2 TIMOTE 1 - Boy Lonana

Gi deɓpa

¹ Ni an Pol sa vovoɗta vi Yesu Kristu u minda vi Lona, tinin a di ki kay iiri mayra vi vunna ay kaɗta aygi faɗ hu taɓpa u Yesu Kristura.

² Maŋ Timote, goron, ma an minimma. Ko Lona Buna u Bu Suuna mayna Yesu Kristu ɦaŋ oora, vaɗ huuna u heɓpa.

Gi deɓpa u gaɗta kay ɗegeera

³ An gi deɓ Lona ma an ka sunumma u saara jivira ko somoyon suu jewna lira na. An gam deɓpa hu buuna tew tew hu li ma humun gan kaŋ hu cenda.

⁴ Humun ka gan kay tii maŋŋa, ni an hurun min a tuɗ goloŋu, kay ay hin hoŋ fi furira.

⁵ Humun gan kay viiŋga gasira aŋ vira, vi ndaɗta ni mayra suŋgolo Lois u suŋ Eunise vaɗ ay jewra, an wi ki kaŋ gasi ana vi ndaɗta ka huruŋ may.

⁶ Ni kay ndaɗta an gaŋ humuŋu, li sunda u ɦala Lona ɦaŋga hu li ma an tin kon kaŋŋa.

⁷ Kay Lona ɦay ni ka ŋgussa dawiraɗi, Musuk mamba oyoygi ni u saɓakŋa, u minda, u nera may.

⁸ Li zolo kay a diki kay Bu Suuna maynaɗi, li zolo kan an saam ma daŋgaynaɗi lay, ni na ɗow ana vi wihawra kay Boy ma Ayra kaŋu u saɓak ma Lona ɦaŋŋana.

⁹ Nammi sa suɗuygi kina yaygi ana aygi ni suu mamma, ni ka kay sun maygira aygi laɗtaɗi, ni kay dlaamba nam ŋgaɓaɗta u oo mamba, nam ɦaygi oo mamba hu Yesu Kristu jew lina bay min tuwa.

¹⁰ Nam takaygi oo mamba ki ni u mbara vi Saaygi ma Suɗta, Yesu Kristu. Yesu Kristu su ki kay saɓakŋa vi maɗna wa ni u Boy ma Ayra nam takaygi ki kay iiri mayra ka miɗɗira.

¹¹ Lona tinin a an di Boy ma Ayra namma kiyo an ni sa vovoɗta a haɗ suuna may.

¹² Kay ndaɗta an vi wihawra kanu, an li zolo kay boy nammaɗi kay an wi sa ma an tin hurun kamma, an wi ki gasi ana nam ndaki a golon gak gak buu ma nam ŋgaamma, kay va ma nam ɦanna konna.

¹³ Li u boy ma gasi ma an daŋana col eŋ hu vira u minda ay taɓi hu Yesu Kristu u ndaɗta.

¹⁴ Vi u tlesuu aŋ haɗasina jiviya u ɦala vi Musuk Lonara ka huruygira.

¹⁵ Ko aŋ wi ana suu hu Azina noyon ki wa duk suu asina ni Figel u Hermogen.

¹⁶ Bu Suuna ɦal jivi mamba maŋ Onesifor u suu mamma, kay nam ka heɓen hurun tew tew, an hu daŋgayna lay ni nam ka li zolo konɗi.

¹⁷ Hu li ma nam mbay hu Romma ni nam hin halanni hali na ɗow gak gak nam fan tuwa.

¹⁸ Ko Bu Suuna ɦam oora, oora col ay ko Bu Suunara tew hu buu ma namma, aŋ wi gasi sunda jivira nam landa ay hu Efessa.