AMOS 1 - Boy Lonana

Cokira Amos di boy mammara

¹ Boy ma vi Amosna, sa gol timigiina duk suu Tekoana, ma wi tlena ɓakam kay Israel, hu buu ma Oziyas mulna hu Yudana, hu buu ma Jeroboam goŋ Joasna, mul ma Israelna, basara mba' ki fok jew ndaŋgara wiira.

² Nam di ana, Hu Siyon Yawe ka ŋgoɓpa, hu Yerusalem nam ka ɦal voɗta, suu taa yoorina haɗ masina so ki wa. Yam ɦinira Karmella so ki wa.

Lona kaɓakŋa kay suu Arameenna

³ Yawe ɓak anaba, Ni kay dla cora laɗ yamba na hindira, ni kay dla cora suu Damas suu yara laɗ yasi fiɗira, an hin ka col dukgi, kay ana asi ci suu Galaadna ki u njetna.

⁴ An hin cuk kura kay ziŋ Hazaelna ndaɗ hin ŋgal zigini suu vi Ben Hadadna kiyo.

⁵ An hin weles vun grek ma Damasna kiyo, suu hu zi ma ci maɗna wani an casi kiyo. An hin ci mulna kiyo, sa ka ti mulla hu Beth Edenna, na ɗaŋŋi suu Syrina hin yowosi tuɗusi ha ki hu Kir, Yawe di na.

Lona kaɓakŋa kay suu Filistinna

⁶ Yawe ɓak anaba, Ni kay dla cora laɗ yamba na hindira, kay dla cora suu Gaza suu yara laɗ yasi fiɗira, an hin ka col dukgi, kay ana asi yow suuna bolow cocoo, tuɗ cukusi ha ki Edom.

⁷ An hin cuk kura kay kaa ma Gazana, ndaɗ hin ŋgal ziginina ki lay.

⁸ An hin ci mul ma Asdodna kiyo, sa tokolora ka kom hu Askalonna an hin cam kiyo, an hin pereɗ kon kay Ekron, suu Filistinna suu hinna hin miɗ kiyo, Bu Suuna Lona di na.

Lona kaɓakŋa kay suu Fenisinna

⁹ Yawe ɓak anaba, Ni kay dla cora laɗ yamba hindira, kay dla cora suu Tir suu yara laɗ yasi fiɗira, an hin ka col dukgi, kay ana asi yow suuna bolow cocoo, tuɗ cukusi ha ki Edom, saa ka kay galamba duk ɦoŋ tasira wayaraɗi.

¹⁰ An hin cuk kura kay gulumun ma Tyrna ndaɗ hin ŋgal ziginina kiyo.

Lona kaɓakŋa kay suu Edomma

¹¹ Yawe ɓak ana, ni kay dla cora laɗ yamba hindira, kay dla cora suu Edom suu yara laɗ yasi fiɗira, an hin ka col dukgi, kay ana nam dik wayamma u ŋgewra komu, cam ki wam hahawam kaɗi, kay ana yaamba heɓ ka tuɗi, hurum ka yomusna na gak gak.

¹² An hin cuk kura hu Teman ndaɗ hin ŋgal zigini suu Bosrana kiyo.

Lona kaɓakŋa kay suu Amonna

¹³ Yawe ɓak anaba, Ni kay dla cora laɗ yaɗ yamba na hindira, kay dla cora goryoŋ Amonna laɗ yasi fiɗira, an hin ka col dukgi, kay asi wak huu boyogi suu wii suu Galaadna kiyo, a mbuɗ mbas masira ki ŋgollara.

¹⁴ An hin cuk kura kay gulumun ma Rabbana, ndaɗ hin ŋgal ziginina kiyo, hu buu ma hin yi kolo a duunana, hu buu ma babaana paɗ walna.

¹⁵ Mul masina hin tuɗ ki hu li ma mbaɓura lay, nam tamba u suu mam suu duuna lay, Yawe di na.