DANYEL 12 - Boy Lonana

Li ma yoo tara u paɗta kolora

¹ Hu li namma mul ma ŋgol ma vi suu sunda vi Lona, Michel, hin col kolo yara, nam sa ma ka coli eg goryoŋ suu maŋsinana, li namma hin li ni li ma yoo tara, dla ndaɗta hin a lira ka bay li kay yam mbassa dew tuwa ta ta hu li namma. Hu li namma suu maŋsina hin suɗ kiyo, gegelay ma sem ka ɓiiri kaŋga hu magaarana.

² Bolow suu miɗi kaŋga duk ndaŋgarana hin dliɗ ki koloo, suu ɦiw hin fi iirira bay daɓpa may, suu ɦiw hin fi zolona a warak masi ma didinna may.

³ Suu may suu neeyna tasi hin weleɗ ko huulona na, asi suu mbuɗ suuna ki jivi bolow coco ko ndal ciciwra na a fafaɗtana.

⁴ Aŋ, Danyel, may ɗaŋŋi ŋgay boy namma huruŋu, li um ta ta hu daɓpa. Suuna bolowo hin ndum boy namma, saa masira hin wul fok may.

Li ma daɓpa hinni ko va ma ŋgayna na

⁵ An, Danyel, irin ɗaŋŋi wi suuna colira mba', maa dew coli fun lumma, ma hiŋŋa coli fun lumma keŋ hiŋŋa may.

⁶ Asi ɓak sa ma baraw dlemba cuki egem coli kay yona hu lummana ana, «Tlesuu ɦal saara maŋ suuna asina hin daɓ ki ni saɓage?»

⁷ An hum del sa ma baraw dlemba cuki egem coli kay yona hu lummana, nam tli kom ma njufna kolo huulona u kom ma gulna, ɓak u sem sa ma ka iiri a fafaɗtana ana, «Dla ndaɗta hin li ii coki dew, coki mba', ɓorow cokira ki duk may, hu li ma saɓak suu teteɗna hin daɓ kina. Halaŋŋi, tle asina hin daɓ ki may.»

⁸ An hum boy namma may ka wam umbi, an hin joɓ ana, «Malanna, tle asina hin daɓmi ana mege?»

⁹ Nam dan ana, «Tuɗa, Danyel, kay tle asina ni ŋgay tuwa, asi hin li ki ni hu buu ma daɓpa may.

¹⁰ Suuna bolowo hin mbuɗ ki jiviya, hin mbuɗ ki haɓpa. Suu cona hin li ni dlaasira cora, sana dew lay hin ka wi u boy nammaɗi, suu neeyna hin hum u boy namma ni asiya.

¹¹ Col ay hu li ma ɓivun ma lam tew tewna, seŋ bay lirana day ta ta hu li ma dlara ɓeŋ lina mbara ni buuna tew ki buɓ duk kis kis mba' duk dok dleeŋe (1,290).

¹² Heɓpa ka kay sa ma ka juɓa, hin tew ki hu buu ma buɓ duk kis kis hindi duk dok hindi yam vadlna (1,335).

¹³ Aŋ tuɗ ta ta tew ha ki hu daɓpa. Aŋ hin fi koɗ tara, aŋ hin col kolo a vi warak maŋŋa hu buu ma duliyara hin daɓ kina.»