2 SAMUEL 8 - Boy Lonana

Tira David ti kay njaf suu egemmara

¹ Ŋgoo dagan wanni David ci suu Filistinna homosi yasi ki kaŋgaa. David yow saɓak ma vi suu Filistin ma ti kay ndarayasinana kiyo.

² Nam ci suu Moabma hin ŋgaasi ni u zewna buurusi ki kaŋga kay ndaŋgara buuriya. Nam ŋga zewna mba' a casi kira may, zew ma hiŋŋa dew ni ma hinim iirina may. Suu Moabma mbuɗ ki ni suu sunda vi David suu lam sundana.

³ David ci Hadadezer, ma goŋ Rehob, ma mul ma Sobana, ki hu li ma nam hal a tli lum ma ŋgol ma Efratna kina.

⁴ David yowom suu mam suu duu u kuluminana ki na 1.700 u asgaa suu u sesina buɓ buɓ dok-mba' may. David ka diŋil kulumi suu vi suu sunda ki bel bel. Na lay ni nam hin suu kis may duk suu li sunda.

⁵ Suu Sirina suu Damasna mbay a njun kay Hadadezer mul ma Sobana. Na lay ni David ci suu Sirina ki 22.000.

⁶ David tin suu komandana ki hu Siri ta Damassa. Suu Sirina mbuɗ ki ni suu sun suu vi David suu ɦam taarana. Yawe ɦal saɓakŋa maŋ David ni hu li ma nam tuɗ huna halaŋ halaŋ.

⁷ David taa mbari lor ma suu sunda vi Hadadezerna, tuɗum ki hu Yerusalem.

⁸ Hu ɦoŋzi ma vi Hadadezerna, Beta u Berotay, mulna David taa walakka hu ŋgol cocoo.

⁹ Toow, mul ma Hamatna, hum ana David ci asgaa suu vi Hadadezerna ki halaŋ halaŋŋi.

¹⁰ Toow sun goromma Yoram eg mulna David a gam deɓpa a ŋgaam kay lira nam li duuna u Hadadezer cam kira, kay Hadadezer ni babali ma vi Toowna. Yoram yow tlesuu lorra, doonora, u walakka ha komu.

¹¹ Tle asina lay ni mulna David hinisi ki ni maŋ Bu Suuna, doonora lay, walakka u lorra lay, suu nam yowosi ay ki ko njaf suu nam tlasi liisina ay kina.

¹² Ay hu Siri lay, hu Moab lay ay vi goryoŋ Amonna lay, ay vi suu Filistinna lay, suu Amalekŋa lay u tlesuu yowosi ay hu jo Hadadezer goŋ Rehob mul ma Sobana lay.

¹³ David tin semma kam hu li ma nam hoŋ ay fun yara nam ci suu Sirina ki hu Ҥuɗugumba Vuvu Wawna buɓ buɓ doogora.

¹⁴ Nam tin suu komandana hu Edom. Hu Edom nam tin suu komandana ki bel bel. Suu vi Edomma halaŋ mbuɗ ki suu sun suu vi Davidna halaŋ halaŋ. Yawe hin ɦal saɓakŋa maŋ David hu li ma nam tuɗ huna halaŋ halaŋ.

Sem suu ŋgolo suu sun suu vi Davidna

¹⁵ David ti mulla kay suu Israelna halaŋ halaŋ. David li dlara jivira u ɗegeera maŋ suu mamsina halaŋ.

¹⁶ Joab ma goŋ Seruyana ni sa ŋgol ma fok asgaanana, Josafat goŋ Ahiludna ni sa ma fun mulnana.

¹⁷ Sadok, goŋ Ahitubma, Ahimelek, goŋ Abiyatarna, ni suu li ɓivunna. Seraya ni sa ma ɓii dlara.

¹⁸ Benaya, goŋ Yoyadana, ti ni kay suu Kretena u suu Peletena. Goryoŋ Davidna ni suu li ɓivunna.