DANYEL 11 - Boy Lonana

¹ «Kan an may ɗaŋŋi hu basara jewra vi Dariyus a mulna hu mbassa Medera ni an njunum ay ɦam saɓakŋa ni anu.

Duu ma duk ɦoŋ muli suu mbayawna u suu dalina

² «Cecem wanda ɗaŋŋi an daŋ ha ni gasira. Gola, mulina hin kak kay mbassa Persera na hindi, ma a fiɗirana hin fi begera ŋgolla su suu hiŋŋa halaŋ. Hu li ma nam mbuɗ ki saɓakŋa u bege mamba wa ni, nam hin cuk suuna duu u mul ma hu mullaGressa.

³ Mul ma saɓak cocona hin mba hu mulla Gressa olo, nam hin ti kay suuna ni u min mamba.

⁴ Hu li ma nam kak ki kaŋga jivi wa ni, mul mamba hin ɓorow iriɗ ki keŋ lina fiɗi, ka maŋ suu hu njafamma oloɗi, ka li saɓak ko nam ti kasira naɗi, kay mul mamba sariyaɗ ka oloɗi, ndaɗ hin ha ki ni maŋ suu daŋŋa.

⁵ Mul ma mbayawna hin mbuɗ saɓakŋa, may asgaa mamma ŋgolna hin mbuɗ saɓak suumu, ti mulla ŋgolla suum lay.

⁶ Ŋgoo dagan basara ca ni asi hin vi banara, goŋ mul ma dalina mbay vi mul ma mbayawna a vi banara. Ndaɗ mba ka u saɓakgi, suu hu njafaɗna lay asi yowosi cukusi daŋgayna, suu mbaaɗ ayna lay, goroɗna lay, suu njun uɗna lay halaŋ hu li namma.

⁷ Gogor guna hin ɗuf ay kolo eg sariyam balamamu, nam hin mbay duk suu duuna, hin kal hu ziŋ mul ma mbayawna, nam hin lasi dlara funusiya, tlasiya.

⁸ U loogi masi suu ɦawana lay, foto tlegeyesi suu yoori u tusunana lay, tlegeyesi suu yoori jivi coco u lorra lay, u doonorana lay, nam yowosi kom halaŋ, tuɗusi ki hu mbassa Egiptera. Nam hin kak ha ki eg mul ma mbayawna na day basara bolow olo.

⁹ Nam hin kay mulla dalira hin hoŋ hu mbassamu.

¹⁰ «Goroyom hin li duuna, asi hin tok suuna eg tasi bolow cocoo. Maa dukusi dew ni hin col duuna, hin pali suuna, hin hoŋ aya, hin li duuna ta ta tew eg ziŋ mulnana.

¹¹ Mul ma dalira hin ka guruɗta kiyo. Nam hin kal ay ki duu u namu, duu u mul ma mbayawna. Nam yow suuna um a duuna bolow cocoo, suu tli ha kasina hin cuk ki umu.

¹² Hu li ma nam ti u duuna wa ni, hurum hin ɓeŋ cocoo, nam hin ci suuna ki bolow lay, hin ka ŋga tambi.

¹³ Mul ma mbayawna hoŋ voo, yow suuna um ŋgolla sura jewra olo. Kak ŋgoo dagan na njokŋi, tew basara na ca ni, nam hoŋ ay u suu duuna um ŋgolla olo, u tlegena ŋgol coco lay.

¹⁴ Hu li namma wanni, suuna bolow cocoo hin col duuna u mul ma mbayawna, suu may suu li dla cora hin col duuna a faɗ vun dlara tak taɗ kira may asi hin puk ki kaŋgaa.

¹⁵ Mul ma mbayawna hin mbaya, min li ma duuna hin tli zi ma saɓak cocona. Saɓak ma vi suu dalina hin ka ndak oloɗi, suu mam suu duu suu dlasi cona lay ka fi saɓak ma col fokosi oloɗi.

¹⁶ Sa ma hin mbay a duurusina hin li ni dlara u hurumba, sa ka col fokom dewɗi, nam hin col ha ki hu mbassa jivi ɦayra u cira nam ci suu nam fasi fokomma.

¹⁷ Nam saa hurum ana nam mbay u saɓak mul mamba, nam hin vi vunusi ko tasiya, nam hin ɦam goromba a cara kay a ɓeŋem tlegeyem kira, may dla ndaɗta ka liɗi, nam hin ka tew fun dla ndaɗtaɗi.

¹⁸ Nam hin pereɗ irim ki kay li ma daara hin tli ŋgol suu kaɗna ki umu, sa ma duu ma daŋŋa mbay bulumum yaamba ki bay nam hoŋom dira balami.

¹⁹ Nam hin pereɗ irim ki kay li ma ziim ma ŋgolna huna, nam hin puk kaŋgaa, nam hin ndi kaŋga wa ni, sa fam ka oloɗi.

²⁰ Sa ma daŋŋa hin varak balamamu, sa namma hin li dlara fun suu hu mul mambana, li buu ca ni asi hin cam kiyo ka ki kiɗik duk suunaɗi lay, ka fun duunaɗi lay.

²¹ «Sa ma hahawra hin varak balamamu, sa namma sa ka ŋgaam a mulnaɗi, nam hin mbaarsi heɓpa aya, hin ti mulla u mbeleŋ mamma.

²² Saɓak ma las suuna halaŋ hin bulum ki fokomu, mul ma banara u namma lay.

²³ Jivira kay vi vun ma vam u namma, nam hin njaɗ ni dlara ganyamba, nam duura, hin tli lina u suu ewna.

