2 SAMUEL 24 - Boy Lonana

David ndum suu Israelna

¹ Yara vi Yawera mbuɗ ŋgolla eg suu Israelna olo, nam so u David a lasi dla cora egesi di ana, «Tuɗ ndum suu Israelna u suu vi Yudana.»

² Mulna di Joab ma ŋgol asgaana ma ay u namma ana, «Tuɗ ki kay yam mbassa Israella halaŋ col ha hu Danna ta ta tew ha ki hu Berseba, ndumugi suuna aya an wasi ndumusi kiyo.»

³ Joab di mulna ana, «Ko Yawe, Looŋŋa, zul suuna yamba na kis a malanna, mulna, wasi ki u irimu. Kay malanna, mulna, min a wi dla ndaɗta u irim na mbee nige?»

⁴ Na lay ni dlara mulna daɗta vi Joab u suu ŋgolo suu fok suu asgaanana. Joab gi tam hu voɗta u suu ŋgolo suu fok suu asgaana vi mulnana tuɗ ndum suu Israelna.

⁵ Asi ɗiŋ lum ma Yurdanna kiyo, hin kak hu Aroer ii ma dalina vi ɦoŋzi ma hu zul ŋgolla mbo ma ɓaɗ ɦay ma Gadna, hin jok usi hu Yazer olo.

⁶ Asi tew ki hu Galaad, hu mbassa kaŋga ura hu Hodsi. Asi tew ki hu Dan-Yaan hin jak fok ŋguyra hu Sidon.

⁷ Asi kal ki hu ii ma saɓak ma Tirna, ki hu ɦoŋzi ma Hivna halaŋ halaŋ u ma Kanaanna may. Asi hin tuɗ hu fulla Yudara hu Berseba.

⁸ Asi tuɗ ki kay yam mbassa halaŋ ɗaŋŋi hin tew ki Yerusalemmi tilna dleeŋe u buuna dok-mba'.

⁹ Joab ɦal ndum suu nam fasi ayna maŋ mulna. Suu Israelna halaŋŋi 800,000 suu duuna ndak a tli ŋgewnana, suu vi Yudana suuna 500,000.

Lona gi David daŋgayna kay cora nam laɗta

¹⁰ David vun dikim gijaŋ ɓikim hu li ma nam ndum suuna ay kina. David di Yawe ana, «Ni suluk ma ŋgol ma an lamma. Cecem wanda ɗaŋŋi Yawe bulum cora vi saaŋ ma sundara ki bulumge. Kay ana an li dla ndaɗta ni ko sa puluɗina na.»

¹¹ Hu li ma David col ki kolo vin maɗiira ni, Yawe ɓak boy mamma ay fun sa jok vun Lona Gad ma wi u dlara vi Davidna ko wanda na.

¹² «Tuɗ di David ana, Yawe ɓak anaba, an tiniŋ nek dla cora kaŋ na hindi. Man taa dukusi dew ni an hin laɗu.»

¹³ Gad hin tuɗ vi David ɗaŋŋi, jokom boy namma. Nam dam ana, «Aŋ hin ndak a siɓ mayra basara na kiɗisiya hu mbas maŋga ɗowba li tilna hindi u dawra daw ko saaŋ ma babali ma cuɗuŋ uŋŋa ɗowba li buuna hindi u tuguɗii bora hu mbas maŋga su? Cecem wanda ɗaŋŋi aŋ saara, wi dla mayra an hin hoŋ dira maŋ sa sunun aynara.»

¹⁴ David di Gad ana, «Anni hu hahawra ŋgolla. Cukuy tay ni hu duk ko Yawe na ɗow, kay ana oo mamba ŋgol cocoo, na may ka an ndi hu duk ko suunaɗi.»

¹⁵ Yawe sun tuguɗii bora ay hu Israel ɗaŋ, col hu maɗiira karamba day ta ta tew ki hu li ma ŋgaamma, duk suu hu Danna ta ta Berseba ni suuna miɗ ki 70,000.

¹⁶ Sa sunda huulona maɗ kom ha kay Yerusalem a ɓeŋeɗ kira. Na may Yawe min ka li dla ndaɗtaɗi, hin di sa sunda huulona ma kiriɓ suuna kina ana, «Na ga. Cecem wanda tli koŋ kiyo.» Doli ɗini sa sunda huulona vi Yawe ka ki ni hu li ma to wana Aravna ma Jebusna.

¹⁷ David ɓak Yawe hu li ma nam wi sa sunda huulona ci suunana. Nam di ana, «Anni sa li sulukŋana. Anni sa li dla corana. Na ɗaŋŋi timigii suu wanna li ni me mayge? Ko koŋ li ni kan an u suu varanna.»

David min li ma li ɓivunna maŋ Yawe

¹⁸ Gad tuɗ fi David hu buu namma hin dam ana, «Min givin ma togolla maŋ Yawe hu madakŋa vi Aravna ma Jebusna.»

¹⁹ David tuɗ ha ko Gad dam u vun Yawera na.

²⁰ Aravna gol irim wi mulna u suu mam suu sunda tuɗ ay egemu. Aravna kal ay ki hin goɓ kaŋga fok mulna, vogom kaŋga duk ndaŋgara.

²¹ Aravna di ana, «Malanna, mulna, mbay vo vi saam ma sunda ni kay mege?» David hoŋ dira ana, «Ni kay a gusuŋ lina a min givin ma togolla maŋ Yawena. Ko ndaɗta na ni tuguɗii bora hin li ha ki eg suuna na day.»

²² Aravna di David ana, «Ko malanna mulna tli va ma hurum vamma a li ɓivun ma ŋgalam ki ŋgalina. Aŋ gola mbutlina hin li ɓivun ma ŋgalam ki ŋgalina u asiya, pupusna u gu ma kel mbutlinana hin li ni a gu ma ŋgalla.»

²³ Tle asina halaŋ ca ni mulna Aravna ɦasi ki maŋ mulna. Aravna di mulna ana, «Ko Yawe, Looŋŋa, humuŋ vunuŋ na humge.»

²⁴ Na may mulna di Aravna ana, «Ҥawaa, an min a gusuŋŋa ni u gusumu. An ka min ka li ɓivun ma ŋgalam kina maŋ Yawe, Loonna, ni ɓivun ma gusum kaɗina; di.» David gus lina u mbutlina u gursu sikle dok-vadl.

²⁵ Hu li namma David min givin ma togolla maŋ Yawe. Nam hin li ɓivun ma ŋgalam ki ŋgalina u ɓivun ma heɓ dukka. Yawe li dlara jivira hu mbassa. Tuguɗii bora hin ka ki eg suu Israelna na day.