AMOS 4 - Boy Lonana

Boyogi suu Samarina

¹ Humugi boyna haa, dogoni mbutli suu Basanna, agi suu ti haɗna ay kay ɦinira Samarira doorogi suu maŋina kiyo, lasagi suu hawra lay, dagi malayagina ana, ɦal ay tlesuu cira.

² Yawe suu tam hu teteɗ mamba anaba, gasi gologi buuna ka mbay kagiya asi hin taɗagi ki u jambatta, suu kay ceregina asi yowosi ki u ɓagina.

³ Agi hin selegi ki ii ɦoloɗ gulumunna gegelay kay tamu. Asi hin cukugi ha ki hu kaa ma mbayawna. Yawe di na.

Ɓivun ma bay umma

⁴ Mbagi ay hu Bethel lagi yara, zulugi u yagira hu Guilgalla ha foko, lagi ɓivunna maɗii tew tew, hu buu ma hindina ɦagi yam waagina.

⁵ Ŋgal ɓivun ma bay kuffa dukumma a vi galamba, ɦagi tlena ɦalla ɦawara ki ii suuna kiɗiki, kay ana agi minigi suuna ni ko ndaɗta na, goryoŋ Israelna, Bu Suuna Lona di na.

Israel hoŋ ay ka eg Lonaɗi

⁶ Ni an daŋ may, ɦagi va ka agi gi kay siigi hu ɦoŋziiginaɗi halaŋ halaŋŋi anu, mayra cagi agi ka fi fu ma tiraɗi hu ziigi halaŋ halaŋ, na may agi hoŋogi ay ka egenɗi, Yawe di na.

⁷ Ni an daŋ may, doorogi yona ka si kagi ŋgolɗi ni anu, tilna hin fok hindi a gijaŋ tlena feɗtara, an si yona ka kay zi maa dew may, hin maa ki mayraɗi, sene maa ɦiw yona si hu may, maa ɦiw yona kaɗi, so ki mayraɗi.

⁸ Ҥoŋzina mba' ɗowba hindi viriw na cow, tuɗ hu ɦoŋzi ma hiŋŋa joɓ yona a cira, fam kaɗi, na may agi hoŋ ay ka egenɗi. Yawe di na.

⁹ An cukugi himiina kagiya. Tlesuu hu sene maginana ka vuɗ oloɗi. Ŋgus gugutlura, ŋgus tulumma, ŋgus conora njufulna tasi kiyo. Na may agi hoŋ ay ka egenɗi. Yawe di na.

¹⁰ An cukugi tuguɗiira cora col ay Egiptera kagiya. An cagi gorzoŋŋii magisina ki u ŋgewra, yowogi kulumi magisina. An pereɗegi his tlesuu buy suu hu mbas magirana ha kagi lay, agi hoŋ ay ka egenɗi. Yawe di na.

¹¹ An bulumugi ki ko ndal Lona bulum suu Sodom u Gomorna kira na lay. Agi ay ni ko ndal vun guna ɓaɗam ay ki duk ku zinana na, na may agi hoŋ ay ka egenɗi. Yawe di na.

¹² Na ɗaŋ, gol lassa an hin lasakka, Israel, ko ndaɗta na an a lasak may ni, min tak a ŋgaf Lookŋa Israel.

¹³ Na ɗaŋŋi gola, sa min ɦinirana, sa li semeɗnana, sa ka tak dlara maŋ sa warna a nam laɗta, sa hu li ma ndufunna nam li kiɗikka layna, sa tuɗ kolo kay lii mbuy ma kay ndaŋgarana, nam yi sem ana Yawe, Lo ma Saɓakŋa.