2 SAMUEL 9 - Boy Lonana

DAVID MBU Ɗ MULNA David vi Mefiboset varamu

¹ David di ana, «Na ni sa hin ka iiri hu ziŋ Solna a an lam dla jivira egem kay sem Jonatanɗi su?»

² Mbaɓu ma vi Solna dew yam ana Siba. Asi yam ay vi David nam mulna hin dam ana, «Ni aŋ Siba su?» Nam hoŋ dira ana ni, «An saaŋ ma sunda.»

³ Mulna di ana, «Na ni sa daŋ hin ha ka hu ziŋ Solna a an tak ɗegee mayra jivira Lona yal kaɗta ki egem kaɗi su?» Siba di mulna ana, «Goŋ Jonatan ma gayam ki guluɗina ha ka olo.»

⁴ Mulna hoŋom dira ana, «Nam arage?» Siba di mulna ana, «Nam ha ni hu ziŋ Makir, ta goŋ Amiyella, hu Lo-Debarra.»

⁵ Mulna David sun kam halam ay hu ziŋ Makir, ta goŋ Amiyella, hu Lo-Debar.

⁶ Mefiboset ma goŋ Jonatanna, ma goŋ Solna mbay eg David. Nam gi tam kaŋga u vun dikim goɓ kaŋgaa. David di ana, «Mefiboset.» Nam di ana, «Gola, saaŋ ma sunda wanna.»

⁷ David dam ki ana, «Li ndaa na ndeɗi, an hin laŋ dlara egeŋŋi u ɗegeera kay sem buŋ Jonatan. An hin hoŋoŋ ndaŋgara vi buŋ ŋgolo Solla kiyo, aŋ taŋga lay ni hin ti funa u an kay tabulla tew tew.»

⁸ Nam goɓ kaŋga hin di ana, «Saaŋ ma sunda ni ge ko may a aŋ pereɗ iriŋ ay kay di ma mayra camma ko ndal an na ni ge?»

⁹ Mulna yi Siba mbaɓu ma vi Solna hin dam ana, «Tlesuu vi Solna u tlesuu hu ziimma halaŋ an ɦasi ki maŋ goŋ malaŋŋana.

¹⁰ Aŋ hin lam baraɗna mamu, aŋ lay goryoŋ lay, suu maŋ suu sunda lay aŋ hin tli tlesuu tira mbaasi ay maŋ goŋ malaŋŋana. Mefiboset goŋ malaŋŋana hin ti tle asina kay tabul manda.» Doli ɗini Siba goryommi doogo yam vadl. Suu mam suu sunda dok-mba' may.

¹¹ Siba di mulna ana, «Saaŋ ma sunda hin li ni ko malanna mulna ɦal voɗta maŋ saam ma sundana na halaŋ. Na may Mefiboset ti kay tabul manda ni ko ndal goŋ mulna maa dew na.»

¹² Mefiboset goromma goona dew yam ana Mika. Suu vo hu zina vi Sibana li sunda ni maŋ Mefiboset.

¹³ Mefiboset kakira ni hu Yerusalem kay ana nam ti tina halaŋŋi kay tabulla vi mulnara. Gayam ki dalira u dlam jak.