2 SAMUEL 5 - Boy Lonana

Tin David ki a mul ma Israelna

¹ Njaf suu Israelna bel mbay fi David hu Hebron dam ana, «Ami wanni ami ni sokoŋu, ni tliwiŋu.

² Buuna jak ki ni ŋgol da hu li ma Sol ay a mul maminana. Aŋŋi sa ma hin suu Israelna sel ay ki lay, hoŋ ha vo layna. Doli ɗini Yawe daŋ ana aŋŋi sa ma hin taaran suu man suu Israelna, aŋŋi sa ma hin li a mul ma Israelna.»

³ Suu basi suu Israelna halaŋ mbay fi mulna hu Hebron. Nam mulna David hin vi galamba u asi jivira hu Hebron fok Yawe. Asi hin fuu David a mul ma Israelna na.

⁴ David basaɗam ki ni dok-hindi hu li ma nam mbuɗ ki mulnana. Nam ti mulla basara dok-fiɗi.

⁵ Hu Hebron nam ti mulla kay Yuda basara kiɗisiya u tilna karkiya may. Hu Yerusalem nam ti mulla basara dok-hindi yam hindi kay Israel u Yuda halaŋ.

David tli Yerusalem kiyo

⁶ Mulna u suu mamsina tuɗ hu Yerusalem eg suu Jebusna suu ka hu mbas ndaɗtana. Asi di David ana, «Aŋ hin kal ay kaŋga tani ni hu li ma aŋ yow suu dugina u suu dalira kina.» Ni min di ni ana, «David hin ka kal ay taniɗi.»

⁷ David tli ɦoŋzi ma saɓak Siyonna kiyo. Ni Ҥoŋzi Davidna.

⁸ David di hu buu namma ana, «Gegelay ma min a waɗ sa ma Jebusna hin kal ki kaŋga hu zulla. Suu dugina u suu dalira David ka minisiɗi.» Ni kay ndaɗta asi di ana, «Suu dugina u suu dalira ka kal hu zinaɗi.»

⁹ David kak hu li ma saɓakŋa. Nam hin yi li namma ana, «Ҥoŋzi Davidna.» David hin min gulumunna ŋguyum ma ki kam col ay hu Millo day tew ki kaŋga wa to kurufu.

¹⁰ David mbuɗ ŋgolla ni mbuɗi na ɗow ɗow. Yawe, Lona ma Saɓakŋa ka u namu.

¹¹ Hiram, mul ma Tirna, sun suu sunda ay eg David u gu sedrena, suu li sun guna, suu ceɗ gogoyra min ziginina, asi min zira maŋ David.

¹² Na ɗaŋŋi David wi ana Yawe tinim a mulna ni namu. Nam ɦam jivira hu mul mamba ni kay Israel suu mamsina.

Goryoŋ David suu vuɗ ay Yerusalemma

¹³ David vi galamba u boyogina ɗum boyogina hu Yerusalem ŋgoo dagan mbaamba hu Hebronda. David hin vuɗ gorɓiina, gor njufiina lay.

¹⁴ Gola ni sem goryom suu vuɗ hu Yerusalemma, Kamua, Kabab, Natan u Salomon.

¹⁵ Ibar, Elisua, Nefeg u Yafiya.

¹⁶ Elikama Eliyada u Elifelet.

Tira David ti kay suu Filistinnara

¹⁷ Suu Filistinna hum ana asi fuu David tinim a mulna kay suu Israelna. Suu Filistinna halaŋ yow ay kolo daŋŋi a hal David. David hum boy namma na ni, tuɗ ki hu liim ma saɓakŋa, ŋgafasiya.

¹⁸ Suu Filistinna mbay njaa kosi ki hu ɦuɗugumba Refara.

¹⁹ David joɓ Yawe ana, «An tuɗ duu u suu Filistinna su? Aŋ hin ɦansina ki hu duk kon ko su?» Yawe di David ana, «Tuɗa, gasi an hin hiniŋ suu Filistinna ki hu duk koŋu.»

²⁰ David tew ki hu Baal-Perasim. David casi ki ni hu li namma. Nam di ɗaŋŋi ana, «Yawe gi zulla fok suu babali mansina ko ndal zulla mbona gaɗta na.» Ni kay ndaɗta asi tin sem li namma ana Baal-Perasimmi ana, malaŋ zulla.

²¹ Asi noy fuli masisina ki ni hu li namma. David u suu mamsina hin yowosi kiyo.

²² Suu Filistinna hin hoŋ ay njaa kosi ki daŋgadla hu ɦuɗugumba Refara.

²³ David joɓ Yawe nam hin hoŋom dira ana, «Aŋ ŋgafasi ha a duuna gawɗi. Aŋ pereɗ ay ki ŋgorosi dagani. Aŋ hin mbay egesi pay li ma gura huna na ɗow.

²⁴ Hu li ma aŋ hum vun ma sesi lam ay duk gurana wa ni, aŋ gol taŋ jiviya. Ni hu li ma Yawe hin kal ay ki a waɗ asgaa suu Filistinna.»

²⁵ David li ni ko ndal Yawe damba na. Nam hin ci suu Filistinna col ay hu Geba day ta ta tew ha ki hu Gezer.