AMOS 8 - Boy Lonana

Dlara tak taɗ a fiɗira, kaalamba u vuɗ tlena

¹ Gola ni dlara Bu Suuna, Loonna, takanda an waɗta, kaalamba u vuɗ tlesuu vun wallana huruɗu.

² Nam di ana, «Aŋ wi ni mege, Amos?» An dam ana, «Kaalamba u vuɗ tlesuu vun wallana huruɗu.» Bu Suuna dan ana, «Suu man suu Israelna daɓ masira mba wa, an hin ka hoŋ ay kasi a mbara oloɗi.

³ Suu gi soolla hu zirana hin oy hu buu namma. Yawe, Loonna, di na. Suuna bolowo hin miɗ kiyo, vun suuna hin seŋ ki hu lina bel.»

Godlomba vi suu paara

⁴ Humugi boy ma wanna haa, agi suu vagi tagi kay suu hawra dlaɗ dlaɗ a bulumugi suu lalam suu kay mbassana kira.

⁵ Agi suu di ana, «Vun tilna hin daɓ ki ni saɓage? Ami hin gus wana ki may buu ma vi Lonna hin daɓ ki ni saɓa ami hin mal vun sawal wa blemina nige, hoŋ ŋgoɗta ŋgara ki kaŋga may, cuk begera kam may, ka tli nekka u kilona oloɗi kay nam kaboyo.

⁶ Gus suu hawra ki u gursura. Sa hawra gusum ki u tuburuna. Aygi hin gus bara wa blena ki lay.»

⁷ Yawe suu tam kay ŋgatara vi Yakobpa ana, nam hin ka maa dlaasira cora ki dewɗi lay.

⁸ Kay ndaɗta ndaŋgara hin ka dlak ki su? Suu huruɗna halaŋ hin mbuɗ ki hahawraɗi su? Ndaɗ hin tli kolo na feel ko yo lumma na. Ndaɗ hin tli ay koloo, hin hoŋ ndira kaŋga ko lumma Egiptena na.

Buu ma vi Yawena hin li ni buu ma hahawra

⁹ Buu namma hin mbaa, Bu Suuna, Loonna, di na. Hu buu namma ni faɗta hin ca faali may ni lina hin mbuɗ ndufunda gaw, ndufunda hin mba kay ndaŋgara ni faali njalak njalak.

¹⁰ An hin mbuɗugi poy magira ki hahawra, soolla agi gaɗta hin mbuɗ ki ni yoo tara. An hin tinigi sawalna kay ufurugiya. An hin welegi yagi ki halaŋ halaŋ, agi hin ziriɗ ko ndal hahawra laɗ kay maɗ goo ma dewnara na, dlara hin mbay daganda hin li ni ko buu ma yoo tara na.

¹¹ Gola, buuna ka mbaa, Bu Suuna, Loonna, di na, an hin cuk mayra kay yam mbassa, ka ni may funa holɗi lay, ka ni may yo ma cira holɗi lay, ni mayra ka hum boyna vi Yawe.

¹² Asi hin tuɗa, viriw fun mbo lumma ŋgolna ta ta tew fun mbo lumma ŋgoo hiŋŋa, ta ta mbayawi, ta ta tew u faɗ maɗiiya, a hal boy ma vi Yawena, na may asi hin ka fambi.

¹³ Hu buu namma ni gor wayagina u jiv masina, gorzoŋina hin miɗ ki ko laa yona.

¹⁴ Suu suu tasi u loogi suu vi suu Samarina suu di ana, «Ko Looŋŋa kak iiriya, Dan,» ɗowba, «Saɓakŋa vi Bersebana ka a fafaɗtana,» hin ndi kaŋgaa ka col kolo oloɗi.