2 SAMUEL 7 - Boy Lonana

Dlara Natan jokoɗ kira

¹ Doli ɗini hu li ma asi tin mulna ki hu ziimma, Yawe ɦam heɓpa hu li ma ŋguy kamma u ɦuɗta ɦuɗ suu babali mamsina kira.

² Mulna di sa ma jok vun Lona Natan ana, «Aŋ gola an kaki ni hu zira mini u gu sedrena, doli ɗini Zanduk Lonara ki tini ni hu duk ɦoŋ mbutluɓ barawna.»

³ Natan di mulna ana, «Dlara halaŋ saaraŋ tini kaɗ a laɗta, aŋ tuɗ laɗu, kay ana Yawe ka u aŋu.»

⁴ Doli ɗini njeŋge ndaɗta gaw ni Yawe ɓak boy mamma maŋ Natan ko wanda na ana,

⁵ «Tuɗ di saan ma sunda David ana Yawe ɓak anaba, aŋŋi sa ma hin minin zira kan a an hin kak hura su?

⁶ Kay an kak ka hu ziɗi col ay hu buu ma an sel suu Israelna ay ki hu Egiptena day ta ta karami. An tuɗ hu voɗ manda ni kakŋi u mbutluɓma u ŋgus zira.

⁷ Hu li namma halaŋ ma an poy ko tan u suu Israelna halaŋŋa ni na an di boy maŋ muli suu Israel suu an tinisi a taa suu man suu Israelna maa ka na dew lay ana, ni kay me aŋ minin zira mini u gu sedrena ka na dewɗi amegera kaɗi?

⁸ Cecem wanda ɗaŋŋi, aŋ hin ɓak saan ma sunda David ana, Yawe ma Saɓakŋa Kom Belna ɓak ana, Anni sa ma tlaŋ ay hu li ma taarana, ay ŋgoo yoorina a aŋ mbuɗ ki mul ma Israelna kay suu mansina.

⁹ An ay u aŋ hu li ma aŋ tuɗ ay huna halaŋ, an caŋ suu babali maŋsina ki fokoŋ halaŋ halaŋ. An hin tiniŋ sem ma ŋgolna kaŋu, ni sem ma suu ŋgolo suu kay ndaŋgarana tinim kasina.

¹⁰ An hin ŋgaɓ lina maŋ suu man suu Israelna, an hin tinisi huwa asi hin kak hu eg liisiya. Asi hin ka li ndaa oloɗi, suu ci maɗna hin ka hoŋ egesi a lasasi ko ndal jewra na oloɗi.

¹¹ Ko ndal hu buu ma jew ana an tin suu kaɓakŋa kay suu man suu Israelnana na. An ɦaŋ koɗ tara u ɦuɗta ɦuɗ suu babalira ha ki halaŋga. Yawe daŋ ana, Yawe hin miniŋ zira.

¹² Hu li ma buu maŋŋa daɓ ki wa aŋ buu ki kaŋga ko taŋ u somoyoŋ wa ni an hin wuluŋ njafaŋ ka ŋgoroŋ dagani. Sa ma kal ay ki egeŋ gawna an hin wulum mul mamba koloo.

¹³ Nammi sa ma hin min zira u senna. An hin wulum mul mamba kolo a fafaɗta.

¹⁴ An hin li ni a bumu, nam hin li ni goronna may. Lini nam li dla co wa ni an hin gaɗam u ndarayam suu warna ko tokolora na, waɗammi u ndarayamma.

¹⁵ May ɗegee manda hin ka ɦuɗ ki egem oloɗi ko ndal an ɦuɗuɗ ki eg Sol ma an ɦuɗum ki fokoŋŋa naɗi.

¹⁶ Fokoŋ wanni mul maŋga u ziiŋ lay hin li kakira na en, mul maŋga hin li saɓakŋa ni a fafaɗta.»

¹⁷ Ni u dlara wanda halaŋ u dlara takaɗ ki halaŋ wanda may, Natan hin ɓak David ni na.

Cenda vi David

¹⁸ Mulna David mbay kak ki fok Yawe hin di ana, «Anni gege, Bu Suuna Yawe, ziinni maana ba aŋ hin mbaan ki ta ta tani nige?

¹⁹ Doli ɗini dla ndaɗta ni ew iriŋ tuwa Bu Suuna Yawe, aŋ ɓak kay ziŋ saaŋ ma sundara ki ni jew day day. Boy namma hin li ni haɗta vi suu warna su Bu Suuna Yawe?

²⁰ Na ɗaŋŋi va ma David hin daŋŋana ni mege? Aŋ may ni wi saaŋ ma sunda, Bu Suuna Yawe.

²¹ Ni kay boy maŋŋa u dlara huruŋga aŋ li sunda ŋgol ndaɗta kiyo aŋ takaɗ ki maŋ saaŋ ma sunda.

²² Olo aŋ ŋgolo, Bu Suuna Yawe, sa ma ko aŋ na kaɗi. Lo ma ko aŋ na kaɗi, ni aŋ na dew daŋ u tlesuu ami humusi u hum tamira wanna.

²³ Na ni kay ndaŋgara ni suu tli tasi u Israel suu maŋsina suu may suu aŋ Lona tuɗ hoŋ gususi ay ki a mbuɗusi ki suu maŋsinana, tinisi semma kasiya, a lagi sunda ŋgolla, li dlara ŋgolora mbuɗ suuna ndaana maŋ mbas maŋga, na ni njaf suu ko ndal njaf suu maŋ suu aŋ hoŋosi gussa ay ki hu Egipte ko njaf suu asina u loogi masisina su?

²⁴ Aŋ hin tin suu Israelna a suu maŋsina a fafaɗta, aŋ taŋga Yawe aŋ hin mbuɗ ki ni Loosina.

²⁵ Cecem wanda, Yawe Lona, boy ma aŋ dam kay saaŋ ma sundana li ni a fafaɗta, aŋ li ni ko aŋ dira na may.

²⁶ Ko seŋ fi ŋgara a fafaɗta, ko suuna di ana Yawe ma Saɓakŋa Kom Belna ni Lo ma vi suu Israelna, ko zi ma vi saaŋ ma sunda Davidna kak saɓakŋa fokoŋ a fafaɗta.

²⁷ Gasi daŋ may ni aŋ taŋga Yawe ma Saɓakŋa Kom Belna, Lona vi suu Israelna, ma ne yam saaŋ ma sunda ki dam ana, an hin miniŋ zirana. Gola ni kay ndaɗta saaŋ ma sunda mbuɗ saɓakŋa a ceneŋŋi na.

²⁸ Cecem wanda Bu Suuna Yawe, aŋŋi Lona, boy maŋŋa ni gasira, aŋ ɓak kay dlara jivira eg saaŋ ma sundara.

²⁹ Cecem wanda aŋ paɗ vunuŋ ki kay ziŋ saaŋ ma sundana a nam kak fokoŋ a fafaɗta. Kay ana ni aŋ Bu Suuna, Yawe, ɓakŋi aŋu, u paɗvun maŋŋa ziŋ saaŋ ma sundana hin kak u heɓpa a fafaɗta.»