2 TIMOTE 4 - Boy Lonana

¹ An suuruŋŋi fok Lona, fok Yesu Kristu ma kaɓakŋa kay suu iirina u suu miɗina hu mbaamba nam hin mbay hu mul mambara.

² Di Boy Lonana col kam eŋe, lini lina ka jivi ɗowba jiviɗi lay, mal huu suuna, yalasiya, gaɗasiya, haɗasi u lalamba jivira.

³ Kay lina hin mbaa suuna hin mbuɗ hum u haɗta gasira oloɗi, asi hin mbuɗ lini u min masira, asi hin tok suu a haɗasina bolow egesiya, suu asina hin dasi dlara asi min a humuɗta.

⁴ Asi hin mbuɗ hum gasira oloɗi, asi hin hoŋ irisi tin saa masira ni kay njun njunda.

⁵ Aŋ may ni kak a ŋgolla vi taŋga daŋ may vi wihawra kaŋu, li sun maŋga, di Boy ma Ayra, li sun maŋga a aŋ sa ma sunda vi Lonna halaŋ.

⁶ Lini anu ni faɗan ndak wa an min a ɦal tan ki a ɓivunna, buurun ma miɗna ndak wa.

⁷ An duu duu ma jivina wa, an tew ki fun li ma ŋgaannana wa, an gol viinda u Lonara wa lay.

⁸ Cecemmi warakŋa ka juɓunu, ni jumba mulla ɗegeera, Bu Suuna ma ɗegeena ma kaɓakŋa hin ɦanda hu buu namma, ka ɦanda ni man an dewɗi ni maŋ suu ka juɓum u minda hu buu ma nam hin hoŋ ayna halaŋ.

Saara kay taŋga

⁹ So taŋ ay a mba ŋgafan zak.

¹⁰ Kay Demas hinin ki wa kay nam min tlesuu vi duliyara ŋgolo, nam tuɗ Tesalonik wa, Kresens tuɗ Galati, Tit tuɗ Dalmati may.

¹¹ Luk hin egen tani dew ni namu aŋ mbay u Mark uŋu, kay nam hin ndak a njunun hu sunda.

¹² An sun Tisik ha Efes.

¹³ Aŋ a mbayra wanni yowon baraw man ma semetna ma an hinim ha Troas vi Karpusna aya, yowon magaarina ay koŋ may, saɓaki ni suu ɓiiri hu ɗikkana.

¹⁴ Aleksandre ma dli caffa lan boy cona egen ŋgolo, Bu Suuna hin warakam kay dlaamba nam laɗta ni namu.

¹⁵ Gol taŋ egem jiviya, kay nam li dla cora ni eg dla mayra ay ka daɗta halaŋ.

¹⁶ Hu li ma an di ay ki kay viinda ni sa ma njun ay un kaɗi, an ay fun dlaanda ni u dew tanu, suuna halaŋ noyon kiyo. Ko Lona ŋga co ndaɗta kasiɗi.

¹⁷ Bu Suuna mbay egen tok njunun ni namu, kay an ndak a di boyna maŋ suu ka njaf suu Juifnaɗina, asi humum ki halaŋ, nam suɗun ay fun dlona.

¹⁸ Bu Suuna suɗun ki ko cora halaŋ an kal hu mul mamba kolora u tanda jivira. Ŋgolla ni mamba a fafatɗa, Amin.

Gi deɓpa daɓ daganda

¹⁹ Gi deɓ Prisiye u Akilas u suu vi Onesiforna may.

²⁰ Erast hin ha Korint, an hin Trofim ha Milet may kay nam tuguɗiyo.

²¹ So taŋ a mbay ki egen jew u vun semeɗna. Eubulus, Pudens, Linus Klaudiya u gorseygi suu daŋŋa halaŋ gaŋ deɓpa.

²² Ko Bu Suuna kak u aŋu. Ko oora kak u agiya.