DANYEL 10 - Boy Lonana

Dlara daŋga tak taɗ irimu, sana cuk barawna egemu

¹ Hu basara hindira Syrus, mul ma Persena dlara tak taɗ ii Danyel ma sem ma geleɗta ana Beltasarna dew. Boy namma ni gasira u ti tara ŋgolla. Nam hum u boy namma, nam wam um ki jivira ni hu takka.

² Hu buu namma ni, an Danyel, an cuk doona egen damassa hindi.

³ An ka ti va ma jiviɗi lay, tliw lay, veŋ lay ka kal fununɗi, an ka li mbul ma his egenɗi lay ta ta daɓpa vi damas ta hindira.

⁴ Hu buu ma dok mba' yam fiɗina hu til ma jewna, an colira fun lumma ŋgolna ni ana lum ma yam ana Tigrena.

⁵ An tli irin kolo gol na ni wi sana colira u baraw dlemba egemu. Nam njun ɗik lorra ma jivina hurumu.

⁶ Mbalatam weleɗ ko gogoyra ceɗeɗta na, vogom weleɗ ko ndal weleɗta huulonara na, irim ŋgal ko ndal vun gu ma kura na, gayam u ɓalam weleɗ ko ndal walakka yoorira na, dlara ndi ay ki funumba ni ko ndal vun suu bolowna na.

⁷ An, Danyel, u dew tanda wi tak ndaɗta ni anu. Suu ay u anna wi tak ndaɗta kaɗi may. Asi mbuɗ ki ndaana cocoo, liŋ ŋgay tasi kiyo.

⁸ An hin ki kay tan dew ɗaŋŋi gol tak mayra ŋgol ndaɗta. Saɓakan hin ka na nde oloɗi, irin mbuɗ ki zeɗ, saɓakan ka na nde oloɗi.

⁹ An humum vunum ma ɓakŋa, hu li ma an humum vunum ma ɓakaŋa nana an puk kaŋga ki ciira liŋrira u vun diginu, irin kuluɓira kaŋga kay ndaŋgara.

¹⁰ Gola wanni, ko sana tini egenu. Ndaɗ colon koloo, dubuk kon lay, vok givin lay dlaka.

¹¹ Sa namma dan ana, «Danyel, sa Lona ŋgaɓam ay ki jew dayna, hum u dlara an daŋgara halaŋ ki jiviya. Aŋ col kolo hu li ma aŋ hurum wanna na col kay ana cecem wanda Lona sunun ay ni egeŋu.» Hu li ma nam ɓakan boy namma nana, an coli kolo dlak cocoo.

¹² Nam dan ana, «Li ndaanaɗi, Danyel, kay ay hu buu ma jewna hu li ma aŋ fi yal ma hum u tlena a gi yaŋ kaŋga u Looŋara, a boy maŋŋa halaŋ Lona humumu, ni kay boy maŋŋa an mba ni na.

¹³ Mul ma kay mulla Persera li yara u an buuna dok mba' yam dew ɗaŋŋi Michel duk muli suu fokŋa mbay njununu, an hin hin kakira eg muli suu Persena.

¹⁴ An mbay ni a takaŋ dlara hin mba kay suu maŋŋa hu fokkara, kay ana dla ndaɗta hin tak taɗ ki fok jew kay buu namma tuwa.»

¹⁵ Hu li ma nam ɓakan dla ndaɗta na tuna, an kuluɓ irin kaŋga kay ndaŋgara, seŋ tanu.

¹⁶ Gola wanni sana tli tam ko goŋ sanana na tin kom kay vununu. An mal vunun ki, gijaŋ ɓakŋa. An di sa ma coli fokonna ana, «Malanna, kay dlara tak taɗ irin wanda an mbuɗ ki ndaana wa, saɓakan ka oloɗi.

¹⁷ Ni nana sa sunda vi Malanna hin di Malanna ana an cecemmi saɓakan ka na ndeɗi lay, musukun ka na ndeɗi lay ni ge?»

¹⁸ Na ɗaŋŋi sa ma tli tam ko sana nana tin kom egen olo, hin ɦan saɓakŋa.

¹⁹ Nam hin dan olo ana, «Li ndaaɗi, sa ma Lona ŋgaɓam kina. Ko heɓpa li u aŋu. Aŋ li saɓaki. Aŋ li saɓaki.» Hu li ma nam ɓakan nana an fi saɓakŋa hin di ana, «Ko Malanna ɓakka na, kay aŋ ɦan saɓakŋa wa.»

²⁰ Nam dan ana, «Aŋ wi dlara an mbay egeŋ kaɗta su? Cecem wanda an hin col duuna u mul ma Persena ni anu, an hin kal kiyo, mul ma Gresna hin varak ay balamanu.

²¹ An hin daŋ dla mayra kaŋga ɓiiri hu magaara gasira. Sa ma col fokon a njun kay suu asina kaɗi, ni mul magina Michel dew.