2 SAMUEL 4 - Boy Lonana

Baana u Rekab ci Isebaal kiyo

¹ Isabaal, goŋ Solna, hum ana Abner miɗ ha ki hu Hebron wa. Kom cuk kaŋga ummi na gaw. Suu Israelna halaŋ hurusi beŋ kiyo.

² Suuna mba', suu ŋgolo suu fok suu duuna vo vi goŋ Solna, maa dew sem ana Baana, ma hiŋŋa ni Rekab may. Asi ni goryoŋ Rimmon ma Beerotna, goryoŋ Benjaminna kay Beerot, ndaɗ may ni ki ni ko ndal suu vi Benjaminna na.

³ Suu vi Beerotna liŋ tuɗ ŋgay tasi ha ki hu Gittaim. Asi kak ha ki hu ko ndal suu zina na ta ta karami.

⁴ Doli ɗini Jonatan ma goŋ Solna goromma gayam u dlam jak ki guluɗiya. Nam basaɗam ki ni vadl hu li ma dlara vi gi Sol u Jonatanda col ay Jizreel mbana. Cara wulumba tlam koɗ a liŋ ŋgay ki u namba. Ndaɗ li zazak coco a liŋ u namba, goona ndi kaŋga hin ki dalira ni na. Asi tinim sem ana Mefiboset.

⁵ Na ɗaŋŋi goryoŋ Rimmon ma Beerotna, goryoŋ Rekabma, goryoŋ Baanana tuɗ ni hu li ma faɗta ti cocona. Asi hin tew ha ki hu ziŋ Isebaalna. Nam ki kaŋga buri a koɗ tam faalira.

⁶ Asi sel ha kurufu hu zina u wa blena kasiya. Asi waɗam kay hayamu. Rekab u wayamma Baana pii kosi ki olo.

⁷ Asi kal ay ki hu zina kurufu, kal ni nam doli ɗaŋŋi ki buri kay lay mamma hu ziimba buuna. Asi waɗam ki cora na pum, kaam yam ki ni na gaw. Asi tlam yam kosi tani, tuɗ u ndaɗ duk njeŋgera gak gak hu ɦuɗugumba Yurdanda.

⁸ Asi tli yam Isebaal ɦaɗ ki maŋ David hu Hebron hin di mulna ana, «Gola yam Isebaal, goŋ Sol ma babali maŋ ma hal gin a caŋ kina. Yawe ɦal sa sugul ma ŋgolna maŋ malanna mulna hu buu ma karamma kay Sol u njafam lay.»

⁹ David hoŋ di goryoŋ Rimmon ma Beerotna, maŋ Rekab u wayamma Baana ana, «Ni u iirira vi Yawe ma suɗun ki fun dla cora belna.

¹⁰ Sa ma ɓakan ay kolo ana Sol miɗ ki wana tli tammi ko ndal sa ma di boy ma ayrana. Na ɗaŋŋi an ɗelem cam ha ki hu Siklag wa. Ni kay a warakam kay boy mam ma ayra.

¹¹ Ni kay ndaɗta suu dlasi co suu ci maɗna ci sa ma ɗegeena ki hu ziim kay lay mamma. Na ɗaŋŋi an ka ndak a joɓogina busuɗum ma vo ki kogina a gagi njafagi ki kay ndaŋgaraɗi su?»

¹² David ɦal voɗta maŋ gor njufiina, asi casi kiyo. Asi ŋgaɗasi kosi ki may, sesi ki may, ɓalasi ki kolo tok eg ɦuɗugumba Hebronda. Asi tli yam Isebaal tosoɗ hu zulla vi Abnerra hu Hebron.