AMOS 3 - Boy Lonana

Israel hin ɓak dlaaɗta ki fok Lona

¹ Humugi boy ma Yawe ɓakam kagi agi goryoŋ Israelna haa, kay suu an selesi ay ki hu mbassa Egiptera halaŋ.

² An wagi ni agi kay tagi hol, duk suu kay ndaŋgarana halaŋ, ni kay ndaɗta agi hin ɓakagi dlaagira cora ki fokon halaŋ.

Lona ɓak wa, sa jok vun Lona ndak ɓak may

³ Suuna mba' ndak a tuɗ u tasi dew hu li ma asi bay hum tasi kina su?

⁴ Dlona ndak a ŋgoɓ duk gura hu li ma nam vi mbuu kaɗina lay su? Goo dlona ndak a tuk delem ay hu zulum hu li ma nam fi va ka a kombi layna su?

⁵ Layna ndak a cuk sem ay kaŋga hu bayra bay wi va nam komomma su? Bayra ndak a ɗuɗ ki kolo bay vi va su?

⁶ Lini tokolomma ka bu hu ɦoŋzina ni suuna ka mbuɗ ki ndaaɗi su? Lini dla cora mba ɦoŋzina wa ni boy namma Yawe lammi nambi su?

⁷ Kay ana Bu Suuna, Lona ka li dla bay tak dlara hurumba ki maŋ suu mam suu sunda suu jok vun Lonaɗi.

⁸ Dlona ŋgoɓ wa ni, sa ka li ndaaɗina ni gege? Bu Suuna, Lona, ɓak wa, sa ka jokom boy mamma kiɗina ni gege?

Va ka hin hu Samari na ndeɗi lay

⁹ Tiirigi kay zigini suu hu Asdodna, kay zigini suu hu mbassa Egiptera dagi ana, tokogi tagi kolo kay ɦinira Samarira, gologi dla co mayra zeɗ zeɗta toki hura, dlara tiitara ka huruɗ cocoo.

¹⁰ Asi ka u yal ma li dlara ɗegeeraɗi, suu tok dla cora varasi a ɦurum tlena hu ziisina kira, Yawe di na.

¹¹ Ni kay ndaɗta Bu Suuna, Lona ɓak anaba, suu babalira hin ŋguy yam mbassa. Asi hin yowoŋ saɓak maŋŋa kiyo, hin ɦurumuŋ tlesuu hu ziiŋŋa ki lay.

¹² Na ɗaŋŋi Yawe ɓak anaba, ko ndal sa taa yoona ɓaɗ gay yoorina ɗowba keŋ humusi ay ki fun dlonara na, goryoŋ Israelna hin ɓaɗasi ay ki ni na, asi suu ka kagi Samari hu huhuɗuk va ma kakka, kolo kay laynana.

¹³ Humugi haa, ɓakagi ha kay ziŋ Yakobma, Bu Suuna, Lona, Lo ma saɓakŋa.

¹⁴ Ni hu buu ma an hin kaɓakŋa kay Israel kay dla cooɗtana, an hin kaɓakŋa kay givin ma togolla ma Bethelna, asi hin to mek ma hu givin ma togolla kiyo, nam hin cuk ay ki kaŋgaa.

¹⁵ An hin mba dla cora ɦoŋzina hu til semeɗna may hu til faɗta may. Zigini suu mini jivi cocona hin bulum kiyo. Zigini suu mini ŋgolona hin bow ki may. Yawe di na.