ABDIYAS 1 - Boy Lonana

Boy ma col ay ko Yawena

¹ Va ma takam maŋ Abdiyasna. Bu Suuna Yawe ɓak kay Edom ɗaŋŋi ana, boyna kaa, a aygi humuygiya, boy namma col ay ni fun Lona, kay ana nam sun mul ma duuna ay duk suuna wa, «Cologi kolo. Tuɗugi tlagi mbassa. Duurugira.»

Yawe ɓak kay a ɓeŋ ɦoŋzi Edomma kiyo

² Na ɗaŋ an hin mbuɗuŋ ki goora duk njaf suuna, ki lalasi, aŋ ki lasi cocoo.

³ Ni ŋga ta maŋga suuŋ dlara kaŋŋi ndaɗu, aŋ mayma ziiŋ ka kaŋga hu zul gogoyra ka kakira kolo kay ɦinira, ka saa «Sa ma hin zuɗun ay ki kaŋgana ni gege?»

⁴ Lini aŋ kaw seŋ eŋga ni ko mbaana na lay hin min ziiŋ ha ni hu ciciwra lay ni, ay kolo hu li namma day an hin zuɗuŋ ay kaŋgaa. Yawe di na.

⁵ Goloygiya, suu kulna ka mbay varaŋu, suu ɦurum tlena njegena, aŋ hin kak na en ɗaŋ. Na ni asi hin ka kul tlesuu asi ndak a yowosina halaŋgi su? Suu feɗ wana sene vi suuna mbay varaŋ wa ni asi hin varaŋ ha hu sene maŋŋa ni ɦelena ɦawaɗi su?

⁶ Ko tlesuu vi Ezawna halasi kira na, bege mamba ay ki ŋgayra cukuɗ ki kiɗiki.

⁷ Asi hin dikiŋ ki hu mbas maŋga, suu vi vunusi u aŋŋa ganaŋ yaŋŋi ganiya. Suu banayaŋŋa yowoŋ tlegeyeŋ wa, suu li ti funa u aŋ dewna ka ndiriŋ gayaŋu. Aŋ wi kaɗi lay.

⁸ Ni gasagiɗi su? Hu buu namma gaw ni Yawe ɓak kay Edom ana nam hin njay suu wi dlara kiyo, yal ma kay ɦinira vi Ezawna ki lay.

⁹ Bigawla maŋ suu duuna Teman hal ta ta hin fi matna, gegelay hin fi matna ay kolo kay ɦinira vi Ezawra.

Edom fi jivira u hahawra vi Israella

¹⁰ Ni kay saɓak ma aŋ lam eg wayaŋŋa Yakobma zolona mba kaŋŋi na, aŋ ki bulumi ni a fafaɗta.

¹¹ Hu buu ma aŋ hin piira tanina, hu buu ma suu daŋŋa yowoŋ saɓak maŋŋa kina, hu buu ma suu dlasi cona sel ay varaŋ hin dlara ka kay Yerusalemma, aŋ may ni ko sa ma ay dukusina na may.

¹² Aŋ furi kay buu ma vi wayaŋŋanaɗi, kay buu mamma hahawraɗi. Aŋ furi coco kay goryoŋ Yudana, hu buu ma baasiraɗi. Aŋ ŋgulusi ŋgol coco hu buu masi ma hawraɗi.

¹³ Aŋ kal hu mbassa vi suu mannara hu buu ma ɓeŋ masiraɗi. Aŋ taŋga gaw ni furi kay hahaw masira, hu buu ma ɓeŋ masiraɗi. Ŋgen koŋ eg va ma saɓakaɗ huna hu buu ma ɓeŋ masiraɗi.

¹⁴ Li colira vun zina na col a ci suu hini irina kiɗi. Suu hinna aŋ ɦasi ki hu buu ma hahawraɗi.

¹⁵ Ҥaa, Buu ma vi Yawena hin tok, buu ma li dla cora eg suunana. Dlara aŋ laɗta, hin laŋŋi na may. Sun maŋga aŋ laɗta hin holoŋ ndi ni kay yaŋu.

Israel hin sa sugulusi u Edom

¹⁶ Ҥaa, ko agi cagi va ma cira ay kay ɦini manda teteɗta, na may njaf suuna halaŋ hin ci na tew tew. Asi ciya, asi hin guruɗ kiyo. Asi mbuɗ ko asi vuɗ ay ka ginɗira na.

¹⁷ Suu usi hinna tuɗ ŋgay tasi ha kay ɦinira Siyonda, ndaɗ hin mbuɗ ki teteɗ. Suu vi Yakobma yow tlesuu vi suu ɦurumusi tlegeyesi ki jewna.

¹⁸ Suu vi Yakobma mbuɗ ko kura na, suu vi Yosefna mbuɗ ko sin kura na may. Suu vi Ezawna mbuɗ ni ko usuna na. Suu vi Yakob u Yosefna mboɗosi ŋgalasi kiyo. Suu vi Ezawna sa hin ka iiri na dewɗi. Yawe di na.

Mbas mayra keŋesira asi hin tlaɗu

¹⁹ Asi tli mbassa vi Edom ta kaŋga ura, ɦinira vi Ezawra, mbassa kaŋga ura, mbassa vi suu Filistinna lay. Asi tli ndaŋgara vi Efrayimba, mbassa Samarira nam Benjamin tli mbassa Galaaɗta.

²⁰ Goryoŋ Israel suu ay ki hu mbassa daŋgana, suu duu asina dik suu Kanaanna ta ta tinisi ha hu Sarepta, suu Yerusalem suu ay ki hu mbassa Sefaradta tli ɦoŋzi ma Edomma umba kaŋgara.

²¹ Suu saɓakŋa ɗiŋ kolo kay ɦinira Siyonda a ti mulla kay ɦinira vi Edomba. Yawe hin vam a mulna.