2 SAMUEL 23 - Boy Lonana

Boy ma vi David ma daɓ daganna

¹ Gola ni boy ma vi David ma daɓ daganna. David ma goŋ Jesena di ana, Sa ma ki kaki kolo dayna di ana, sa ma Lona vi Yakob fuurumma, ma soolla vi suu Israelna lam jivirana.

² Musuk Yawera ɓak ki fununu, boy maɗna ka kay sininu.

³ Lo ma vi suu Israelnana di kiyo. Ҥinira vi suu Israelnara dan ki ana, sa ma ti mulla kay suuna u jivirana. Sa ma ti mulla u ndaa ma vi Lonana.

⁴ Ni ko ndal kiɗikka maɗiira hu li ma faɗta day ayna na, ko maɗiira bay ɗugulla na, u kiɗik ndaɗta ŋgoo mbo lo ma sina, usuna hin day ki kay ndaŋgara.

⁵ Ni ka dlara hu ziin eg Lonaraɗi su? Kay ana nam vi galamba dindinda u anu. Ii tlena ki gii hu halaŋ. Goli jivi layɗi su? Furi manda, ni dlara minda ka ndak a dayasi ki koloɗi su?

⁶ May suu sunusi kaɗina ni ko ndal wayra asi kaaɗ kira na. Asi ka vaɗ ni u kosiɗi su?

⁷ Sa ma tin kom egeɗna kaw kommi kawina u gu saɓpa. Ŋgalasi kiyo, ŋgalasi ki ni hu li namma gaw.

Suu saɓak suu duuna vi David

⁸ Gola ni sem suu saɓak suu vi Davidna, sa ma col hu liimmana. Isabaal ma Hakmonna ni ŋgol suu irisi kaay u tasi na cuɓ cuɓ hindina suu fokosina. Nammi sa kay suu casi ki na 800 hu buu ma dewna na.

⁹ Ŋgoorom dagan wanni, Elazar ma goŋ Dodona, goŋ sa ma Ahoana. Nam ay duk suu saɓak suu hindi suu ay u David hu li ma asi hal suu Filistin suu toki eg tasi a duunana. Suu Israelna ɦuɗ tasi kiyo.

¹⁰ Na may nam tamba hurum tinira a waɗ suu Filistinna ta ta kom loɓ ki hin viira jijira eg ŋgewna, Yawe hin li dlara saɓakŋa hu buu namma. Suuna hin hoŋ ay ki umu. Na may ni kay a yow tlesuu hin kina ɦawaa.

¹¹ Ŋgoorom dagan wanni, Kamma ma goŋ Age ma Hararna. Suu Filistinna tok tasi dew. Sene ma hu li nammana liiɗna ka hu cocoo. Suuna yow liŋŋa ko suu Filistinna.

¹² Nam min um ki duk sene namma, doorosi kamu, ci suu Filistinna. Yawe hin li dlara saɓakŋa.

¹³ Duk suu dok-hindina suuna hindi col ay duk suu duuna hu cokira feɗ tlena mbay eg David hu zulla Adulamba. Suu duu suu Filistinna cuk ka hu ɦuɗugumba Refara.

¹⁴ David ki ni hu liim ma ŋgayra ɗaŋ suu duu suu Filistinna ka ki doli hu Betlehem may.

¹⁵ David di dlara hurumba ana, «Sa ma hin tuɗ goon yo ma cira ay hu goloŋga vun grek ma Betlehemma ni gege?»

¹⁶ Suu hindi suu saɓakŋa laɗ ha ki kay suu duu suu Filistinna, go yona ay hu goloŋga vun grek ma Betlehemmara, tlam ay mbaam maŋ David. May nam min ka ci yo nammaɗi, hin li ɓivunna ki maŋ Yawe.

¹⁷ Nam di ana, «Ko Yawe lan dla cora egenu lini an li dla ndaɗta. Na may ka ni busu suu tuɗ ay a halam viɗ gin tasi ha kinaɗi su?» Nam min ka a cambi. Gola ni dlara suu saɓak suu hindina laɗta.

¹⁸ Abisay ma wayaŋ Joabma, goŋ Seruyana ŋgolla fok suu dok-hindina. Nammi sa ma tli saɓ mamba kay suuna kis kis hindi casi kina. Sem tii ki duk suu hindina.

¹⁹ Gasi daŋ may, suuna ay ki bolowra su suu hindina. Nam hin mbuɗ ki mul masina, may nam tew ka ci suu hindinaɗi.

²⁰ Benaya ma goŋ Yoyadana, goŋ sa ma saɓakŋa li dlara ŋgolora bolow cocona ma vuɗ hu Kabseelna. Nammi sa ma ci suu Ariyel suu Moabma. Nammi sa ma ci dlona ki hu goloŋga hu buu ma mboroɦoyra gina.

²¹ Ni nam olo ci sa ma Egiptena kiyo. Sa ma tuɗ tam ki fanina. Sa ma Egiptena u saɓ mamba komu, nam tuɗ ha egem u tokolora komu, ɓaɗ saɓpa ki ko sa ma Egiptena hin cam ki u saɓ mamba tok.

²² Gola ni dlara Benaya ma goŋ Yoyadana laɗta. Sem tii ki duk suu dok-hindina, na may nam ka duk suu saɓak suu hindinaɗi.

²³ Suuna ŋgaam coco su suu dok-hindina, may nam tew ka duk suu hindinaɗi. David jogom ha ki a golom umba.

²⁴ Azabel ma wayaŋ Joabma ay duk suu dok-hindina. Elanan ma goŋ Dodo ma Betlehemma lay.

²⁵ Kamma ma Harodna, Elika ma Harodna.

²⁶ Heles ma Peletna, Ira ma goŋ Ikek ma Tekoana.

²⁷ Abiyezer ma Anatotna, Mebunnay ma Husana.

²⁸ Salmon ma Ahoana, Maray ma Netofna,

²⁹ Heleb ma goŋ Baana ma Netofana, Itay ma goŋ Ribay ma Gibea ta vi goryoŋ Benjaminda.

³⁰ Benaya sa ma Piratonna, Hidday ta hu lum ma Gaakŋa.

³¹ Abiyalbon ma Bet-Araba, Azmavet ma Bahurimma.

³² Eliyaba ma Kaalbonna, goryoŋ Yasenna, Yonatan.

³³ Kamma sa ma Hararna, Ahiyam ma goŋ Karar ma Hararna.

³⁴ Elifelet ma goŋ Ahasabayna, ma goŋ Maakana, Eliyam ma goŋ Ahitofel ma Gilona.

³⁵ Hesray ma Karmelna, Paaray ma Arabma.

³⁶ Igal ma goŋ Natan ma Sobana, Bani ma Gadna.

³⁷ Selek ma Amonna, Naray ma Beerotna ma tuɗ fok Joab ma goŋ Seruyana.

³⁸ Ira ma Yeterna, Gareb ma Yeterna.

³⁹ Uri ma Hetna, asi halaŋŋi dok-hindi yam kiɗisiya.