2 SAMUEL 3 - Boy Lonana

¹ Duuna li ŋgol coco duk ɦoŋzi ma vi Solna u ma vi Davidna. David seŋ minda min tamba kaɗi. Ҥoŋzi ma vi Solna heɓ ki cocoo, mbuɗ ki maŋŋiya.

Goryoŋ David suu vuɗ ay hu Hebronna

² David vuɗ gorra ay hu Hebron. Ma ŋgolna yam ana Amnon goŋ Ahinoam ta Jizreella.

³ Ma mbana yam ana Kilab ni goŋ Abigal ta caŋ Nabal ma Karmelnara. Ma hindina ni Absalom ma goŋ Maaka ta goŋ Talmay, mul ma Gesurnara.

⁴ Ma fiɗina Adoniya goŋ Hagitna, ma vadlna Sefatiya goŋ Abitalna.

⁵ Ma karkiyana Itream goŋ Egla ta caŋ Davidta. David vuɗusi asina ni hu Hebron.

Abner ɓeŋ duk tasi ki u Isebaal

⁶ Hu li ma duuna ka duk ɦoŋzi ma vi Solna u ma vi Davidna ni Abner min tam ki hu ɦoŋzi ma vi Solna.

⁷ Sol banamba dew seɗ ana Rispa ta goŋ Ayara. Isebaal di Abner ana, «Aŋ buu u banaŋ bunda ni kay mege?»

⁸ Abner hum boy namma na ni mbuɗ ki ya coco hin di ana, «An tanda ni yam di ma Yudana su? Karam an ka li dlara u ɗegeera eg ɦoŋzi ma vi buŋ Solna, eg gorsemma, eg banayamma lay. An hiniŋ aŋ ndi ka hu duk ko Davidɗi. Cecem wanda aŋ hal a lan yara, ɓorowomi dukumi ki u ca ndaɗta karami.

⁹ Ko Lona li dlara wanda u dlara hiŋga eg Abner lini an li dlara Lona su tam ki kaɗta ka eg Davidɗi.

¹⁰ Tli mulla ki hu ɦoŋzi ma vi Solna, hoŋ mulla vi Davidta ki hu Israel, hu Yuda ta Danda hu Berseba.»

¹¹ Isebaal fi va ma hoŋ di Abner kaɗi kay ana nam mbuɗ ki ndaana.

Abner taɓ ki ko tam u David

¹² Abner sun suu vun sunda ha eg David u sem tamba di ana, «Mbassa ni vi gege? Aŋ vi galamba u anu, an hin vi kon u aŋ a ɦaŋ ɦoŋzi ma Israelna ki halaŋga.»

¹³ David hoŋ dira ana, «Jiviya. An hin vi galamba u aŋu. An joɓoŋ vana koŋŋi dew daŋ. Aŋ mba tak taŋ fokon bay mbaan Mikal ta goŋ Solla ay hu li ma aŋ hin mbay a tak taŋ kinaɗi.»

¹⁴ David sun suu vun sunda eg Isebaal ma goŋ Solna. Nam di ana, «Ҥan caanda Mikal ta an faɗ u vun ɗiw suu Filistinna kissa aya.»

¹⁵ Isebaal sun kaɗ a vaɗ ay vo vi njufuɗ Paltiyel ma goŋ Laikŋa.

¹⁶ Njufuɗ tuɗ uɗu ta ta tew ki hu Bahurim. Nam tuɗ ha kay ceereɗ u tiina. Na may Abner dam ana, «Ҥuɗ taŋ ha kiyo, hoŋ ha ki dagani.» Nam hin hoŋ dagani.

¹⁷ Abner yi suu basi suu Israelna a gi ii dlara u asiya. Nam dasi ana, «Lina jak ki ŋgolla agi u saara ana agi min tin David a mulna.

¹⁸ Li ma li dlara ndak wa. Gasi daŋ may Yawe ɓak ki kay David wa ana, U saɓak ko saan ma sunda, David, an hin suɗ suu man suu Israelna ki ko suu Filistinna, ki ko suu babali masisina halaŋ.»

¹⁹ Abner hin boy namma ɓakam maŋ Benjamin. Abner hin tuɗ ɓak boy namma maŋ David olo ha ki hu Hebron maŋ suu hum tasi u suu Israelna u suu hu ɦoŋzi ma vi Benjaminna halaŋ.

²⁰ Abner u suu tinimma um dok-mba' tuɗ eg David hu Hebron. David li tina maŋ Abner u suu tinim ayna.