²⁴ U heɓpa nam hin mba hu li ma mbii cocona, nam hin li dlara somoyom laɗ kaɗira lay, dlara buyum ŋgolona laɗ kaɗira lay, nam hin ɓorow tlesuu asi ɦurumusina ki maŋ suu mamsina u tlesuu sunda. Nam hin min tam a duu u mbassa ŋgolora li buu ca.

²⁵ «Nam hin so hurumu, vi tam li duuna u mul madalina u suu duuna um bolow cocoo. Mul ma dalina vi tam duu u nam u suu duuna um bolow su mamsina, saɓak su mamsina lay, may nam hin ka ndakgi ay asi hin li dla cora egemu.

²⁶ Suu may suu ti u nam dewna cam kiyo, hin cam suu mam suu duuna ki lay, suuna bolow coco hin fi maɗna.

²⁷ Muli suu mbana hurusi oyra u sulukŋa, ɓakŋi dlara kaboyna sak sak hu liisi ma tina, may dla ndaɗta ka ndak ii vaɗi, kay ana daɓpa vi dlara hin daɓ ki ni hu buu ma ŋgaam namma.

²⁸ Nam hoŋ hu mbas mamba u tlesuu sunda ŋgol cocoo u saa mayra cora kay galamba teteɗta, nam hin li tle asina hin hoŋ hu mbas mamba olo.

²⁹ «Lina ndak may ni nam hoŋ ay duu u mul ma dalina may ka ni daɓ maɗta gaw ko ura tin ayra naɗi.

³⁰ Lumba ŋgolora Kittimba hin mbay u suuna duu u namu, nam hin ɓeŋ hurum kiyo. Olo, nam hin ɓeŋ hurum ki eg galamba teteɗta, olo nam hin ɓak duk tam u suu ka li u galamba teteɗtaɗina.

³¹ Suu mam suu saɓakŋa hin mbay min tasi a ɓeŋ li ma teteɗna kira, doo ɓivunna bay lira, hin mbaa dla cora ɓeŋ lina ay huwa.

³² Nam hin ɓeŋ huu suuna ki u kaboy mamma a asi noy galamba wilira kiyo, may suu wi Loosinana hin li ni dlara ɗegeera u vira hurusiya.

³³ Suu may suu neey dukusina hin haɗ suuna bolow cocoo, may asi hin casi ki u ŋgewegina, ŋgalasi kiyo, hin cuk suu ɦiw daŋgayna, ɦurumusi tlegeyesi ii buu ca lay.

³⁴ Hu li ma asi ndi kaŋga nana asi hin fi njunda ni nde ɦawaa, suuna hin cuk tasi usi ni u mbambara.

³⁵ Suu neey suu dukusina ɦiw asi hin casi kiyo, maɗ masina hin li ni a ɓivun ma mbuɗusi ki jivi teteɗna, mbuɗusi ki haɓpa ta ta hu buu ma daɓpa, kay nam hin tew ki ni buurum tuwa.

³⁶ «Mulna hin li ni dlara u hurumba, hin ŋga tam coco lay, hin gol tam ŋgol suu loogi suu ɦawana lay, su Lo ma vi loogi suu ɦawana na lay, nam hin di boy ma ɦal saara maŋ suunana. Dlaamba hin li kom jivira ta ta hu buu ma yara hin daɓ kina, kay ana va ma Lona ŋgaamma hin li kiyo.

³⁷ Nam hin ka ŋga loogi suu vi somoyomma oloɗi, nam hin ka ŋga lo ma boyogina goɓommaɗi lay, ka ŋga ful maa na dewɗi lay, kay nam hin gol tam ŋgolla su tlena halaŋ.

³⁸ Nam hin ŋga hu liimma ni ful ma hu zi ma ŋgolna doy hol. Nam hin ŋga ni ful ma somoyom wam ay ka jewɗina u doonora u lorra u gogoyra ceɗira u tlesuu gus loɓma.

³⁹ Nam hin duu u suu ɦal saɓakŋa maŋ zi ma ŋgolnana u ful ma ay hu li ma daŋŋana, suu vi u ful nammana nam hin ɦasi bibiŋil mamba. Nam hin ɦasi saɓakŋa kay suuna cocoo, nam hin ɓorowosi lina kosi may, hin ɦasi warakŋa may.

⁴⁰ «Hu li ma daɓpa wanni, mul ma dalina hin duu u namu, mul ma mbayawna hin sulul ha kam u pupus mamma, u suu mam suu duuna u kulumina u lumba ŋgolora bolow coco lay, nam hin tli mbassa, jak ta ta keŋ hiŋŋa.

⁴¹ Nam hin kal hu mbas mayra jivi ɦayra, suuna hin fi maɗna cocoo. Suu wanna hin suɗ kommi asiya, suu vi Edomma u suu vi Moabma, goryoŋ Amon suu vuɗ fok jewna may.

⁴² Nam hin maɗ kom ha ki kay yam mbassa, mbassa Egiptera lay, hin ka ki kombi.

⁴³ Nam hin mbuɗ ki ni malaŋ begera, lorra, doonora, u tlesuu gus loɓma hu Egipte halaŋ, suu Libina u suu Nubiena hin cuk tasi ki umu.

⁴⁴ Boy ma daŋŋa col ay u maɗiina may, mbayaw may mbuɗum ndaana, nam hin kal ay ki u hurum ma yara a ɓeŋ lina, ci suuna ki bolow coco lay.

⁴⁵ Nam hin pi mbutluɓ mamma mulla duk ɦoŋ lum ma ŋgolona u ɦini mayra teteɗ jivi ɦayra. Buurum hin daɓ hu li namma bay sa mbay a njunumu.»