AMOS 7 - Boy Lonana

Dlara tak taɗ ii Amos jewra, baarina

¹ Gola ni dlara Bu Suuna, Loonna takandara. Nam mbuɗ baara hu li ma usuna gijaŋ dayrana. Ni hu li ma usuna day ay balam mulna hu li ma nam si haɗ ma jewna ki huna.

² Baarina ti usu ma hu mbassana ki halaŋ, an di ana, «Bu Suuna, Loonna, ɦan gira, an ceneŋu, na ni Yakob hin col fokoŋ su? Nam goo cocoo.»

³ Yawe hin hoŋ tii tamu, «Dla ndaɗta ka liɗi.» Yawe di na.

Dlara tak taɗ a mbara, u kura

⁴ Gola ni dlara Bu Suuna, Loonna, takandara. Bu Suuna, Loonna, min a kaɓakŋa u kura ka ŋgal hu zul ŋgollara ta ka ŋgal yam mbassara.

⁵ An di ana, «Bu Suuna Loonna, cola, an ceneŋu, na ni Yakob ndak a col fokoŋ su? Nam goo cocoo.»

⁶ Yawe hin tii tamu, «Dla ndaɗta lay ni hin ka mba oloɗi.» Bu Suuna Loonna di na.

Dlara tak taɗ a hindira, kawi ma tlawna

⁷ Gola ni dlara nam takanda an waɗta, Bu Suuna u tamba coli kolo kay gulumunna, u zew ma ɗegee gulumunna kom viiya.

⁸ Yawe dan ana, «Aŋ wi ni mege, Amos?» An di ana, «Zew ma ɗegee gulumunna.» Malanna dan ana, «Gola an mbay cuk kawi ma tlawna duk suu man suu Israelna. An hin ka hoŋ ay kasi a mbara oloɗi.

⁹ Li ma mbuy ma vi Isaakŋa hin bulum kiyo, givin ma togolla ma Israelna hin bulum ki hu li ma an hin col ay kolo u ŋgewra kon kay suu vi Jeroboamma.»

Asi dik Amos ki hu Bethel

¹⁰ Mul ma li ɓivunna hu Bethelna, Amassiya, sun ha ana tuɗ di Jeroboam ma mul ma Israelna, «Amos ka laŋ boy cona egeŋ kay mulla hu Israel. Suu hu mbassana ka vi tasi kay boy ma nam damma oloɗi. Kay Amos di anaba.

¹¹ Jeroboam hin cam ki u ŋgewra, suu Israelna halaŋ hin yowosi tuɗusi ha ki eg ndaŋga masira na day.»

¹² Amassiya di Amos ɗaŋŋi ana, «Tuɗa, sa wi dlara, suɗ taŋ ha ki hu mbassa Yudara tana, aŋ hin fi vunuŋ ma tira hin jok boyna ha ki tana lay.

¹³ Na may kaŋga Bethel tani wanni aŋ tin uŋ a jok boy namma ki oloɗi kay ana ni givin ma togolla vi mulnana, ni ziŋ mulnana.»

¹⁴ Amos hoŋ dira maŋ Amassiya ana, «An ay ka sa jok vun Lonaɗi, ka goŋ sa jok vun Lonaɗi lay, an ay ni sa taa yoona, anni sa pi ŋgusu tulumma.

¹⁵ Na may Yawe tlan ay ni ŋgoo u yoorina. Yawe hin dan ana, tuɗa, jokon boy manna ha ki maŋ suu man suu Israelna.

¹⁶ Cecem wanda ɗaŋŋi aŋ hum boy ma vi Yawena. Aŋ di ana, Aŋ hin ka jok boyna ki maŋ suu Israelnaɗi, ka gi vunuŋ kuf kay zi ma vi Isaakŋaɗi.

¹⁷ Ni kay ndaɗta Yawe ɓak anaba, Caaŋga hin ndi ki gawlaŋga hu ɦoŋzina, goryoŋ suu njufiina u suu gorɓiina hin casi ki u ŋgewra, ndaŋga maŋga hin ɓorowoɗ ki u zewna. Aŋ may ni hin miɗ ki ni kay ndaŋgara cora, suu Israelna hin yowosi tuɗusi ha ki eg ndaŋga masira na day.»