2 SAMUEL 6 - Boy Lonana

ZANDUKŊA, ZIŊ DAVIDNA, U DUU MA NAM DUUNA David min a hoŋ Zandukka ki hu Yerusalem

¹ David tok suu duu suu Israelna eg tasi daŋgatla, suuna buɓ buɓ dok-hindi.

² David gi tam hu voɗta tuɗa, nam u suu umma halaŋ col ha Baala hu mbassa Yudara a tuɗ tli Zanduk Lonara ay kiyo ta semma ki yii kaɗta. Sem Yawe ma Saɓakŋa Kom Belna, kaki kay Serubimma.

³ Asi tli Zanduk Lonara kolo hu puspus ma wilina, tlaɗ ay ki hu ziŋ Abinadabma kolo kay ɦinira. Uza u Ahiyo goryoŋ Abinadabma tuɗ u pupus ma wili namma.

⁴ Asi tlam ay ki ni hu ziŋ Abinadabma day ma kolo kay ɦinirana u Zanduk Lonara huwa, Ahiyo tuɗ fok Zandukka.

⁵ David u suu Israelna halaŋ li furi masira fok Yawe u soolla u del tlesuu bura halaŋ halaŋ, diŋŋa, diŋ ma zewem bolowna u dadarira u cakayawra lay.

⁶ Asi tew ki u madakŋa u li ma to wana vi Nakon. Uza weɗ ha kay Zanduk Lonara na ni, vaɗ komu kay ana mbutlugina puk gin kaŋgaa.

⁷ Yawe mbuɗ ki yara eg Uza ŋgolo. Lona hin waɗam hu li namma kay dla cora li komba ni na gaw. Nam miɗ hu li namma eg Zanduk Lonara ni na tok.

⁸ David hurum beŋ kiyo kay ana Yawe co ɦulotta ci Uza kira. Karammi tu lay ni li namma yam ana ɦulotta ci Uza kira.

⁹ David li ndaana ko Yawe hu buu namma hin di ana, «Zanduk Yawera gol ko ana mbay ni varanu na ni nanage?»

¹⁰ David min ka a jak Zanduk Yawera vo varam hu ɦoŋziimmaɗi. Nam hin tiniɗ ni hu ziŋ Obed-Edom ma Gatna.

¹¹ Zanduk Yawera buu hu ziŋ Obed-Edom ma Gatna ni tilna hindi. Yawe paɗ vunum ki kay Obed-Edom u suu varamma halaŋ.

Zandukka tew ki Yerusalem

¹² Asi mbay di mulna David ana, «Yawe paɗ vunum ki kay ziŋ Obed-Edomma u tlesuu varamma halaŋ kay Zanduk Lonara.» David tuɗ ɗaŋŋi tli Zanduk Lonara ay ki hu ziŋ Obed-Edomma tuɗuɗ ki hu Ҥoŋzi Davidna u furira.

¹³ Doli ɗaŋŋi suu tli Zanduk Yawera kasina calaɗ sesi na karkiya ɗaŋŋi, nam vi goo mbutlna a ɓivunna, ni goo mbutl ma ɗoori ɦayna.

¹⁴ David gijaŋ luu njoŋŋa u saɓakam bel fok Yawe. David cuk efodna egemu.

¹⁵ David u suu Israelna halaŋ tuɗ Zanduk Yawera ki duk soolla furira u tokolomma.

¹⁶ Doli ɗini hu li ma Zanduk Yawera kal ay ki hu Ҥoŋzi Davidna, Mikal ta goŋ Solla tin iriɗ ay ki ii zira. Ndaɗ wi mulna David weɗ koloo, luu njoŋŋa fok Yawe, huruɗ ɓeŋ ki egemmi na gaw.

¹⁷ Asi kal Zanduk Yawera ki voo. Asi tiniɗ hu li ma asi miniɗna, maɗ duk hoŋ mbutluɓ ma David minim kaɗna. David li ɓivun ma ŋgalam ki ŋgalina fok Yawe u ɓivun ma heɓ dukka.

¹⁸ Hu li ma David kom daɓ ki eg ɓivun ma ŋgalam ki ŋgalina u ma heɓ dukka may ni nam paɗ vunum ki kay suuna u sem Yawe ma Saɓakŋa Kom Belna.

¹⁹ Olo nam hin ɓorow komnjodira ki maŋ suuna halaŋ, maŋ suu Israel suu bolowna, njufiina u boyogina gegelay bel. Suuna halaŋ gegelay hin tuɗ vo varamu.

²⁰ David kal vo a paɗ vunum ki kay ziimba. Mikal goŋ Solla kal ay ki fokom hin dam ana, «Mul ma Israelna li dlara jivira karam wa, nam gi u tam ki fok suu mam suu sunda u mborɓogi mamsina ko ndal sa ma sunum kaɗina na.»

²¹ David di Mikal ana, «Ni fok Yawe ma mananna, ŋgaɓan balam bukŋa, duk suu hu ziimma halaŋ a tinin a mulna kay suu vi Yawena, kay Israel, ni fok Yawe an luu njoŋŋa ni na.

²² An hin hoŋ tan ki kaŋga su olo an hin mbuɗ tan ki hahawra ii tanda may eg suu sunda tok suu ndak ɓak kasi wanna, egesi tok lay an hin fi ŋgara.»

²³ Mikal ta goŋ Solla vuɗ goo kaɗi ta ta buu ma miɗ maɗna.