2 TIMOTE 3 - Boy Lonana

Buu ma daɓ daganna

¹ Humuŋ gaŋ kay boyna wanni, buu ma hin daganna wanni dlara loɓma ka huwa.

² Suuna hin mbuɗ ki ni kurufuku, li banara ni u gursura, tli yam tasi koloo, ŋga tasiya, asi, hin duu u Lona, ka hum u somoyosiɗi, asi ka gi deɓ kay tlenaɗi, ka li zolo kay tlesuu teteɗnaɗi lay.

³ Hurusi mbuɗ ki coo, ka wihahaw saɗi, suu ŋgul suuna, suu ɓeŋ tlena vi suuna, suu ci maɗna, li gonokka u jivira.

⁴ Asi hin a suu di kolokŋa, ka hum vun saɗi, ŋga tasiya, asi min a li dlara u min masira su Lona.

⁵ Asi li ko asi vi u Lona na, na may ni noy saɓak vira kiyo, aŋ taɓ u suu asinaɗi.

⁶ Suu daŋŋa dukusi ɦiw cuk tasi kalafi hom yam boyogi suu maŋina usiya, asi hoɓi u cora taɗ u saara cora dadamba.

⁷ Boyogina hal haɗta tew tew ni ka ndaki a wi u gasiraɗi.

⁸ Ni ko Jannes u Jambre min boyna vi Moizɗira na, asi suu asina ka min gasiraɗi ni na may, ni suu u saara cora hurusina, vira u Lonara irisi ni va sanda ɦawaa.

⁹ Asi hin ka tuɗ dayɗi kay suuna halaŋ hin wi giniŋ masira, ni ko Jannes u Jambre li ayra na may.

Gaɗta do daganda

¹⁰ Aŋ may ni hum u haɗ manda poy manda u daŋmay manda u viinda u lalam manda u min manda, aŋ col eŋ ko an na may.

¹¹ Aŋ may ni hum u las manda u wihaw manda. Aŋ wi dla mayra li ay egen hu Antiok u Ikonium u Listra halaŋ, u lassa an siɓiɗ hu li nammara. Bu Suuna suɗun ay ki ko dla ndaɗta halaŋ.

¹² Suu min a kak u iirira ɗegeera, u ɗilira eg Lona u taɓpa u Yesu Kristura hin fi lassa halaŋ.

¹³ Suu hurusi cona u suu ganyam suuna asi tuɗ fok u cora, ganyam tasira hu may.

¹⁴ Aŋu lini u va ma aŋ haɗamma vi um u huruŋ halaŋ kay aŋ wi sa ma aŋ haɗ umma.

¹⁵ Aŋ wi magaara gaɗta teteɗta ay ni u goo taŋ day, ndaɗ ndak a ɦaŋ nera a tuɗuŋ hu suɗta u vira aŋ vi u Yesu Kristura.

¹⁶ Magaara vi Londa ɓiiri halaŋŋi nam fo musuk mamba kaɗu, ndaɗ jivi a haɗ gasira kay gaɗ sana takam coomba a nam kak jivi ɗegee.

¹⁷ Kay sana vi Lona mba li ki mini jiviya, tok a li sunda jivira halaŋ.