AMOS 6 - Boy Lonana

Heɓpa bay uɗta

¹ Hahawra ka kay suu tin u heɓ masira kay Siyonna. Suu ɦal hurusi a kak u heɓpa kay ɦinira Samarira. Asi suu ŋgolo suu jew duk suunana. Suu hu zi ma Israelna mbay ni egesiya.

² «Asi di ana tuɗugi ha Kalani gologiya, hu li namma agi hin tuɗugi hu Hamat ta ŋgolla, hin jakagi ha Gat ta vi suu Filistinnara, na ni ɦoŋzi namma bege suu suu muli suu wanna su? Ndaŋga masira ŋgol suu ndaŋga magira su?»

³ U yal ma agi halam a zuɗ buu ma cona ha ki egegira agi ɦuɗugi mulla yara ay egegi ni ɦuɗiya.

⁴ Buuri kay lay kawina, ɓalaɗi kaŋga kay ses ma fiyekŋa u vun digisiya, asi hoɓ hayasi u tliw gor ŋgeki suu jeŋ wilina, u gor mbutli suu ɗoori suu hu katlaŋgana.

⁵ Asi jok yam suuna ki u bu diŋŋa, soolla ko David na u delesiya.

⁶ Ci sum veŋŋa hu koɓma, mbuɗ tasi his fayaɗta u mbul vuɗ tlesuu jewna, na may ka wi ana ni ganyamba a ɓeŋ Yosef kiraɗi.

⁷ Ni kay ndaɗta cecem wanda, asi hin yowosi ki fok jew suu a yowosina, ni na hin li luu ma furira kay suu ka li sunɗina daɓ ki wa.

Ɓeŋga Samarira

⁸ Yawe, Lona ma Saɓakŋa, suu tam di ana, anni ma a Yakob ŋga tam u namma, an noyom hu ziimu an hin hinim ɦoŋ ziimma ki u ŋgolom halaŋ. Yawe di na.

⁹ Li ni suuna hin hu zi ma dewna wa doogo ni asi hin miɗ kiyo.

¹⁰ Li somoyoŋ sanana tlam matam ha ki keŋ zira a ŋgalam kira ni, asi di sa ha hu zira dukŋa ana, «Sa hin ha ka egeŋ olo su?» Nam hin hoŋ dira ana, «Ki daɓiya.» Asi hin di ana, «Seŋegiya.» Sa ka yi sem Yawe oloɗi.

¹¹ Gasi, gologi Yawe ka ɦal gaɗta. Nam waɗ na ni zira ŋgolla bow kaŋga gaw, ta goora wak ki lay.

¹² Na ni kulumina jaŋ kay gogoyra su, na ni suuna ndak a zum u mbutlina kay gogoyra su, a agi mbuɗugi ma ɗegeena ki ma cona, vuɗ gu ma jivina ki ma ci suuna su?

Saɓak ma ɦawana

¹³ Agi furuyugi kay Lodabar ni ɦawaa, agi ana ni u saɓakami ami li duu ma Karnaim saɓak ma mbana ni naɗi su?

¹⁴ Gologi an wan ɗaŋŋi, an hin li yara u agi suu Israelna. Yawe, Lona ma saɓakŋa, di ana, njaf suuna hin lasagiya, col ha mbayawna day ta ta ii ma dalina.