2 TIMOTE 2 - Boy Lonana

Asgaa ma jivina vi Yesu Kristu

¹ Aŋ, goronu, so taŋ u boyna vi oora ta aygi faɗ hu taɓpa u Kristu Yesu dewra.

² Va ma aŋ humum funun an dam maŋ suu molina, dam ki maŋ suu tin hurusi kay boy namma, suu ki ndaki a hin haɗ ndarayasi suu daŋŋa mayna.

³ Vi wihawra kaŋu ko sa ma asgaana vi Kristu Yesu na.

⁴ Sa ma asgaa ma gasina li va ma nam a li ii malamma jiviya, ni nam ka kal hu sunda daŋgi.

⁵ Sa ma liŋŋa lini nam ka liŋ jivi u voɗombi ni nam ka fi warakŋaɗi.

⁶ Sa ma horokŋa li sunda hu sene mamma loɓ cocoo, ni nam hin gijaŋŋa a feɗ tlegeyem ki vo jew ni namu.

⁷ Aŋ saa kay va ma an dam wanna, Bu Suuna hin mbuɗuŋ saɓakŋa a hum u boy namma ki ni namu.

⁸ Humuŋ gaŋ kay Yesu Kristu paɗ ay ki kolo hu miɗna iiriya nam ay ni hu njaf David ko Boy ma Ayra ma an damma dira na.

⁹ An wihawra ka njuni kaŋga u galina kay an ka di Boy ma Ayra namma ko sa ma li dla cora na lay ni Boy Lonana ka njuni kaŋgaɗi.

¹⁰ Kay ndaɗta an ka siɓ dla ndaɗta halaŋŋi jivira kay suu Lona manasina, kay asi mba fi suɗta hu Kristu Yesu may, u ŋgolla ka daɓ kiɗira.

¹¹ Boy namma wanni boy ma gasina, «Lini aygi miɗ u namu aygi hin kak iiri u nam lay.

¹² Lini aygi kak ɗiliya aygi hin taygi mulla u namu, lini aygi hinim kiyo, nam hin hiniygi ki may.

¹³ Lini aygi ka ɗegeeɗi lay nam ka ɗegee tew tew, nam ka garak u dlaamba nam laɗtaɗi.»

Sa sun ma Lona minimma

¹⁴ Gasi humusi halaŋ dasi ki eŋe fok Lona kay asi mba ɗeɗ duk tasi kay boynaɗi. Ɗeɗna wanni ka li vaɗi ɓeŋ suu humumma ki ni ɓeŋi na ɗow.

¹⁵ So taŋ a tak taŋ ki fok Lona ko sa ma ndakina na, sa ma li sunda ka li zolo kay sun mambaɗi, di boy ma gasina ki u voɗom ɗegee.

¹⁶ Hin ciwayra ɦawara ka u Boy Lonana ɗira kiyo. Kay suu min boy namma hin Boy Lonana ki ni hini na ɗow ɗow.

¹⁷ Va ma asi ka haɗamma ni ko mbil ŋgolna kom tliwna kira na, duk suu asina ni ki Himene u Filet.

¹⁸ Asi viɗ tasi ki hu gasira, viɗ suuna ki ŋgolo hu vira, di ana paɗta kolora li ki wa.

¹⁹ Ni kay ndaɗta u zira Lona gaɗ namba coli jiviya, boy ma fok namma ni «Bu Suuna wi suu mamma, suu di ana asi ni vi Bu Suuna na halaŋ noy cora kiyo.»

²⁰ Hu zira ŋgolla ni tlesuu li tina ni ka suu lor u kawina doy holɗi, tlesuu guna u luɓuna ka lay. Ma jewna tinimmi kay luu ma ŋgolla. Hiŋŋa ŋgaɓi ni kay sunda hu buuna tew tewra may.

²¹ Lini sa ma mbuɗ tam ki jivi pasiyak ko cora an ɓak kaɗ wanda, nam hin fi ni sun mamba kay tamu kay nam ɦal tam ki ni maŋ malamma bel, nam irim jiviya, nammi tok a ɦam sunda gaw, kay nam minimu, ni kay sunda jivira bel.

²² Hin dlara aŋ laɗ u zoŋoŋga ki bel bel, hal ɗegeera, vira, minda u heɓpa u huruŋ ki pasiyak taɓi u suu ka yi sem Bu Suunana.

²³ Noy ciwayra laɓara u giniŋga kiyo, aŋ wi ana dla ndaɗta tuɗ daɓ ki ni u ɗeɗna.

²⁴ Sa sunda vi Bu Suuna ka ɗeɗɗi. Nam mba lini sa ma suuna minim halaŋŋa, ndaki a haɗ suuna u lalamba.

²⁵ Nam haɗ suu ka minim boy mammaɗina u lalamba, Lona li hin ɦasi yal ma daŋŋa a jok hurusi zeɗ a wi gasira kalage.

²⁶ Asi hoŋ mbuɗ ki suu jivina noy ganyamba vi Satannara kiyo, suu nam vasi ay ki jew a hum u min mambana.