AMOS 5 - Boy Lonana

Yoo tara hahawra kay Israel

¹ Humugi boyna haa, yoo tara an tinigira kagira, zi ma Israelna.

² Ndaɗ ndi kaŋga wa, ndaɗ ka col kolo oloɗi, go tamara, Israella, ndaɗ ka kaki kay ndaŋga maɗta. Sa ka coloɗ koloɗi.

³ Kay Bu Suuna, Lona, ɓak ana, Hu ɦoŋzi ma yow suuna buɓma hin hin huni kis daŋ. Hu ɦoŋzi ma yow suuna kisna, suuna hin hin huni doogo daŋ, hu zi ma Israelna.

Halagi Yawe agi hin kak iiriya

⁴ Ni ko ndaɗta na Yawe ɓak kay zi ma Israelna anaba, halangiya, agi hin kak iiriya.

⁵ Na may halangi hu Bethelɗi, kalagi hu Guilgalɗi, tlagi hu Bersebaɗi, kay ana li ma Gilgalna hin tlam ki halaŋ, Bethel hin mbuɗ ki suluku.

⁶ Zi ma vi Yosefna, halagi Yawe, agi hin kak iiriya. Gologi tagi jiviya ka nam tak saɓakam ki, ko ndal kura ŋgal tlena, sa ka caɗ kiɗi hu zi ma Bethelna na.

⁷ Asi mbuɗ ma ɗegeena ki va ci suuna bulum gasira ki kaŋga duk ndaŋgara.

⁸ Nam li ciciwra, dumussa u tawla kadara, ma mbuɗ ndufunda ki kiɗikka vun maɗiirara, ma mbuɗ faalira ki njeŋgera warra, nam ma yi yo ma ay hu lum ma ŋgolna mba njayam ki kay yam ndaŋgarana, nam yi sem tam ana Yawe.

⁹ Nammi sa hin suuna ɦurum suu saɓakŋa kina, ɦurumba mal voɗta a kal hu zi ma saɓakŋa.

¹⁰ Asi ka min sa kaɓakŋa u voɗommaɗi, sa ɓak boyna u jivimmaɗi.

¹¹ Na ɗaŋŋi agi yowogi tlesuu vi sa maŋinana kiyo, agi yowom ii waam ma ki lay. Zigini mam suu mini u gogoyra ceɗirana agi hin ka kak huɗi. Ŋgus gugutlu mayra jivira agi paɗta hin ka cagira sumuɗɗi.

¹² Kay ana an wagi bolow yaagira u ŋgol suluk magina. Agi suu lagi dla cora eg suu jivinana, babalira vi suu jivina, agi gusugi kay suu hawra fun li ma ɓakŋa.

¹³ Gola ni kay ndaɗta, hu li ma sa dlara vamma seŋ tamu, kay ana ni li ma hahawra.

¹⁴ Halagi dlara jivira, halagi dla coraɗi a agi kak iirira, ko ndaɗta na Yawe, Lo ma saɓakŋa, hin kak u agiya, ko agi dira na.

¹⁵ Noyogi dla cora kiyo, minigi ni dlara jivira, kaagi ɓakŋa u voɗomu, kala Yawe Lona ma saɓakŋa hin wi hahaw suu hin vi Yosefna.

¹⁶ Na ɗaŋ, Yawe, Lona ma saɓakŋa, malanna, ɓak anaba, Hu lina halaŋ suuna yoo tasi hu voɗta halaŋ, asi hin di ana, Ҥii! Ҥii! Asi hin yi sa horokŋa ay hu li ma hahawra, hu li ma yoo tara suu yasi ayna hin yoo tasiya.

¹⁷ Hu sene gugutlura halaŋ suuna hin yoo tasiya. Hu li ma an hin jak varakŋa, Yawe di na.

Buu ma vi Yawena

¹⁸ Hahawra ka kay suu ka juɓ Buu ma vi Yawena. Jivi mamba ni mege? Buu namma hin lagi ni me egegi ge Buu ma vi Yawena? Hin li ni ndufunda, ka kiɗikkaɗi.

¹⁹ Ni ko ndal sa warna liŋ ki ko dlonara na, bosokona hin ŋgafamu. Nam kal vo varam kal ni ɦek kom ay eg gulumunnara na, nam guyna eɗem may.

²⁰ Hin ka li ni ndufundaɗi su? Hu Buu ma vi Yawena ka ni kiɗikkaɗi, ndufunda, kiɗik ka na ndeɗi.

Ɓivun ma ka ii Lona jiviɗina

²¹ An ka mindi. An ka min poy magiraɗi. An ka min a his tok magira cuk ay kanɗi lay.

²² Hu li ma agi langi ɓivun ma ŋgalam kina, u ɓivunna u njaf wana halaŋŋi va an furiyum na dew kaɗi. Ɓivun magi ma u mbuuri suu mbulna cocona lay, ni irin ka golombi.

²³ Ҥuɗugi vun magi ma agi lam u soolla kuuna ha ki egenu. An ka min hum del diŋ magi ma luunaɗi lay.

²⁴ Na may, ko sa ɗegeena li u saɓakŋa ko yo ma ɓaɗna na, gasira ko ndal mbo ma ka ci kiɗina na.

²⁵ Na ni agi langi ɓivunna u ɦalla ɦawara ay hu fulla hu basara dok fiɗira ko su, suu Israelna?

²⁶ Na may agi tlagi Sakut a mul magina, Kewan foto lo ciciw magira ma agi minimma.

²⁷ An hin yowogi tuɗugi ha ki ŋgoo Damas dagani, Yawe di na. Lo ma saɓakŋa ni semu.