hin li maŋiya.

⁴³ Aŋ wi kawi ma tlumi u luɓunana, ni ana asi hin taɓ ki ko tasi u njaf suu kay ndaŋgarana, asi hin ka taɓ ko tasi gegelay ko tam u ndarammaɗi ko ndal kawina ka taɓ ko tam u luɓunaɗira na.

⁴⁴ Doli ɗaŋŋi hu buu ma vi muli suu asina wanni Lo ma ay kolo huulonana hin tin mul ma ka ɓeŋ kiɗina, ma mul mamba hin ka ɦaɗ ki maŋ suu daŋ oloɗina. Nam hin luɗusi kiyo, hin bulum muli suu asina ki halaŋ, nam hin hinni a fafaɗta.

⁴⁵ Ko ndal aŋ wi gogoyra col ay kolo kay ɦinira bay ko sa egeɗu mba luɗ kawina kiyo, luɗ walakka kiyo, luɗ luɓuna kiyo, luɗ doonora kiyo luɗ lorra kira na. Lo ma ŋgolna tak dlara hin mbay fokka ki maŋ mulna. Doyra di mulnara ni gasira, uɗ mayra buɗ kira ndak a sana vi uwa.»

⁴⁶ Na ɗaŋŋi mulna Nabukodonosor cuk fok givim kaŋga, cok yam kaŋga ɦal ŋgara maŋ Danyel hin ɦal voɗta ana asi li ɓivunna maŋ Danyel u mbul ma his jivina.

⁴⁷ Mulna ɓak Danyel di ana, «Gasi Loogina ni Lona vi loogi suu ɦawana, Bu Suuna vi mulina, sa ma tak u dlara mbuɗ mbuɗta kina, kay ana aŋ ndak buɗun u dlara mbuɗ mbuɗ ndaɗta kiyo.»

⁴⁸ Na ɗaŋŋi mulna tli Danyel kolo ɦam tlena ɦawa bolow cocoo, ɦam saɓakŋa kay ɦoŋzi ma ŋguy kay Babilonna halaŋ, hin mbuɗum ki a ŋgolla vi suu wi dlara hu Babilonna halaŋ.

⁴⁹ Danyel joɓ mulna hin di ana ko Sadrak, Mesak u Abed Nego li a suu ŋgolo suu hu ɦoŋzi ma ŋguy kay Babilonna, Danyel tamba hin ka kira ni vun zina vi mulna.