3 JAŊ 1 - Boy Lonana

Gi deɓpa

¹ Anu an sa gol suu vina vi Lonna ɓii ni maŋ bananna Gayus ma an minim gasina.

² Bananna, an min ana ko dlaaŋga li jivi u voɗoɗu, ko taŋ li ki fani u iiri maŋga lay halaŋ.

³ Gorseŋŋa mba dan ana aŋ ka ɓorow dukuŋ u gasiraɗi, ko aŋ li dlaaŋga ay fok jew u gasira na ni an hurun furi cocoo.

⁴ An li hum ana goryon ka li dlaasira hu gasira ni va ma daŋ ma mbuɗun hurun furi su va namma kaɗi.

Ɗegeera vi Gayussa

⁵ Banan ma an miniŋŋa, dlara aŋ laɗ eg gorseŋŋara ni u ɗegeera eg suu daŋŋa aŋ li ni na lay.

⁶ Asi ɓak kay min maŋga ki fok suu vina vi Lona halaŋ. An joɓoŋ ana aŋ njunusi hu voɗta asi tuɗta ni va ii Lona jivina.

⁷ Asi cuk tasi hu sunda vi Kristu ni ka a suu bay vina njunusi asiɗi.

⁸ Aygi suu taɓi u Yesuna min col sem sun ndaɗta eŋga ni aygiya, ni ana sun masira asi laɗ kay gasira aygi duk may.

Diotref u Demetrius

⁹ An ɓii magaara ha maŋ suu vina vi Lona ka fiyekgi may. Diotref ma min a kak a ŋgolosina ka min a tin yam kay dlaanda an ɓiiriɗ ndaɗtaɗi.

¹⁰ Ni kay ndaɗta an tuɗ ha varagi wa ni an hin dam dlara nam laɗ cora ki halaŋ, boy ma co ma nam yowomma lay, u kaboy ma nam kaaygina egeygina lay, ni dla ndaɗta ndakam ka tuɗi lay, olo ni gorseygi suu daŋŋa nam ka min a vasi varambi lay doo suu may suu min a vasi varasina ki lay. Nam hal a dikisi ki duk suu vi Lonna lay.

¹¹ Banan ma an miniŋŋa, sa ma cona aŋ tlam dlaambaɗi sa ma li jivina aŋ tlam dlaamba. Sa li jivina ni sa vi Lonna, sa li dla cora wi Lona kaɗi.

¹² Suuna halaŋŋi ɓak kay jivira vi Demetriussa, gasira kay taɗta ɓak kam na lay. Aygi lay diki jivi kamu, aŋ wi ana dlara ay ki ni u voɗoɗu.

Gi deɓpa daɓ daganda

¹³ Dlara ka hurun a daŋga cocoo, an ka a ɓiiriŋga ha u yo bikgi.

¹⁴ An wi kan ana an hin a tuɗ ha goloŋ cem cemi ay hin ɓak kay dla ndaɗta duk tay gaw.

¹⁵ Ko aŋ kak u heɓpa. Banayaŋŋa gaŋ deɓ ha sisi may, aŋ gami deɓ mamsina ki dew dew halaŋ may.