DANYEL 1 - Boy Lonana

Danyel u ndarayamma ay hu Babilon

¹ Hu basara hindira hu li ma Joakim a mulna hu Yudana, Nabukodonosor, mul ma hu Babilonna mbay hu Yerusalem hin tlaɗu.

² Bu Suuna ɦam Joakim, mul ma Yudana hu duk komu, tlesuu sunda hu zira vi Lona nde lay. Nam tuɗ tle asina ha ki hu mbassa Siniara, hu zira vi loogi suu ɦawana, nam hin cuk tle asina hu zira ŋgayra vi loommara.

³ Mulna ɦal voɗta maŋ sa ma ŋgol suu sun mamba ana nam yow gor kem suu Israel suu ɦiw aya, ko lini suu usi ay hu deera begera.

⁴ Gor njufii suu dla ay ka egesiɗina, suu a iriŋ golosi jivina, suu ki haɗi u yal dlara halaŋŋa, suu wi u dlara ki cocona, suu hum u haɗta ki u saɓakŋa a asi kak hu taraŋga vi mulna a asi haɗasi dlara u vun ma vi suu Kaldeenna.

⁵ Mulna ɦal voɗta ana asi ɦasi u ti mamma, u sum mamma nde nde, haɗasi basara hindi kay asi hin gijaŋ sunda vi mulna.

⁶ Duk ɦoŋ kem ndaɗta goryoŋ Yudana ɦiw ka huwa, Danyel, Hananiya, Misael u Azariya.

⁷ Ŋgol asgaa ma vi mulnana tinisi semma kasiya, nam tin sem Danyel ana Beltasar, sem Hananiya ana Sadrak, sem Misael ana Mesak, hin tin sem Azariya ana Abed Nego.

⁸ Doli ɗi ni, Danyel ɓak hurum kurufu ana nam ka a ɓeŋ tam ki u ti ma vi mulnana u sum veŋ mammaɗi. Nam di ŋgol asgaa ma vi mulnana ana nam ka min a ɓeŋ tam kiɗi.

⁹ Lona ɦal heɓpa u eŋga maŋ Danyel fok ŋgol asgaa ma vi mulnana.

¹⁰ Ŋgol asgaana di Danyel ana, «An li ndaana ni ana ko mul man ma ɓak ay kay funa u sum maŋŋa na waŋ aŋ mbuɗ ki hahaw su gor kem suu ko aŋ nana, a aŋ mbuɗun sa ma cona, gusun yan ki fok mulnaɗi.»

¹¹ Danyel di asgaa ma ŋgol asgaana tinim a gol ugi Danyel, Hananyia, Misael u Azariana ana,

¹² «Tuk suu sun maŋga ii buuna doogo. Ko asi ɦami a tira ni derekka u yona.

¹³ Aŋ hin golomi saa mamira u saara vi gor kem suu ti funa, ci sum ma vi mulna lay na. U dlara aŋ hin waɗta aŋ hin li dlara eg suu maŋ suu sunda tuwa.»

¹⁴ Nam hum usi kay boy namma hin tukusi ii buuna doogo ko ndaɗta na.

¹⁵ Tew buu ma doogona ki tew ni, asi golosi wanni asi ka saa kay vaɗi, saarasi jivi suu gor kem suu ti funa vi mulnana na ɗow.

¹⁶ Asgaana tli funa u sum masina ki ta ni, hin ɦasi ni derekka.

¹⁷ Doli ɗaŋŋi maŋ gor suu fiɗi asina Lona ɦasi yalna, haɗasi yalna a wi dlara. Maŋ Danyel may ni nam wi u dlara tak taɗ ii suunara, wi u doyra di suunara ki lay.

¹⁸ Tew ha ki fun buu ma mulna ŋgaam ana asi hin ɦamsina haa na may ni, ŋgol asgaana tuɗusi ha fok Nabukodonosor.

¹⁹ Mulna ɓak u asiya, dukusi halaŋŋi nam fi sa ka ko ndal Danyel, Hananyia, Misael u Azariya naɗi. Asi li sunda vi mulna.

²⁰ Hu dlara yalna u saara fiyekka, mulna faɗta halaŋŋi, nam halaɗ uɗ ni funusiya. Nam golosi wanni asi saɓakasi suu kay suu kaɓakŋa hu liimmana ii va ma doogo doogo lay.

²¹ Danyel kak hu li namma ta ta daɓ basara jewra vi mulna Syrussa kiyo.