²¹ Abner di David ana, «An hin gijaŋ tok suu Israelna halaŋ eg malanna mulna. Asi hin vi galamba u aŋu. Aŋ hin ti mulla aragelay hu li ma aŋ minimma.» David hin Abner nam tuɗa. Nam sa namma tuɗ u heɓpa.

Joab ci Abner kiyo

²² Gola suu sunda vi Davidna u suu vi Joabma hoŋ ay vo fun duuna yow tlena ay kosi ŋgol cocoo. Abner ka hu Hebron eg Davidɗi kay ana sa namma hinim nam tuɗ u heɓpa.

²³ Hu li ma Joab u suu mam suu duuna halaŋ hoŋ ay ki vona, asi mbay di Joab ana, «Abner ma goŋ Nerna mbay vo vi mulna nam hin hinim nam tuɗ u heɓpa.»

²⁴ Joab mbay fi mulna dam ana, «Aŋ li ni mege? Gola Abner mbay vo varaŋgi su? Aŋ hinim nam tuɗ u heɓpa ni nanage?

²⁵ Aŋ wi Abner ma goŋ Nerna. Nam mbay ni a ganaŋ yaŋgaɗi su? A wi voɗta aŋ kal ki huruɗ may, hoŋ ay huruɗ mayra, a wi dlara aŋ laɗta ki halaŋga.»

²⁶ Kal ay ki vo vi David may ni Joab sun suu cegeɗta kay cee Abner. Asi hoŋom ay ki ni hu li ma ɦuɗugumba Sirara bay David wamu.

²⁷ Hu li ma Abner hoŋ ay ki hu Hebronna Joab yam ha ki fun kaana hu vun ziimba ko ndal ɓakam boyna u heɓpa na. Hu li namma nam waɗam ki cora kay hayam na pum gaw, a sa sugul busu wayamma Azael.

²⁸ Hu li ma David hum boy namma ŋgoo dagan na ni, nam di ana, «An u mul manda ami dla ka kamiɗi a fafaɗta fok Yawe kay busu Abner ma goŋ Nerna.

²⁹ Ko nam ɓaɗ ni kay Joab u suu mamsina halaŋ. Ko dlara vo busuna kira ura tum suuna ki ndo ndonara, ura mbuɗ suuna ki ko boyogina nara u ndira ndi fun ŋgewnara u ndira mayra ndira seŋ lira li vo hu ziŋ Joabbaɗi.»

³⁰ Ni kay ana nam casi wayasina Azael ki fun duu ma Gabaon ma Joab u wayamma Abisay ci Abner kina.

³¹ David di Joab u suu mamsina halaŋ ana, «Haragi barawi magisina kiyo. Cukugi baraw bolla egegiya, a tiirigi u yoo tara fok Abner.» Mulna David tuɗ ha ŋgoo dagan maɗamu.

³² Asi tos Abner ni hu Hebron. Mulna mun ki tiina kay us Abner. Suuna halaŋ tiira.

³³ Mulna hin yoo tam kay Abner olo ɗaŋŋi ana, «Abner a fi gin maɗ ma sulukŋa ni nanage?

³⁴ Koŋ ka ki njuni u galinaɗi, asi njunuŋ seŋ ka ki u kinjiŋŋaɗi. Ko ndal suuna ndi fok suu ci maɗnarana aŋ ndi ni na.» Suuna halaŋ hin hoŋ tiina kamu.

³⁵ Suuna halaŋ hin hoŋ ay a ɦal tina maŋ David nde hu li ma lina ka faali tuna. May David su tam ana, «Ko Lona lan dla wanda egenu, lan dla hiŋga egenu, lini an ti fu ɗowba va daŋ ki jew bay faɗta ndi ki kaŋgaa.»

³⁶ Suuna halaŋ hum boy namma, vam vunumu, olo dlara mulna laɗta suuna halaŋ humuɗu, li uɗ halaŋ may.

³⁷ Suuna halaŋ, suu Israelna gegelay hum ki hu buu namma ana maɗ Abner ma goŋ Nerna ka ni dlara mulna laɗtaɗi.

³⁸ Mulna di suu mam suu sunda ana, «Agi wi ka ana mulna, sa ŋgolna, ndi ki kaŋga karam duk suu Israelnaɗi su?

³⁹ An karam ki maŋiya, u fuura fuurun tinin a mulnara lay, suu asina, goryoŋ Seruyana asi saɓak suunu. May Yawe warak sa ma cona ni u coomba may.»