AMOS 9 - Boy Lonana

Dlara tak taɗ a vadllara, givin ma togolla ɓeŋ kiyo

¹ An wi malanna coli kolo kay givin ma togolla, di ana, Waɗ yam goŋga, vun goŋga hin geŋeɗa. Yow suu ŋgolo suu fok ndarayasinana ki halaŋ. Suu hiŋŋa an hin casi ki u ŋgewra, sa dukusi dew lay hin ka tew a ŋgay tambi, dukusi ni sa dew lay hin ka suɗɗi.

² Lini asi hal a kal ay ki duk suu miɗina lay ni, an hin vasi kaŋga u konu. Lini asi ɗiŋ kolo huulona lay, an hin hoŋosi ay ki kaŋgaa.

³ Lini asi ŋgay tasi ha ki kolo kay ɦinira Karmella lay ni, an hin halasiya, yowosi ay ki kaŋgaa, lini asi ŋgay tasi ki irin kaŋga duk mbona lay ni, an hin ɦal voɗta ha maŋ guyna nam eɗesiya.

⁴ Lini asi cuk tasi morɓiina fok suu babali masisina lay ni, an hin ɦal voɗta ha casi ki u ŋgewra. Irin hin li tinira kasi na ta, ka lasi dlara jivi egesiɗi may, lasi ni dla cora na ɗow.

Bu Suuna malaŋ lina

⁵ Bu Suuna, Lona ma Saɓakŋa Kom Belna, tin kom kay ndaŋgara kolo ndaɗ ka dlakka, suu kaɗna halaŋ mbuɗ ki hahawra, ndaɗ tli kolo u ŋgoloɗ halaŋ ko ndal lumma na, ndaɗ hoŋ ndi kaŋga ko ndal lum ma Egiptena na.

⁶ Sa tin jaŋla mamma kolo huulona, min ziim kay ndaŋgara may, sa yi mbo ma hu lumma ŋgolonana tli yam ndaŋgara ki u namma sem ana Yawe.

Lona hin gaɗ suu dlara vasina

⁷ Irin anni agi ka ni ko ndal goryoŋ Koushna na, goryoŋ Israelna, Yawe di na. An sel suu Israelna ay ka ki hu Egipte ni anɗi su? An sel suu Filistinna ay ki hu Kaftor, suu Aramma ay ki hu Kir, ni anɗi su?

⁸ Gola ii Bu Suuna, Loonna, ka tini kay mulla dlara vaɗta, an hin bulumuɗ ki kay yam ndaŋgara, na may ni an hin ka bulum ziŋ Yakobma ki halaŋ gawɗi, Yawe di na.

⁹ Gasi, gologiya, an hin ɦal voɗta, an hin dlamaɗ suu Israelna duk ɦoŋ suuna halaŋ ko ndal yik wana hu bewra ka hin ŋgetlna cuk kaŋga duk kira na.

¹⁰ Suu man suu dlara vasina halaŋ hin miɗ ki ni maɗ ŋgewra, asi di ana, «Nam hin ka mbayɗi, dla cora hin ka mba kaygiɗi.»

Lona hin holoŋ mulla vi Davidta balamaɗu

¹¹ Hu buu namma ni an hin tli yam zira vi Davidta bowira kiyo, an hin miniɗ iriɗ ma bow kina lay. Min tlesuu ɓeŋ kina lay, an hin hoŋoɗ minda ko ndal ndaɗ ay jewra na.

¹² A asi fi suu Edom suu hinna lay, li ma suuna humun sen ki hurumma halaŋ. Yawe di na. Hin a li dla ndaɗta ni namu.

¹³ Gologiya, buuna ka mbaa, Yawe di na, hu buu namma sa zumma gol sa feɗta ni na ŋgem, sa siira gol sa zaara ni na ŋgem, sum ma jivina hin soo ay kaŋga kay ɦinira, yam ɦinira dew dew bel.

¹⁴ An hin mbuɗ ɦalla vi suu man suu Israelna kiyo, asi hin hoŋ ɦoŋzi ma ɓeŋem kina minda, kak huwa. Asi hin pi ŋgusu gugutlura a hin caɗ sumuɗta, asi hin horok senena, tam vuɗum may.

¹⁵ An hoŋosi kay ndaŋga masira, sa hin ka dikisi ki kay ndaŋga masira oloɗi, ndaŋga mayra an ɦasirara. Yawe, Looŋŋa, di na.