AMOS 2 - Boy Lonana

Lona kaɓakŋa kay suu Moabma

¹ Yawe ɓak anaba, Ni kay dla cora laɗ yamba hindira kay dla cora suu Moabma laɗ yasi fiɗira, an hin ka col dukgi, kay ana nam ŋgal sok mul ma Edomma ki buɗna.

² An hin cuk kura kay Moab, ndaɗ hin ŋgal zigini suu vi Keriyotna kiyo, Moab hin miɗ u tiitara, ko yi kolo a duunara na, ko bu tokolomma a duunara na.

³ An hin ci saaɗ ma kaɓakŋa kiyo, suu duuna halaŋ, an hin casi ki u namu. Yawe di na.

Lona kaɓakŋa kay mulla Yudara

⁴ Yawe ɓak anaba, Ni kay dla cora laɗ yamba hindira, kay dla cora suu Yuda suu yara laɗ yasi fiɗira, an ka col dukgi, kay ana asi noy gaɗta vi Yawera kiyo, li ka u gaɗ mambaɗi, kay ana kaboy masina viɗisi ki wa, suu may suu tli dlaŋ somoyosirana.

⁵ An hin cuk kura kay Yuda, ndaɗ hin ŋgal zigini suu Yerusalemma kiyo.

Lona kaɓakŋa kay mulla Israella

⁶ Yawe ɓak anaba, Ni kay dla cora laɗ yamba hindira, kay dla cora suu Israel suu yara laɗ yasi fiɗira, an ka col dukgi, kay ana asi gus sa ɗegeena ki kay gursura, sa hawra ki kay tuɓurura.

⁷ Kay ana asi min a ko gugumma kay suu maŋŋina, asi li ii suu lalamma kay bege masira, ko ndaɗta na goona u bum tuɗ ha ni vi goora dewra a ɓeŋen sen ma teteɗna kira.

⁸ Ni kay barawi suu deŋga suu asi molosi eg givin ma togolla na u sum veŋ ma taaram kaŋga cam hu zira vi loosinara.

⁹ An may ɗaŋŋi ci suu Amoreenna ki fokosiya, suu bibiŋil masira ko ŋgus sedrena, saɓakasi ko saɓak ŋgus ɦoyna na. An kaarasi vuɗusira humusira kiyo, paɗasi saɗayasi ma usina kiyo.

¹⁰ An may ɗaŋŋi selegi ay ki hu mbassa Egiptera hin tuɗugi hu fulla basara dok fiɗi, a tli mbassa vi suu Amorna.

¹¹ Na ɗaŋŋi an mbuɗ suu daŋŋa duk goryogi ki suu jok vun Lona, duk suu jivi coco dukugina, an mbuɗ suu hiŋŋa suu Nazirna. gasi ɗowba ɦawa su? Na ni gasi su, goryoŋ Israelna? Di ni Yawe.

¹² Na may agi ɦagi sum veŋŋa maŋ suu Nazirna, agi ɦal voɗta maŋ suu jok vun Lona, agi ka jokon boy manna ha kiɗi lay.

¹³ Gologi an ka tuɗ ha a cagi ki eg liigira, ko ndal pupus ma nekka hurumma to tlena kira na.

¹⁴ Lii ŋgayra hin viɗ ki ii suu tasi feɗna, sa ɦiŋŋa hin ka li u saɓakam hurumbi, sa wi yal duuna ɦayna hin ka suɗ kiɗi lay.

¹⁵ Sa duu u mbuurura hin ka li kolo coli oloɗi. Sa liŋ cocona lay hin ka suɗ kiɗi. Sa duu u kulumina hin ka suɗ kiɗi.

¹⁶ Sa saɓakam suu kay ndarayam suu duunana hin ŋgay tam um ki siili hu buu namma. Yawe di na.